ತೆಕ್ಕಲಕೋಟೆ | 4 ಮನೆ ಕುಸಿತ: ಬೆಳೆ ಹಾನಿ

ತೆಕ್ಕಲಕೋಟೆ: ಸೋಮವಾರ ರಾತ್ರಿಯಿಂದ ಮಂಗಳವಾರ ಬೆಳಿಗ್ಗೆವರೆಗೆ ಸುರಿದ ಮಳೆಯಿಂದಾಗಿ ತೆಕ್ಕಲಕೋಟೆ ಹೋಬಳಿ ವ್ಯಾಪ್ತಿಯಲ್ಲಿ ವಿದ್ಯುತ್ ಕಂಬಗಳು ಮುರಿದ ಹಾಗೂ ಮನೆ ಕುಸಿದ ಘಟನೆಗಳು ನಡೆದಿವೆ.

ತೆಕ್ಕಲಕೋಟೆ ಪಟ್ಟಣದ 5ನೇ ವಾರ್ಡಿನ ಮುಂದಲಮನೆ ಶಾಂತಮ್ಮ, ಹಳೆಕೋಟೆ ಗ್ರಾಮದ ನಾಗಮ್ಮ ಇವರ ವಾಸದ ಮನೆ ಬಿದ್ದಿದೆ. ಸಿರಿಗೇರಿ ಗ್ರಾಮದಲ್ಲಿ ಎರಡು ಮನೆ ಬಿದ್ದಿವೆ. ಈ ಕುರಿತು ಪಿಡಿಒ ಮತ್ತು ಎಂಜಿನಿಯರ್ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.

ಉಪ್ಪಾರ ಹೊಸಳ್ಳಿ ಗ್ರಾಮದಲ್ಲಿ ಎರಡು ವಿದ್ಯುತ್ ಕಂಬ ಮುರಿದಿದ್ದು ಹಳೇಕೋಟೆ ಗ್ರಾಮದಲ್ಲಿ ಟ್ರಾನ್ಸ್ ಫಾರ್ಮರ್ ಸುಟ್ಟಿದೆ ಎಂದು ಜೆಇ ಯಲ್ಲಪ್ಪ ತಿಳಿಸಿದ್ದಾರೆ.

ಹಾಗಲೂರು, ಅರಳಿಗನೂರು, ಉಪ್ಪಾರ ಹೊಸಳ್ಳಿ ಎಂ.ಸುಗೂರು, ಮುದ್ದಟನೂರು ಗ್ರಾಮಗಳಲ್ಲಿ ಜೋಳ, ಹತ್ತಿ ಸಜ್ಜೆ ಹಾಗೂ ತೆಕ್ಕಲಕೋಟೆ ವ್ಯಾಪ್ತಿಯ ಭತ್ತದ ಗದ್ದೆಗಳಿಗೆ ಅಪಾರ ಪ್ರಮಾಣದ ನೀರು ನುಗ್ಗಿ ಬೆಳೆ ಹಾನಿ ಸಂಭವಿಸಿದೆ ಎಂದು ಗ್ರಾಮ ಲೆಕ್ಕಾಧಿಕಾರಿ ಶಿವರಾಜ ಎಸ್ ತಾಲ್ಲೂಕು ಆಡಳಿತಕ್ಕೆ ವರದಿ ಸಲ್ಲಿಸಿದ್ದಾರೆ.