ಕೆನರಾ ಬ್ಯಾಂಕ್‌ನಿಂದ ₹ 2 ಸಾವಿರ ಕೋಟಿ ಸಂಗ್ರಹ

ಬೆಂಗಳೂರು: ಸರ್ಕಾರಿ ಸ್ವಾಮ್ಯದ ಕೆನರಾ ಬ್ಯಾಂಕ್‌ ಬಾಸೆಲ್‌–3 ಟಯರ್–2, ಸೀರಿಸ್‌–1 ಬಾಂಡ್‌ ಮೂಲಕ ಒಟ್ಟು ₹ 2 ಸಾವಿರ ಕೋಟಿ ಸಂಗ್ರಹ ಮಾಡಿದೆ. ಈ ಬಾಂಡ್‌ಗಳಿಗೆ ಬ್ಯಾಂಕ್‌ ವಾರ್ಷಿಕ ಶೇಕಡ 7.48ರಷ್ಟು ಲಾಭಾಂಶ (ಕೂಪನ್ ರೇಟ್) ಪಾವತಿಸಲಿದೆ.

ಬಾಂಡ್‌ಗಳಿಗೆ ಹೂಡಿಕೆದಾರರಿಂದ ಭಾರಿ ಸ್ಪಂದನ ವ್ಯಕ್ತವಾಗಿತ್ತು ಎಂದು ಬ್ಯಾಂಕ್‌ ಹೇಳಿದೆ. ಆರಂಭಿಕ ಮೊತ್ತವಾಗಿ ₹ 1,000 ಕೋಟಿಯ ಬಾಂಡ್‌ಗಳನ್ನು ಹೂಡಿಕೆದಾರರಿಗೆ ಮುಕ್ತವಾಗಿಸಲಾಗಿತ್ತು, ಇದನ್ನು ಇನ್ನೂ ₹ 1000 ಕೋಟಿಯಷ್ಟು ಹೆಚ್ಚಿಸುವ ಆಯ್ಕೆ ಇರಿಸಿಕೊಳ್ಳಲಾಗಿತ್ತು.

ಒಟ್ಟು ₹ 8,930 ಕೋಟಿಗಿಂತ ಹೆಚ್ಚಿನ ಮೌಲ್ಯದ ಬಾಂಡ್‌ಗಳಿಗೆ ಹೂಡಿಕೆದಾರರು ಬಿಡ್‌ ಸಲ್ಲಿಸಿದ್ದರು ಎಂದು ಬ್ಯಾಂಕ್‌ ಪ್ರಕಟಣೆ ತಿಳಿಸಿದೆ. ಕೆನರಾ ಬ್ಯಾಂಕ್‌ ಹೊರಡಿಸುವ ಟಯರ್–2 ಬಾಂಡ್‌ಗಳಿಗೆ ರೇಟಿಂಗ್ಸ್ ಸಂಸ್ಥೆಗಳಾದ ಐಸಿಆರ್‌ಎ ಮತ್ತು ಇಂಡಿಯಾ ರೇಟಿಂಗ್ಸ್ ಎಎಎ ರ್‍ಯಾಂಕ್ ನೀಡಿವೆ ಎಂದು ಪ್ರಕಟಣೆ ತಿಳಿಸಿದೆ.