ದೊಂಗ್ರ ಬಿದ್ದ ಹೊಸಕೋಟೆ ರಸ್ತೆಗಳು: ವಾಹನ ಸವಾರರ ಪರದಾಟ

ಹೊಸಕೋಟೆ: ರಸ್ತೆಯಲ್ಲಿ ಗುಂಡಿ ಇದಿಯೋ, ಗುಂಡಿಯೊಳಗೆ ರಸ್ತೆ ಇದಿಯೋ...!

ಇಂತಹದೊಂದು ಅಸಮಾಧಾನಿತ ಪ್ರಶ್ನೆ ಹೊಸಕೋಟೆ ಪ್ರಮುಖ ರಸ್ತೆಗಳಲ್ಲಿ ಸಂಚರಿಸಿದರೆ ಮೂಡುತ್ತದೆ. ನಗರದ ಸಂತೆಗೇಟ್ ಬಳಿಯ ರಾಷ್ಟೀಯ ಹೆದ್ದಾರಿ ಹಾದು ಹೋಗುವ ಸೇತುವೆ ಕೆಳಗೆ ಕೋಲಾರ ಸರ್ವಿಸ್ ರಸ್ತೆ, ಚಿಂತಾಮಣಿ ಕೆಡೆಗೆ ತೆರಳುವ ರಸ್ತೆ, ಮಾಲೂರು ರಸ್ತೆ ಸಂಪರ್ಕಿಸುವ ಮತ್ತು ಹೊಸಕೋಟೆ ಕಡೆಗೆ ಹೋಗುವ ಎರಡು ಬದಿಯಲ್ಲಿ ರಾಷ್ಟೀಯ ಹೆದ್ದಾರಿ ಸಂಪರ್ಕಿಸುವ ಸರ್ವಿಸ್ ರಸ್ತೆಗಳಲ್ಲಿ ಸಂಚಾರ ಸರ್ಕಸ್‌ ಮಾಡಿದಂತೆ.

ಇಲ್ಲಿ ಪ್ರತಿನಿತ್ಯ ಸಾವಿರಾರು ವಾಹನಗಳು ಸಂಚರಿಸುತ್ತವೆ. ಆದರೆ ಸೇತುವೆ ಕಳೆಗಿನ ವೃತ್ತದಲ್ಲಿ ಬೃಹತ್ ಪ್ರಮಾಣದಲ್ಲಿ ಗುಂಡಿಗಳು ಬಿದಿದ್ದು, ಮಳೆ ಸುರಿದಾಗ ಮಳೆ ಮತ್ತು ಚರಂಡಿ ಕೊಳಚೆ ಸಂಗ್ರಹವಾಗಿ ಹಳ್ಳವಾಗಿದ್ದು, ವಾಹನ ಸವಾರರನ್ನು ಅಪಾತಕ್ಕೆ ಆಹ್ವಾನಿಸುತ್ತದೆ.

ಹಲವು ವರ್ಷಗಳಿಂದ ಹದಗೆಟ್ಟ ರಸ್ತೆಯಲ್ಲೇ ಸಂಚರಿಸುತ್ತಿದ್ದು, ಆಡಳಿತ ವರ್ಗಕ್ಕೆ ಗುಂಡಿಮಯ ರಸ್ತೆ ಕಾಣದಾಗಿದೆ. ವಾಹನ ಸವಾರರು ಮಾತ್ರವಲ್ಲದೆ ಪಾದಚಾರಿಗಳು ಸಹ ವ್ಯಥೆ ಪಡುವಂತಾಗಿದೆ.

ನಿತ್ಯವೂ ಇಲ್ಲಿ ವಾಹನ ಸವಾರರು ಅಂಗೈಯಲ್ಲಿ ಜೀವ ಹಿಡಿದು ಸಂಚಾರ ಮಾಡಬೇಕಾದ ದುಸ್ಥಿತಿ ನಿರ್ಮಾಣವಾಗಿದೆ. ಮಳೆಗಾಲದಲ್ಲಂತೂ ವಾಹನ ಸವಾರರ ಜೀವ ಕೈಯಲ್ಲಿ ಹಿಡಿದು ಸಾಗಬೇಕಿದೆ.

ಸಂತೆಗೇಟ್ ಬಳಿಯೇ ಸರ್ಕಾರಿ ಆಸ್ಪತ್ರೆ ಇರುವ ಕಾರಣ ಪ್ರತಿನಿತ್ಯ ನೂರಾರು ಸಂಖೆಯಲ್ಲಿ ತಪಾಸಣೆ ಮತ್ತಿತರ ಕಾರಣಗಳಿಗೆ ಬರುತ್ತಾರೆ. 50 ಮೀ ಅಥವಾ 60 ಮೀ ವಿಸ್ತೀರ್ಣದ ಸರ್ಕಲ್ ಬಳಿ ಒಂದು ಬದಿಯಿಂದ ಇನ್ನೊಂದು ಬದಿಗೆ ವಾಹನಗಳು ತಲುಪಲು ಹರ ಸಾಹಸ ಪಡುತ್ತಿವೆ. ವಾಹನ ದಟ್ಟಣೆ ಉಂಟಾದರೆ ಕನಿಷ್ಠ 20 ನಿಮಿಷ ಹಿಡಿಯುತ್ತದೆ. ವಾಹನ ದಟ್ಟಣೆ ನಿಯಂತ್ರಣಕ್ಕೆ ಯಾವುದೇ ವ್ಯವಸ್ಥೆ ಇಲ್ಲದೆ ವಾಹನ ಸವಾರರು ಹಾಗೂ ಪದಾಚಾರಿಗಳು ಹೈರಾಣಾಗಿದ್ದಾರೆ.

ರೋಗಿಗಳನ್ನು ಚಿಂತಾಮಣಿ ಮತ್ತು ಮಾಲೂರು ಭಾಗಗಳಿಂದ ಹೊಸಕೋಟೆ ನಗರಕ್ಕೆ ಅಥವಾ ಬೆಂಗಳೂರಿಗೆ ಕರೆದ್ಯೊಯಲು ಸಂತೆಗೇಟ್ ಮೂಲಕವೇ ಹೋಗಬೇಕಿರುವ ಕಾರಣ ಈ ವೃತ್ತ ದಾಟುವುದೇ ದೊಡ್ಡ ಸವಾಲಾಗಿದೆ.