ರೂಪಾಯಿ 78ಕ್ಕೆ ಕುಸಿಯುವ ಸಂಭವ

ನವದೆಹಲಿ: ಕರೆನ್ಸಿ ವಿನಿಮಯ ಮಾರುಕಟ್ಟೆಯಲ್ಲಿ ಈ ವರ್ಷ ಡಾಲರ್ ಎದುರು ರೂಪಾಯಿ ಮೌಲ್ಯ ₹ 78ಕ್ಕೆ ಕುಸಿಯುವ ಸಾಧ್ಯತೆ ಇದೆ ಎಂದು ಕಾರ್ವಿ ಸಂಸ್ಥೆ ಹೇಳಿದೆ.

ಸರಕು ಮತ್ತು ಕರೆನ್ಸಿಗಳ ಬಗ್ಗೆ 2019ರ ವರದಿ ಬಿಡುಗಡೆ ಮಾಡಿರುವ ಸಂಸ್ಥೆಯು, ಮಾರುಕಟ್ಟೆಗಳಿಗೆ ಈ ವರ್ಷ ಮಿಶ್ರಫಲ ಸಿಗಲಿದೆ ಎಂದಿದೆ.

‘ರೂಪಾಯಿ ವಿನಿಮಯ ದರವು 2019ರಲ್ಲಿ ₹ 78ರವರೆಗೂ ಕುಸಿಯುವ ಸಾಧ್ಯತೆ ಇದೆ’ ಎಂದು ಸಂಸ್ಥೆಯ ಸಿಇಒ ರಮೇಶ್‌ ವಿ. ತಿಳಿಸಿದ್ದಾರೆ.

ಸಾರ್ವತ್ರಿಕ ಚುನಾವಣೆ ಇರುವುದರಿಂದ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್‌ಐಐ) ಮತ್ತು ವಿದೇಶಿ ನೇರ ಬಂಡವಾಳ ಹೂಡಿಕೆದಾರರು (ಎಫ್‌ಡಿಐ) ಭಾರತದ ಮಾರುಕಟ್ಟೆಗಳಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಹೂಡಿಕೆ ಮಾಡುವುದಿಲ್ಲ.

ಚಾಲ್ತಿ ಖಾತೆ ಕೊರತೆ, 2017–18ರಲ್ಲಿ ₹ 3.45 ಲಕ್ಷ ಕೋಟಿ ಇತ್ತು. ಇದು2018–19ರ ಮೊದಲಾರ್ಧದಲ್ಲಿ ₹ 2.48 ಲಕ್ಷ ಕೋಟಿಗೆ ತಲುಪಿದೆ. ಇದೇ ರೀತಿಯಲ್ಲಿ ಮುಂದುವರೆದರೆ, 2018–19ರಲ್ಲಿ ಭಾರತದ ಇತಿಹಾಸದಲ್ಲಿಯೇ ಅತ್ಯಂತ ಗರಿಷ್ಠ ಮಟ್ಟಕ್ಕೆ ತಲುಪಲಿದೆ ಎಂದು ಹೇಳಿದೆ.