ಆನೇಕಲ್‌ ಪುರಸಭೆ ಅವಧಿ ಮುಕ್ತಾಯ: ನಗರಸಭೆಯಾಗಿ ಮೇಲ್ದರ್ಜೆಗೆ ಒತ್ತಾಯ

ಆನೇಕಲ್: ಪಟ್ಟಣದ ಪುರಸಭೆಯ ಅವಧಿಯು ಮುಕ್ತಾಯವಾಗಿದ್ದು, ಮುಂಬರುವ ಚುನಾವಣೆ ವೇಳೆಗೆ ನಗರಸಭೆಯಾಗಿ ಮೇಲ್ದರ್ಜೆ ಅಥವಾ ಗ್ರೇಟರ್‌ ಬೆಂಗಳೂರು ಪ್ರಾಧಿಕಾರ (ಜಿಬಿಎ) ವ್ಯಾಪ್ತಿಗೆ ಸೇರಿಸಬೇಕೆಂದು ಜನರು ಒತ್ತಾಯಿಸಿದ್ದಾರೆ.

ಬೆಂಗಳೂರು ನಗರ ಜಿಲ್ಲೆ ವ್ಯಾಪ್ತಿಯಲ್ಲಿ ಆನೇಕಲ್‌ ಪುರಸಭೆ ಹಳೆದಾಗಿದ್ದು, ಸ್ವಾತಂತ್ರ್ಯ ಪೂರ್ವದಿಂದ ಇತಿಹಾಸ ಇದೆ. 1946ರಲ್ಲಿ ಆರಂಭವಾಯಿತು. ರಾಜ್ಯ ರಾಜಧಾನಿಗೆ ಸಮೀಪ ಇದ್ದರೂ, ಅಂದಿನಿಂದಲೂ ಮೇಲ್ದರ್ಜೆಗೇರದೆ ಪುರಸಭೆಯಾಗಿಯೇ ಉಳಿದಿದೆ. 

ಅಭಿವೃದ್ಧಿ ಕೆಲಸಗಳು ಹೆಚ್ಚಾಗಿ, ಅನುದಾನ ಹೆಚ್ಚಿನ ಪ್ರಮಾಣದಲ್ಲಿ ಸಿಗಬೇಕೆಂಬ ಉದ್ದೇಶದಿಂದ ನಗರಸಭೆಯಾಗಿ ಮೇಲ್ದರ್ಜೆಗೇರಿಸಬೇಕೆಂಬ ದಶಕಗಳ ಬೇಡಿಕೆ ಈಗಾಲಾದರೂ ಈಡೇರಬೇಕು. ನಗರಸಭೆ ಅಥವಾ ಗ್ರೇಟರ್‌ ಬೆಂಗಳೂರು ಪ್ರಾಧಿಕಾರದ ವ್ಯಾಪ್ತಿಗೆ ಸೇರ್ಪಡೆಯಾಗಬೇಕೆಂಬುದು ಸ್ಥಳೀಯರ ಒತ್ತಾಯ.

ಆನೇಕಲ್‌ ಪುರಸಭೆಯು ಬೆಂಗಳೂರಿನ ಸೆರಗಿನಲ್ಲಿದ್ದು ಜನಸಂಖ್ಯೆಯು ದಿನೇ ದಿನೇ ಹೆಚ್ಚಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಪುರಸಭೆಯು ಮೇಲ್ದರ್ಜೆಗೇರುವುದರಿಂದ ಸಾರ್ವಜನಿಕರಿಗೆ ಹೆಚ್ಚು ಸೌಲಭ್ಯಗಳು ದೊರೆಯುತ್ತದೆ. ಅನುದಾನ ಹೆಚ್ಚಾಗುತ್ತದೆ. ತಾಲ್ಲೂಕಿನ ಐದು ನಗರಸ್ಥಳೀಯ ಸಂಸ್ಥೆಗಳಿದ್ದು, 2016ರಲ್ಲಿ ಹೆಬ್ಬಗೋಡಿ, ಬೊಮ್ಮಸಂದ್ರ, ಅತ್ತಿಬೆಲೆ, ಜಿಗಣಿ ಗ್ರಾಮ ಪಂಚಾಯಿತಿಗಳು ನಗರಸಭೆ ಮತ್ತು ಪುರಸಭೆಯಾಗಿ ಮೇಲ್ದರ್ಜೇಗೇರಿತ್ತು. ಆದರೆ ಇದರಿಂದ ಆನೇಕಲ್‌ ಪುರಸಭೆ ವಂಚಿತವಾಗಿತ್ತು.