ಕಂಪ್ಲಿ: ಕೊಟ್ಯಂತರ ಹಣ ವೆಚ್ಚವಾದರು ಬದಲಾಗದ ಐತಿಹಾಸಿಕ ಸೋಮಪ್ಪ ಕೆರೆ ಚಹರೆ

ಕಂಪ್ಲಿ: ಪಟ್ಟಣದ ಜನನಿಬಿಡ ಪ್ರದೇಶದಲ್ಲಿರುವ ಐತಿಹಾಸಿಕ ಸೋಮಪ್ಪ ಕೆರೆ ಪುನಶ್ಚೇತನಕ್ಕೆ ದಶಕಗಳಿಂದ ಕೊಟ್ಯಂತರ ರೂಪಾಯಿ ಹಣ ವ್ಯಯಿಸುತ್ತಿದ್ದರೂ ಚಹರೆ ಬದಲಾಗುತ್ತಿಲ್ಲ.

ಒಂದೆಡೆ ಕೆರೆ ಪ್ರದೇಶ ಅಭಿವೃದ್ಧಿಯಾಗುತ್ತಿದ್ದರೆ, ಮತ್ತೊಂದೆಡೆ ಕೆಲ ಕಿಡಿಗೇಡಿಗಳು ಹಾಳು ಮಾಡುತ್ತಿದ್ದಾರೆ. ನಿರ್ವಹಣೆ ಕೊರತೆ ಈ ಸ್ಥಳದಲ್ಲಿ ಎದ್ದು ಕಾಣುತ್ತದೆ.

48 ಎಕರೆ ವ್ಯಾಪಿಸಿರುವ ಕೆರೆ ಜಾಗದ ಉದ್ಯಾನ ಪಕ್ಕದಲ್ಲಿ ವಿಶೇಷ ಬಸ್‍ನಲ್ಲಿ ವಿಹಾರಿಗಳ ಜ್ಞಾನಾರ್ಜನೆಗೆ ಆರಂಭಿಸಿದ್ದ ಸಂಚಾರಿ ಗ್ರಂಥಾಲಯ ಪ್ರಮುಖ ಆಕರ್ಷಣೆಯಾಗಿ ಓದುಗರನ್ನು ಕೈಬೀಸಿ ಕರೆಯುತ್ತಿತ್ತು. ಕೆಲ ಕಿಡಿಗೇಡಿಗಳ ಕೆಂಗಣ್ಣಿಗೆ ಬಸ್ ಇಂದು ಸೊರಗಿದೆ. ಅದರಲ್ಲಿದ್ದ ಮೌಲ್ಯಯುತ ಪುಸ್ತಕಗಳನ್ನು ಹೊತ್ತೊಯ್ಯುವುದರ ಜೊತೆಗೆ ಬಸ್‍ನ ಕಿಟಕಿ, ಬಾಗಿಲುಗಳನ್ನು ಕಿತ್ತು ಹಾಕಿದ್ದು, ಸದ್ಯ ಬಸ್ ಹಾಳು ಸುರಿಯುತ್ತಿದೆ.

ಇನ್ನು ಕೆಲವರು ಉದ್ಯಾನದಲ್ಲಿ ಅಳವಡಿಸಿದ್ದ ಉಯ್ಯಾಲೆ, ಫೈಬರ್ ಜಾರು ಆಟಿಕೆ ಹಾನಿ ಮಾಡಿದ್ದಾರೆ. ಕುಳಿತುಕೊಳ್ಳಲು ಅಳವಡಿಸಿದ್ದ ನುಣುಪಾದ ಕಲ್ಲಿನ ಬೆಂಚ್‍ಗಳ ಬಂಡೆಗಳನ್ನು ಕೆಡವಿದ್ದಾರೆ. ಆಟಿಕೆ ಸಾಮಾನು ಅಳವಡಿಸಿರುವ ಸ್ಥಳದಲ್ಲಿ ಮಳೆ ನೀರು ನಿಲ್ಲುವುದರಿಂದ ಮಕ್ಕಳು ಅಲ್ಲಿಗೆ ತೆರಳಲು ಕಷ್ಟಪಡುತ್ತಾರೆ.

ಪ್ರವೇಶ ದ್ವಾರದ ಬೃಹತ್ ಕಬ್ಬಿಣದ ಗೇಟ್ ವೆಲ್ಡಿಂಗ್ ಕಿತ್ತಿರುವುದರಿಂದ ಪ್ರವೇಶ ಸದಾ ತೆರೆದಿರುತ್ತದೆ. ಮಳೆಗಾಲ ಆರಂಭವಾಗಿರುವುದರಿಂದ ಅಲ್ಲಲ್ಲಿ ಹಸಿರು ಕಳೆ ಅಧಿಕವಾಗಿ ವಿಷಜಂತುಗಳು, ಹುಳು ಹುಪ್ಪಡಿ ಹಾವಳಿ ಸಾಮಾನ್ಯವಾಗಿದೆ. ಅದರಿಂದ ಇತ್ತೀಚೆಗೆ ಕೆರೆ ಸುತ್ತಲು ವಾಯುವಿಹಾರ ಮಾಡುವವರು ಭೀತಿಯಿಂದ ಓಡಾಡಬೇಕಿದೆ.

ವಾಯುವಿಹಾರಿಗಳಿಗೆ ವಿಕಾರ: ಕೆರೆ ಸುತ್ತ ಸಿಸಿ ಕ್ಯಾಮೆರಾ, ಕಾವಲುಗಾರ ಇಲ್ಲದ ಕಾರಣ ರಾತ್ರಿಯಾಗುತ್ತಿದ್ದಂತೆ ಅಕ್ರಮ ಚಟುವಟಿಕೆ, ಮದ್ಯವ್ಯಸನಿಗಳ ಹಾವಳಿ ಶುರುವಾಗುತ್ತದೆ. ಕುಡಿದ ಮತ್ತಿನಲ್ಲಿ ಕೆಲವರು ವಿಹಾರಪಥದ ಕಡೆ ಬಾಟಲ್‍ಗಳನ್ನು ಬೇಕಾಬಿಟ್ಟಿ ಎಸೆಯುವುದರಿಂದ ವಾಯುವಿಹಾರಿಗಳಿಗೆ ವಾಯುವಿಕಾರವಾಗಿ ಗೋಚರಿಸುತ್ತದೆ.

ಇನ್ನು ಅಮವಾಸ್ಯೆ, ನಿಗದಿತ ದಿನಗಳ ರಾತ್ರಿ ಕೆಲವರು ವಿಹಾರಪಥದಲ್ಲಿ ವಾಮಾಚಾರ ಮಾಡುತ್ತಿದ್ದು, ವಾಯು ವಿಹಾರಿಗಳು ರೋಸಿ ಹೋಗಿದ್ದಾರೆ. ಈಚೆಗೆ ಕೆರೆ ಆವರಣದಲ್ಲಿ ಆಂದ್ರಪ್ರದೇಶದ ಮೂಲದ ಯುವಕನ ಕೊಲೆ ನಡೆದಿದ್ದು, ನಿತ್ಯ ವಿಹರಿಸುವವರಿಗೆ ಅಂಜಿಕೆಯು ಆರಂಭವಾಗಿದೆ. ಈ ಕಾರಣದಿಂದ ಗುಂಪು ಗುಂಪಾಗಿ ವಾಯುವಿಹಾರಕ್ಕೆ ಬರುವುದನ್ನು ರೂಢಿಸಿಕೊಂಡಿದ್ದಾರೆ.

ಕೆರೆ ಅಭಿವೃದ್ಧಿಗೆ ಕೊಟ್ಯಂತರ ಹಣ ಮಂಜೂರು

ಮೊದಲ ಹಂತದಲ್ಲಿ ಕೆರೆ ದಂಡೆಯಲ್ಲಿ ಅಕ್ರಮವಾಗಿ ನಿರ್ಮಿಸಿದ್ದ ಮನೆಗಳನ್ನು ತೆರವುಗೊಳಿಸಲಾಯಿತು. ಬಳಿಕ 2009ರಲ್ಲಿ ಅಂದಿನ ಸರ್ಕಾರ ಕೆರೆ ಅಭಿವೃದ್ಧಿಗೆ ₹8.80ಕೋಟಿ ಮಂಜೂರು ಮಾಡಿತ್ತು. ಮತ್ತೆ ಹೆಚ್ಚುವರಿಯಾಗಿ ₹1.30ಕೋಟಿ ಮತ್ತು ಶಾಸಕರು ₹70ಲಕ್ಷ ಮಂಜೂರು ಮಾಡಿದ್ದು ಕೆರೆ ಸುತ್ತಲೂ ರಕ್ಷಣಾ ಸರಳು ಅಳವಡಿಕೆ ಸೇರಿದಂತೆ ಬಾಕಿ ಕಾಮಗಾರಿ ಮುಂದುವರಿದಿದೆ.