ಹರಪನಹಳ್ಳಿ | 50 ದಿನವಾದರೂ ಬಿಡುಗಡೆಯಾಗದ ಹಾಲಿನ ಹಣ: ಹೈನುಗಾರರಿಗೆ ಸಂಕಷ್ಟ

ಹರಪನಹಳ್ಳಿ: ಪ್ರಾಕೃತ್ತಿಕ ವಿಕೋಪಗಳಿಂದ ಆಗುವ ನಷ್ಟ ತಪ್ಪಿಸಿಕೊಳ್ಳಲು ರೈತರು ವ್ಯವಸಾಯದ ಜೊತೆ ಹೈನುಗಾರಿಕೆ ಒಂದು ಭಾಗ ಮಾಡಿಕೊಂಡಿದ್ದಾರೆ, ಆದರೆ ಹಾಲು ಖರೀದಿಸುವ ಸಂಸ್ಥೆ 50 ದಿನದ ಹಾಲಿನ ಹಣ ಬಿಡುಗಡೆ ಮಾಡದ ಪರಿಣಾಮ ಹಾಲು ಉತ್ಪಾದಕ ರೈತರು ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ರಾಯಚೂರು, ಬಳ್ಳಾರಿ, ಕೊಪ್ಪಳ ಮತ್ತು ವಿಜಯನಗರ ಹಾಲು ಒಕ್ಕೂಟ (ರಾ.ಬ.ಕೊ.ವಿ)ವು ನಾಲ್ಕು ಜಿಲ್ಲೆಗಳಿಂದ ನಿತ್ಯ ಒಟ್ಟು 2.35 ಲಕ್ಷ ಹಾಲು ಖರೀದಿಸುತ್ತದೆ ನಾಲ್ಕು ಜಿಲ್ಲೆಗಳ ಪೈಕಿ ವಿಜಯನಗರ ಜಿಲ್ಲೆ ಮೊದಲ ಸಾಲಿನಲ್ಲಿದ್ದು 1,18,453 ಲೀಟರ ಹಾಲು ಖರೀದಿಸುತ್ತಾರೆ. ಉಳಿದ ಕೊಪ್ಪಳ ಜಿಲ್ಲೆ 73,889, ಬಳ್ಳಾರಿ ಜಿಲ್ಲೆ 13‌,559, ರಾಯಚೂರು ಜಿಲ್ಲೆ 30,045 ಒಟ್ಟು 2.35,956 ಲೀಟರ್‌ ಹಾಲು ಒಂದು ದಿನಕ್ಕೆ ಶೇಖರಣೆ ಆಗುತ್ತದೆ.

ವಿಜಯನಗರ ಜಿಲ್ಲೆಯ ಪೈಕಿ ಹರಪನಹಳ್ಳಿಯಿಂದ ಪ್ರತಿ ದಿವಸ 37 ಸಾವಿರ ಲೀಟರ್‌ ಹಾಲು ರಾಬಕೊವಿಗೆ ಹೋಗುತ್ತದೆ. ಈ ಪೈಕಿ ಅತೀ ಹೆಚ್ಚು ರಾಮಘಟ್ಟ ಗ್ರಾಮದಿಂದ ಪ್ರತಿದಿನ 7 ಸಾವಿರ ಲೀಟರ್, ಕಮತ್ತಹಳ್ಳಿ 6 ಸಾವಿರ ಲೀಟರ್ ಉತ್ಪಾದನೆ ಇದ್ದು, ಎರಡು ಗ್ರಾಮಗಳು ಗಮನ ಸೆಳೆಯುತ್ತಿವೆ.

ರಾಬಕೊವಿ ಸಂಸ್ಥೆ ಗ್ರಾಹಕರಿಗೆ ಪ್ರತಿ ಲೀಟರ್ ಗೆ ಸರಾಸರಿ ₹ 34 ನಿಗಧಿಪಡಿಸಿದೆ. ಗುಣಮಟ್ಟದ ಹಾಲು ಆಗಿದ್ದರೆ, ಹೆಚ್ಚಿನ ಬೆಲೆ ಕೊಟ್ಟು ಖರೀದಿಸುತ್ತಾರೆ. ಅ.11 ರಿಂದ ಅ.20ರ ವರಗಿನ 10 ದಿನದ ₹ 8 ಕೋಟಿ ಹಣ ಅ.27ಕ್ಕೆ ಪಾವತಿಯಾಗಿದೆ. ಅ.21 ರಿಂದ ಡಿ.7ರ ವರೆಗೆ ಅಂದಾಜು ₹ 41ಕೋಟಿ ಹಣವನ್ನು ರಾಬಕೊವಿ ಬಾಕಿ ಉಳಿಸಿಕೊಂಡಿದೆ. ಇದಕ್ಕೆ ಜೊತೆಯಾಗಿ ಸರ್ಕಾರ ಪ್ರತಿ ಲೀಟರ್ ಗೆ ₹ 5 ರಂತೆ ಪಾವತಿಸುವ ಸಹಾಯಧನವೂ ಆಗಸ್ತ್‌ ತಿಂಗಳವರೆಗೆ ಗ್ರಾಹಕರಿಗೆ ಪಾವತಿಸಲಾಗಿದೆ. ಸೆಪ್ಟೆಂಬರ್, ಅಕ್ಟೊಬರ್ ಹಾಗೂ ನವೆಂಬರ್ ತಿಂಗಳವರೆಗೆ ಸರ್ಕಾರವೂ ಬಾಕಿ ಉಳಿಸಿಕೊಂಡಿದೆ. ಹಾಲು ಖರೀದಿ ಹಣ ಪ್ರತಿ 10 ದಿನಕ್ಕೊಮ್ಮೆ ಪಾವತಿಸುವ ನಿಯಮವಿತ್ತು, ಆದರೆ ಅದು ಸಹ ಈಗ ಪಾಲನೆ ಆಗದ ಪರಿಣಾಮ, ಬರೊಬ್ಬರಿ 50 ದಿನ ಹಣವನ್ನು ರಾಬಕೊವಿ ಬಾಕಿ ಉಳಿಸಿಕೊಂಡಿರುವುದನ್ನು ಹಾಲು ಉತ್ಪಾದಕರ ಸಹಕಾರ ಸಂಘಗಳ ಮೂಲಗಳು ಖಚಿತಪಡಿಸಿವೆ.