ಬಂದರುಗಳಲ್ಲಿ ಸಿಲುಕಿದ ಗೋಧಿ

ಮುಂಬೈ (ರಾಯಿಟರ್ಸ್): ಗೋಧಿ ರಫ್ತಿಗೆ ನಿಷೇಧ ಹೇರಿದ ಕೇಂದ್ರದ ಕ್ರಮದಿಂದಾಗಿ ಬಂದರುಗಳಲ್ಲಿ ಅಂದಾಜು 18 ಲಕ್ಷ ಟನ್ ಗೋಧಿ ಸಿಲುಕಿಕೊಂಡಿದೆ. ಇದರಿಂದಾಗಿ ವರ್ತಕರು ಭಾರಿ ನಷ್ಟಕ್ಕೆ ಸಿಲುಕುವ ಭೀತಿ ಎದುರಿಸುತ್ತಿದ್ದಾರೆ.

ಬಂದರುಗಳಲ್ಲಿ ಒಟ್ಟು 22 ಲಕ್ಷ ಟನ್ ಗೋಧಿ ಸಿಲುಕಿಕೊಂಡಿದೆ. ಈ ಪೈಕಿ 4 ಲಕ್ಷ ಟನ್‌ಗೆ ಲೆಟರ್ ಆಫ್ ಕ್ರೆಡಿಟ್ ಇದ್ದು, ಇಷ್ಟು ಗೋಧಿಯನ್ನು ರಫ್ತು ಮಾಡಲು ಸಮಸ್ಯೆ ಇಲ್ಲ ಎಂದು ವರ್ತಕರು ತಿಳಿಸಿದ್ದಾರೆ.

ಇನ್ನುಳಿದ 18 ಲಕ್ಷ ಟನ್ ಗೋಧಿಯನ್ನು ಏನು ಮಾಡುವುದು ಎಂಬುದು ಗೊತ್ತಾಗುತ್ತಿಲ್ಲ. ವರ್ತಕರು ಗೋಧಿಯನ್ನು ಮತ್ತೆ ದೇಶಿ ಮಾರುಕಟ್ಟೆಯಲ್ಲಿ ಕಡಿಮೆ ಬೆಲೆಗೆ ಮಾರಾಟ ಮಾಡಬೇಕಾಗಬಹುದು ಎನ್ನಲಾಗಿದೆ.