ಸೆಪ್ಟೆಂಬರ್‌ನಲ್ಲಿ ವಾಹನ ತಯಾರಿಕೆ ಎರಡು ಪಟ್ಟು ಇಳಿಕೆ: ಮಾರುತಿ

ನವದೆಹಲಿ: ಸೆಮಿಕಂಡಕ್ಟರ್‌ ಕೊರತೆಯಿಂದಾಗಿ ಸೆಪ್ಟೆಂಬರ್‌ನಲ್ಲಿ ವಾಹನಗಳ ತಯಾರಿಕೆಯು ಎರಡು ಪಟ್ಟು ಇಳಿಕೆ ಕಂಡಿದೆ ಎಂದು ಮಾರುತಿ ಸುಜುಕಿ ಇಂಡಿಯಾ ಕಂಪನಿಯು ಸೋಮವಾರ ಹೇಳಿದೆ.

2020ರ ಸೆಪ್ಟೆಂಬರ್‌ನಲ್ಲಿ ಒಟ್ಟಾರೆ 1.66 ಲಕ್ಷ ವಾಹನಗಳನ್ನು ತಯಾರಿಕೆ ಮಾಡಲಾಗಿತ್ತು. 2021ರ ಸೆಪ್ಟೆಂಬರ್‌ನಲ್ಲಿ 81,278 ವಾಹನಗಳನ್ನಷ್ಟೇ ತಯಾರಿಸಲು ಸಾಧ್ಯವಾಗಿದೆ ಎಂದು ಅದು ಷೇರುಪೇಟೆಗೆ ಮಾಹಿತಿ ನೀಡಿದೆ.

ಪ್ರಯಾಣಿಕ ವಾಹನ ತಯಾರಿಕೆಯು 1.61 ಲಕ್ಷದಿಂದ 77,782ಕ್ಕೆ ಇಳಿಕೆ ಆಗಿದೆ. ಲಘು ವಾಣಿಜ್ಯ ವಾಹನ ತಯಾರಿಕೆಯು 4,418 ರಿಂದ 3,496ಕ್ಕೆ ಕಡಿಮೆ ಆಗಿದೆ ಎಂದು ತಿಳಿಸಿದೆ.

ಸೆಮಿಕಂಡಕ್ಟರ್‌ ಕೊರತೆಯಿಂದಾಗಿ ಸೆಪ್ಟೆಂಬರ್‌ನಲ್ಲಿ ವಾಹನ ತಯಾರಿಕೆ ಶೇ 40ರಷ್ಟು ಮಾತ್ರವೇ ಆಗುವ ನಿರೀಕ್ಷೆ ಇದೆ ಎಂದು ಕಂಪನಿಯು ಆಗಸ್ಟ್‌ 31ರಂದು ಘೋಷಿಸಿತ್ತು.