ಹರಪನಹಳ್ಳಿ | ಗಣೇಶ ವಿಸರ್ಜನೆ: ಮುಸ್ಲಿಂ ಮುಖಂಡರಿಗೆ ಸನ್ಮಾನ

ಹರಪನಹಳ್ಳಿ : ಪಟ್ಟಣ ಸೇರಿ ಹಲವೆಡೆ ಪ್ರತಿಷ್ಠಾಪಿಸಿದ್ದ ಗೌರಿ ಗಣೇಶ ಮೂರ್ತಿಗಳ ವಿಸರ್ಜನೆ ಬುಧವಾರ ಅದ್ದೂರಿಯಾಗಿ ಜರುಗಿತು.

ಬಾಪೂಜಿ ನಗರದಿಂದ ತೆರೆದ ವಾಹನದಲ್ಲಿ ಗಣೇಶ ಮೂರ್ತಿ ಮೆರವಣಿಗೆ ಬಾಣಗೆರೆಯ ಗರಡಿ ಮುಂಭಾಗದ ಮೂಲಕ ಹಾದು ಹೋಗುವಾಗ ಡಾ.ಬಿ.ಆರ್.ಅಂಬೇಡ್ಕರ್ ಸಂಘ, ಮಾದಿಗ ಸಮಾಜ ಮತ್ತು ಮುಸ್ಲಿಂ ಸಮಾಜಗಳ ಮುಖಂಡರು ಪೋಲಿಸ್ ಅಧಿಕಾರಿಗಳ ಉಪಸ್ಥಿತಿಯಲ್ಲಿ ಪರಸ್ಪರ ಸನ್ಮಾನಿಸಿಕೊಂಡು ಗೌರಿ ಗಣೇಶ ಹಬ್ಬದ ಸಂಭ್ರಮ ವಿನಿಮಯ ಮಾಡಿಕೊಂಡಿದ್ದು ವಿಶೇಷವಾಗಿತ್ತು.

ಕಾರ್ಯಕ್ರಮ ವೀಕ್ಷಣೆಗೆ ನೂರಾರು ಮಹಿಳೆಯರು ನೆರೆದಿದ್ದರು. ಗೌಳೇರ ಓಣಿಯ ರಸ್ತೆಯಲ್ಲಿ ಪ್ರತಿಷ್ಟಾಪಿಸಿದ್ದ ಗಣೇಶನನ್ನು ಹಾಲು ಮಾರುವ ಆಟೊದಲ್ಲಿ ಮೆರವಣಿಗೆ ಕರೆದೊಯ್ದು ಗೌಳಿಗರ ಕುಟುಂಬಗಳು ಗಮನ ಸೆಳೆದವು. 100ಕ್ಕೂ ಹೆಚ್ಚು ಮೂರ್ತಿಗಳ ಮೆರವಣಿಗೆಯಲ್ಲಿ ಡಿಜೆ ಸೌಂಡ್ ಗಳಿಂದ ಹೊರಹೊಮ್ಮುತ್ತಿದ್ದ ಸಿನಿಮಾ ಹಾಡುಗಳಿಗೆ ಯುವಕರು ಹೆಜ್ಜೆ ಹಾಕಿದರು.