ಬಾಗಲಕೋಟೆ | ಸುಲಿಗೆ: ಮೂವರ ಬಂಧನ

ಬಾಗಲಕೋಟೆ: ನವನಗರದ ಸೆಕ್ಟರ್ ನಂ.76ರಲ್ಲಿ ವಾಕಿಂಗ್‌ ಮಾಡುತ್ತಿದ್ದವರೊಬ್ಬರನ್ನು ಹೆದರಿಸಿ ಬಂಗಾರದ ಆಭರಣ ಕಳವು ಮಾಡಿದ್ದ ಮೂವರು ಆರೋಪಿಗಳನ್ನು ನವನಗರ ಪೊಲೀಸ್ ಠಾಣೆ ಸಿಬ್ಬಂದಿ ಬಂದಿಸಿದ್ದಾರೆ.

ಸಂಜೀವ ಭಜಂತ್ರಿ, ಚೇತನ ನಿಂಬರಗಿ ಜೊತೆಗೆ ಕಾನೂನು ಸಂಘರ್ಷಕ್ಕೊಳಗಾದ ಬಾಲಕನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಸುಲಿಗೆ ಮಾಡಿರುವುದು ಗೊತ್ತಾಗಿದೆ.

ಸಿಸಿಟಿವಿ ಕ್ಯಾಮೆರಾದ ಪರಿಶೀಲನೆ ಮಾಡಿದಾಗ ಆರೋಪಿಗಳ ಸುಳಿವು ಸಿಕ್ಕಿತ್ತು. ತನಿಖೆ ತೀವ್ರಗೊಳಿಸಿದಾಗ ಆರೋಪಿಗಳು ಸಿಕ್ಕಿಬಿದ್ದಿದ್ದಾರೆ. ಅವರಿಂದ 13 ಗ್ರಾಂ ಬಂಗಾರ, ಒಂದು ಸಾವಿರ ರೂಪಾಯಿ, ಮೂರು ಮೊಬೈಲ್‌, ಕಾರು, ಡಮ್ಮಿ ಪಿಸ್ತೂಲ್‌, ಮಚ್ಚು, ತಲವಾರ ವಶಪಡಿಸಿಕೊಳ್ಳಲಾಗಿದೆ.

ಸಿಪಿಐ ಆರ್‌.ಎಸ್‌. ಬಿರಾದಾರ, ಪಿಎಸ್‌ಐ ಕುಮಾರ ಹಿತ್ತಲಮನಿ, ಎಸ್‌.ಪಿ. ನಿಂಗನೂರ, ಎಸ್‌.ಬಿ. ನಿಂಗೊಳ್ಳಿ, ಪ್ರಕಾಶ ನಾಯಕ ಮತ್ತಿತರರು ತನಿಖಾ ತಂಡದಲ್ಲಿದ್ದರು.