ಕನಿಷ್ಠ ಪಿಂಚಣಿ ಹೆಚ್ಚಳ: ಇಪಿಎಫ್‌ಒ ಜತೆ ಚರ್ಚೆ

ನವದೆಹಲಿ: ಕನಿಷ್ಠ ಪಿಂಚಣಿಯನ್ನು ಸದ್ಯದ ₹ 1,000 ಗಳಿಂದ ಹೆಚ್ಚಿಸುವ ಸಂಬಂಧ ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆ (ಇಪಿಎಫ್‌ಒ) ಜತೆ ಚರ್ಚೆ ನಡೆಯುತ್ತಿದೆ ಎಂದು ಸೋಮವಾರ ಲೋಕಸಭೆಗೆ ಮಾಹಿತಿ ನೀಡಲಾಗಿದೆ.

ಕನಿಷ್ಠ ಪಿಂಚಣಿ ಮೊತ್ತವನ್ನು ಹೆಚ್ಚಿಸಬೇಕು ಎಂದು ಕೆಲ ಸದಸ್ಯರು ಸದನದಲ್ಲಿ ಒತ್ತಾಯಿಸಿದ್ದರು. ಕಾರ್ಮಿಕ ಸಚಿವ ಸಂತೋಷ್‌ ಕುಮಾರ್‌ ಗಂಗ್ವಾರ್‌ ಅವರು ಇದಕ್ಕೆ ಉತ್ತರ ನೀಡಿದರು. ‘ಇಪಿಎಫ್‌ಒ’ದ ಟ್ರಸ್ಟಿಗಳ ಕೇಂದ್ರೀಯ ಮಂಡಳಿಯೂ ಈ ಚರ್ಚೆಯಲ್ಲಿ ಭಾಗಿಯಾಗಿದೆ. ಕನಿಷ್ಠ ಪಿಂಚಣಿಯನ್ನು ₹ 2,000ಕ್ಕೆ ಹೆಚ್ಚಿಸಿದರೆ ಸರ್ಕಾರಕ್ಕೆ ₹ 4,671 ಕೋಟಿ ಮತ್ತು ₹ 3,000ಕ್ಕೆ ಹೆಚ್ಚಿಸಿದರೆ ₹ 11,696 ಕೋಟಿ ಹೊರೆ ಬೀಳಲಿದೆ. ಮೋದಿ ಸರ್ಕಾರವೇ ಈ ಹಿಂದೆ ಕನಿಷ್ಠ ಪಿಂಚಣಿಯನ್ನು ₹ 1,000ಕ್ಕೆ ಹೆಚ್ಚಿಸಿತ್ತು’ ಎಂದು ಮಾಹಿತಿ ನೀಡಿದರು.