ಬೆಂಗಳೂರು: ಅಮೆರಿಕದ ‘ಸೈನ್ಸ್’ ನಿಯತಕಾಲಿಕ ಸಿದ್ಧಪಡಿಸಿರುವ, ಜೈವಿಕ ತಂತ್ರಜ್ಞಾನ (ಬಿ.ಟಿ.) ಕ್ಷೇತ್ರದ ವಿಶ್ವದ ಐದು ಅತ್ಯುತ್ತಮ ಉದ್ಯೋಗದಾತರ ಪಟ್ಟಿಯಲ್ಲಿ ತನ್ನ ಹೆಸರೂ ಸೇರಿದೆ ಎಂದು ಬಯೋಕಾನ್ ಲಿಮಿಟೆಡ್ ಹೇಳಿದೆ. ‘ಸೈನ್ಸ್’ ನಿಯತಕಾಲಿಕವು 2020ನೇ ಸಾಲಿಗೆ ಸಂಬಂಧಿಸಿದಂತೆ ಈ ಪಟ್ಟಿಯನ್ನು ಸಿದ್ಧಪಡಿಸಿದೆ.
ಬೆಂಗಳೂರಿನಲ್ಲಿ ಕೇಂದ್ರ ಕಚೇರಿ ಹೊಂದಿರುವ ಬಯೋಕಾನ್ ಕಂಪನಿಯು ಫಾರ್ಮಾ ಮತ್ತು ಬಿ.ಟಿ. ವಲಯದ ಕಂಪನಿಗಳ ಪಟ್ಟಿಯಲ್ಲಿ ಐದನೆಯ ಸ್ಥಾನವನ್ನು ಪಡೆದಿದೆ. 2018ರಲ್ಲಿ ಕಂಪನಿಯು ಏಳನೆಯ ಸ್ಥಾನದಲ್ಲಿ, 2019ರಲ್ಲಿ ಆರನೆಯ ಸ್ಥಾನದಲ್ಲಿ ಇತ್ತು.
ವಿಶ್ವದ ಬೇರೆ ಬೇರೆ ದೇಶಗಳ ಒಟ್ಟು 7,600 ಪ್ರತಿನಿಧಿಗಳಿಂದ ಪ್ರತಿಕ್ರಿಯೆಗಳನ್ನು ಪಡೆದುಕೊಂಡಿರುವ ‘ಅತ್ಯುತ್ತಮ ಉದ್ಯೋಗದಾತರ ಸಮೀಕ್ಷೆ’ ಪ್ರಕಾರ, ‘ಉದ್ಯಮದಲ್ಲಿ ಹೊಸತನವನ್ನು ಕಂಡುಕೊಳ್ಳುವ ನಾಯಕತ್ವದ ಗುಣ’, ‘ಸಾಮಾಜಿಕ ಹೊಣೆಗಾರಿಕೆ’ ಮತ್ತು ‘ನಿಷ್ಠಾವಂತ ನೌಕರರನ್ನು ಹೊಂದಿರುವಿಕೆ’ಯನ್ನು ಪರಿಗಣಿಸಿ ತನಗೆ ಈ ಸ್ಥಾನ ಸಿಕ್ಕಿದೆ ಎಂದು ಬಯೋಕಾನ್ ಹೇಳಿದೆ.
ಮಾರ್ಚ್ನಿಂದ ಮೇ ತಿಂಗಳ ನಡುವೆ ಸಮೀಕ್ಷೆ ನಡೆದಿದೆ. ‘ನಮ್ಮ ನೌಕರರು ವೃತ್ತಿಯ ವಿಚಾರದಲ್ಲಿ ತೋರಿರುವ ಪ್ರೀತಿಯನ್ನು ಈ ಸಮೀಕ್ಷೆ ಗುರುತಿಸಿದೆ’ ಎಂದು ಬಯೋಕಾನ್ನ ಕಾರ್ಯನಿರ್ವಾಹಕ ಅಧ್ಯಕ್ಷೆ ಕಿರಣ್ ಮಜುಂದಾರ್ ಶಾ ಹೇಳಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.