ದಿತ್ವಾಕ್ಕೆ ‘ನಡುಗಿದ’ ಜನ–ಜಾನುವಾರು

ದೊಡ್ಡಬಳ್ಳಾಪುರ: ದ್ವಿತಾ ಚಂಡಮಾರುತದಿಂದ ಜಿಲ್ಲೆಯಲ್ಲಿ ಶೀತಗಾಳಿ ಹೆಚ್ಚಾಗಿದ್ದು, ಶೀತಗಾಳಿಗೆ ಜನ–ಜಾನುವಾರುಗಳು ತತ್ತರಿಸಿದ್ದು, ಮನೆಯಿಂದ ಹೊರ ಬರಲು ಹೆದರುತ್ತಿದ್ದಾರೆ. 25–26 ಇದ್ದ ಕನಿಷ್ಠ ತಾಪಮಾನ 18 ಡಿಗ್ರಿಗೆ ಕುಸಿದಿದೆ.

ಶನಿವಾರ ಸಂಜೆಯಿಂದಲೇ ಜಿಲ್ಲೆಯಲ್ಲಿ ಶೀತಗಾಳಿ ಆರಂಭವಾಗಿತ್ತು. ಭಾನುವಾರ ಬೆಳಗ್ಗೆಯಿಂದ ಶೀತಗಾಳಿಯ ಜೊತೆಗೆ ತುಂತುರು ಮಳೆಯು ಪ್ರಾರಂಭವಾಗಿದೆ. ಶೀತಗಾಳಿ, ತುಂತುರು ಮಳೆಯಿಂದ ಜನ, ಜಾನುವಾರುಗಳು ಮನೆಯಲ್ಲೇ ಉಳಿಯುವಂತಾಗಿತ್ತು. ನಗರ ಪ್ರದೇಶದ ಹಣ್ಣು, ತರಕಾರಿ ಮಾರುಕಟ್ಟೆಯಲ್ಲಿ ವ್ಯಾಪಾರವು ಕಡಿಮೆಯಾಗಿತ್ತು. ಮೋಡ ಮುಸುಕಿದ್ದರಿಂದ ಮಧ್ಯಾಹ್ನ 1 ಗಂಟೆ ಸಮಯದಲ್ಲೂ ಸಹ ಸಂಜೆ 6 ಗಂಟೆಯಂತೆ ಕತ್ತಲಿನ ವಾತಾವರಣದ ಜೊತೆಗೆ ಜನ ಸಂಚಾರವು ಕ್ಷೀಣಿಸಿತ್ತು.

ಮಳೆ ಬಿದ್ದರೆ ರಾಗಿ ಬೇಳೆ ನಾಶ:ತಾಲ್ಲೂಕಿನಲ್ಲಿ ಎರಡು ವಾರಗಳಿಂದಲೂ ರಾಗಿ ಹೊಲಗಳ ಕೊಯ್ಲು ಆರಂಭವಾಗಿತ್ತು. ಯಂತ್ರಗಳ ಮೂಲಕ ರಾಗಿ ಕಟಾವು ಮಾಡಿದ್ದರಿಂದ ರಾಗಿ ಮನೆ ಸೇರಿವೆ. ಆದರೆ ಜಾನುವಾರುಗಳಿಗೆ ಬೇಕಿದ್ದ ರಾಗಿ ಹಲ್ಲು ಇನ್ನು ಒಣಗಬೇಕಿದ್ದರಿಂದ ಜಮೀನುಗಳಲ್ಲೇ ಬಿಡಲಾಗಿತ್ತು. ಈಗ ಶೀತಗಾಳಿ, ತುಂತುರು ಮಳೆಯಿಂದಾಗಿ ಕಟಾಗಿದ್ದ ಹುಲ್ಲು ನೆನೆಯುತ್ತಿದೆ. ಇನ್ನೂ ಕಟಾವು ಆಗದೇ ಇರುವ ರಾಗಿ ಹೊಲಗಳು ಗಾಳಿಗೆ ನೆಲಕಚ್ಚಿದ್ದು ಇದೇ ರೀತಿ ಮೋಡ, ಮಳೆ ಮುಂದುವರೆದರೆ ರಾಗಿ ಹೊಲದಲ್ಲೇ ಉಳಿದು ಕೊಳೆತು ಮೊಳಕೆ ಬರುವ ಆತಂಕ ಮೂಡಿದೆ ಎನ್ನುತ್ತಾರೆ ಮೇಲಿನನಾಯಕರಂಡಹಳ್ಳಿ ರೈತ ರಾಮಾಂಜಿನಪ್ಪ.

ದಿತ್ವಾ ಚಂಡಮಾರುತ ಶೀತಗಾಳಿಯಿಂದಾಗಿ ಟೊಮೆಟೊ, ಬಯಲಿನಲ್ಲಿ ಬೆಳೆಯಲಾಗಿರುವ ಸೇವಂತಿಗೆ ಹೂವು, ಸೊಪ್ಪುಗಳು ಹಾಳಾಗಲಿದೆ. ಮಳೆ ಬರುವುದು ನಿಂತರು ಸಹ ಎರಡು ದಿನಗಳಿಂದ ಬೀಸಿರುವ ಶೀತಗಾಳಿಯ ಪ್ರಭಾವದಿಂದ ಟೊಮೆಟೊ, ಅವರೆ, ತೊಗರಿ,ದ್ರಾಕ್ಷಿ ಬೆಳೆಯಲ್ಲಿನ ಹೂವುಗಳು ಉದುರಿ ಹೋಗುವುದರಿಂದ ಇಳುವರಿ ಕುಸಿತವಾಗಲಿದೆ ಎನ್ನುತ್ತಾರೆ ತರಕಾರಿ ಬೆಳೆಗಾರ ವಾಸು.