ಬಾದಾಮಿಯಲ್ಲಿ ಗೋಹತ್ಯೆ: ಕಠಿಣ ಶಿಕ್ಷೆಗೆ ಆಗ್ರಹಿಸಿ ಮನವಿ

ಗುಳೇದಗುಡ್ಡ: ಬಾದಾಮಿಯಲ್ಲಿ ಗೋಹತ್ಯೆ ಮಾಡಿದವರಿಗೆ ಕಠಿಣ ಶಿಕ್ಷೆಯಾಗಬೇಕು ಎಂದು ಆಗ್ರಹಿಸಿ ಪಟ್ಟಣದಲ್ಲಿ ಶ್ರೀರಾಮಸೇನೆ ಕಾರ್ಯಕರ್ತರು ತಹಶೀಲ್ದಾರ ಕಚೇರಿಯ ಶಿರಸ್ತೇದಾರ ಸುಭಾಸ ವಡವಡಗಿ ಅವರಿಗೆ ಶುಕ್ರವಾರ ಮನವಿ ಸಲ್ಲಿಸಿದರು.

‘ಬಾದಾಮಿ ಪಟ್ಟಣದಲ್ಲಿ 20ಕ್ಕೂ ಹೆಚ್ಚು ಗೋವುಗಳನ್ನು ಹತ್ಯೆ ಮಾಡಲಾಗಿದೆ. ಗೋವುಗಳನ್ನು ಹತ್ಯೆ ಮಾಡಿದವರ ಮೇಲೆ ಕಠಿಣ ಕ್ರಮ ಕೈಗೊಳ್ಳಬೇಕು. ಹಿಂದೂಗಳು ದೇವತೆ ಎಂದು ಪೂಜಿಸುವ ಗೋವುಗಳನ್ನು ಅನ್ಯಕೋಮಿನವರು ನಿರ್ದಾಕ್ಷಿಣ್ಯವಾಗಿ ಹತ್ಯೆ ಮಾಡುತ್ತಿದ್ದಾರೆ. ಅವರ ವಿರುದ್ಧ ಕ್ರಮ ಕೈಗೊಳ್ಳಬೇಕು’ ಎಂದು ಕಾರ್ಯಕರ್ತರು ಆಗ್ರಹಿಸಿದರು.

ಮಾಜಿ ಶಾಸಕ ರಾಜಶೇಖರ ಶಿಲವಂತ ಅವರು ತಹಶೀಲ್ದಾರ ಅವರಿಗೆ ಮನವಿ ಸಲ್ಲಿಸಿದರು. ಮರಡಿಮಠದ ಅಭಿನವ ಕಾಡಸಿದ್ದೇಶ್ವರ ಸ್ವಾಮೀಜಿ, ಮಲ್ಲಿಕಾರ್ಜುನ ಬಾದಾಮಿಮಠ, ಮಹೇಶ ಸೂಳಿಭಾವಿ, ರಾಜು ಚಿತ್ತರಗಿ, ವಿಶ್ವನಾಥ ಭಾರತಿಮಠ, ಹನಮಂತ ಆಲಗುಂಡಿ, ಜಗದೀಶ ಕ್ಯಾದಿಗೇರಿ, ಮಹಾಂತೇಶ ಹಿರೇಮಠ, ಶೀತಲ್ ಸತ್ತಿಗೇರಿ, ವಿನಾಯಕ ಹಾನಾಪೂರ, ಶಿವು ಬಾದೋಡಗಿ, ಕೃಷ್ಣ ಬೀಳಗಿ, ಪ್ರಭು ಕಳ್ಳಿಗುಡ್ಡ ಇದ್ದರು.