ಮುಧೋಳ | ರೈತರ ಜಮೀನಿಗೆ ಕೃಷಿ ಅಧಿಕಾರಿಗಳ ಭೇಟಿ; ಬೆಳೆ ಪರಿಶೀಲನೆ

ಮುಧೋಳ: ತಾಲ್ಲೂಕಿನ ವಿವಿಧ ಗ್ರಾಮಗಳಿಗೆ ಭೇಟಿ ನೀಡಿದ ಕೃಷಿ‌ ಇಲಾಖೆ ಹಾಗೂ ಕೃಷಿ ವಿಜ್ಞಾನ ಕೇಂದ್ರದ ಅಧಿಕಾರಿಗಳು, ಹಿಂಗಾರು ಹಂಗಾಮಿನ ಬೆಳೆಗಳಾದ ಕಡಲೆ, ಬಿಳಿಜೋಳ ಬೆಳೆಗೆ ಅಂಟಿರುವ ರೋಗ ಕೀಟಬಾಧೆ ಕುರಿತು ಸಮೀಕ್ಷೆ ನಡೆಸಿದರು.

ಹಲಗಲಿ, ಮೆಳ್ಳಿಗೇರಿ, ಲಕ್ಷಾನಟ್ಟಿ,‌ ನಾಗಣಾಪುರ ಸೇರಿದಂತೆ ವಿವಿಧ ಗ್ರಾಮಗಳಿಗೆ ಭೇಟಿ ನೀಡಿದ ಕೃಷಿ ವಿಜ್ಞಾನ ಕೇಂದ್ರದ ಮುಖ್ಯಸ್ಥ ಗುರುದತ್ತ ಹೆಗಡೆ, ವಿಠ್ಠಲ ಅವರು ಕೀಟಬಾಧೆ ನಿಯಂತ್ರಣಕ್ಕೆ ಕೈಗೊಳ್ಳಬೇಕಾದ ಕ್ರಮದ ಬಗ್ಗೆ ರೈತರಿಗೆ ಮಾಹಿತಿ ನೀಡಿದರು.

ಕೃಷಿ ಇಲಾಖೆಯ ಸಹಾಯಕ ನಿರ್ದೇಶಕ ಮಂಜುನಾಥ ಮಾತನಾಡಿ, ‘ಮುಂಗಾರು ಹಂಗಾಮಿನ ಕಡಲೆ, ಬಿಳಿಜೋಳ ಬೆಳೆಗೆ ಕೀಟಬಾಧೆ ಕಂಡುಬಂದಿದ್ದು, ರೈತರು ಸಮೀಪದ ರೈತ ಸಂಪರ್ಕ ಕೇಂದ್ರಕ್ಕೆ ಭೇಟಿ ನೀಡಿ‌ ಸಬ್ಸಿಡಿ ದರದಲ್ಲಿ ಕೀಟನಾಶಕ ಪಡೆದು ಬೆಳೆ ಸಂರಕ್ಷಣೆ ಮಾಡಿಕೊಳ್ಳಬೇಕು’ ಎಂದು ಸಲಹೆ ನೀಡಿದರು.

ಕೃಷಿ ಅಧಿಕಾರಿಗಳಾದ ರೇಣುಕಾ ಗೌಡಪ್ಪಗೌಡ್ರ, ಬಸವರಾಜ ಬುದ್ನಿ, ರೈತರಾದ ಮುತ್ತಪ್ಪ ಜೈನಾಪುರ, ಕರೆಪ್ಪ ಕೊಳ್ಳನ್ನವರ, ಲಕ್ಷ್ಮಣ‌ ಕೊಳ್ಳನ್ನವರ ಇದ್ದರು.