ಗ್ಯಾರಂಟಿ ಕುಂದು ಕೊರತೆ ಸಭೆ ನಡೆಸದೇ ಶಾಸಕ ಜೆ.ಟಿ. ಪಾಟೀಲ

ಕೆರೂರ: ಸಮೀಪದ ಫಕೀರಬೂದಿಹಾಳ ಗ್ರಾಮದಲ್ಲಿ ಗುರುವಾರ ಆಯೋಜಿಸಿದ್ದ ಗ್ಯಾರಂಟಿ ಕುಂದು ಕೊರತೆ ಸಭೆಗೆ ಸಾರ್ವಜನಿಕರು ಬಾರದ ಕಾರಣ ಶಾಸಕ ಜೆ.ಟಿ. ಪಾಟೀಲ ಅಧಿಕಾರಿಗಳನ್ನ ತರಾಟೆಗೆ ತೆಗೆದುಕೊಂಡರು.

‘ಸಭೆಯ ಆಯೋಜನೆ ಬಗ್ಗೆ ಸಾರ್ವನಿಕರಲ್ಲಿ ಸರಿಯಾಗಿ ಅರಿವು ಮೂಡಿಸಿಲ್ಲ. ಗ್ರಾಮ ಪಂಚಾಯಿತಿ  ವ್ಯಾಪ್ತಿಯಲ್ಲಿ 1,500 ಫಲಾನುಭವಿಗಳಿದ್ದಾರೆ. ಕೇವಲ 25 ಜನರು ಮಾತ್ರ ಬಂದಿದ್ದಾರೆ. ನೀವು ಜವಾಬ್ದಾರಿಯಿಂದ ಕೆಲಸ ಮಾಡಲು ಬಂದಿಲ್ಲ. ಕೇವಲ ಸಂಬಳ ತೆಗೆದುಕೊಂಡು ಹೋಗಲು ಮಾತ್ರ ಬಂದಿದ್ದೀರಿ’ ಎಂದು ಕಿಡಿ ಕಾರಿದರು.

ಅಲ್ಲಿಯೇ ಜಿಲ್ಲಾಧಿಕಾರಿಗೆ ದೂರವಾಣಿ ಕರೆ ಮಾಡಿದ ಅವರು, ‘ಅಧಿಕಾರಿಗಳು ಇಲ್ಲಿ ಸರಿಯಾಗಿ ಕೆಲಸ ಮಾಡುತ್ತಿಲ್ಲ. ಗ್ರಾಮ ಪಂಚಾಯಿತಿ ಪಿಡಿಒ, ತಾಲ್ಲೂಕು ಪಂಚಾಯಿತಿ ಇಒ, ತಹಶಿಲ್ದಾರ್, ಸಿಡಿಪಿಒ ಅವರ ವಿರುದ್ಧ ನೋಟಿಸ್‌ ಜಾರಿ ಮಾಡಿ ಶಿಸ್ತಿನ ಕ್ರಮ ಕೈಗೊಳ್ಳಿ’ ಎಂದು ಹೇಳಿದರು. ಸಭೆ ನಡೆಸದೇ ಹಾಗೆಯೇ ಹೊರಟು ಹೋದರು.