ತೇರದಾಳ | ಅಖಂಡತೆಗೆ ಧಕ್ಕೆ ಬಂದರೆ ಐಕ್ಯತೆಯಿಂದ ಪ್ರತಿಭಟಿಸಿ–ಶಾಸಕ ಸಿದ್ದು ಸವದಿ

ತೇರದಾಳ: ‘ದೇಶದ ಅಖಂಡತೆಗೆ ಧಕ್ಕೆಯಾಗುವ ಸಂದರ್ಭ ಬಂದರೆ ನಾವು ನಮ್ಮ ಐಕ್ಯತೆಯ ಮೂಲಕ ಪ್ರತಿಭಟಿಸಬೇಕು’ ಎಂದು ಶಾಸಕ ಸಿದ್ದು ಸವದಿ ಹೇಳಿದರು.

ಇಲ್ಲಿ ಮಹಾತ್ಮಾ ಗಾಂಧಿ ಕ್ರೀಡಾಂಗಣದಲ್ಲಿ ತಾಲ್ಲೂಕಾಡಳಿತ ಸೋಮವಾರ ಹಮ್ಮಿಕೊಂಡಿದ್ದ ಗಣರಾಜ್ಯೋತ್ಸವದ ಅಂಗವಾಗಿ ಧ್ವಜಾರೋಹಣ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಧ್ವಜಾರೋಹಣ ನೆರವೇರಿಸಿ ಮಾತನಾಡಿದ ತಹಶೀಲ್ದಾರ್ ವಿಜಯಕುಮಾರ ಕಡಕೋಳ, ‘ಸಂವಿಧಾನವೆಂಬ ಪ್ರಬಲ ಅಸ್ತ್ರ ನಮ್ಮದಾಗಿದ್ದು ಅದನ್ನು ಪರಿಪಾಲಿಸುವ ಮೂಲಕ ಮಾದರಿ ರಾಷ್ಟ್ರವನ್ನು ನಿರ್ಮಿಸೋಣ’ ಎಂದರು.

ವಿವಿಧ ಕ್ಷೇತ್ರದಲ್ಲಿ ಸಾಧನೆ ಮಾಡಿದ ಸಾಧಕರನ್ನು ಸತ್ಕರಿಸಲಾಯಿತು. ಧ್ವಜ ಹಸ್ತಾಂತರ, ಧ್ವಜವಂದನೆ ಸ್ವೀಕಾರ ಜರುಗಿತು. ವಿವಿಧ ಶಾಲೆಯ ಮಕ್ಕಳಿಂದ ಪರೇಡ್ ಪ್ರದರ್ಶನ, ಛದ್ಮವೇಷ, ನೃತ್ಯ ಪ್ರದರ್ಶನ ಜರುಗಿತು. ಉಪತಹಶೀಲ್ದಾರ್ ಸಂಗಮೇಶ ಕಾಗಿ, ಕಂದಾಯ ನಿರೀಕ್ಷಕ ಪ್ರಕಾಶ ಮಠಪತಿ, ಉಪನೋಂದಣಾಧಿಕಾರಿ ಎಸ್.ಪಿ.ಮುತ್ತಪ್ಪಗೋಳ, ಪುರಸಭೆ ಮುಖ್ಯಾಧಿಕಾರಿ ಎಫ್.ಬಿ.ಗಿಡ್ಡಿ, ಠಾಣಾಧಿಕಾರಿ ಶಿವಾನಂದ ಸಿಂಗನ್ನವರ, ಶಿಕ್ಷಣ ಇಲಾಖೆ ಅಧಿಕಾರಿಗಳು, ನಿವೃತ್ತ ಸೈನಿಕರು, ವಿವಿಧ ಶಾಲೆಯ ಶಿಕ್ಷಕರು, ಮಕ್ಕಳು, ಮುಖಂಡರು ಪಾಲ್ಗೊಂಡಿದ್ದರು.