ಬೆಳಗಾವಿ: ಸಿಎಂ ಗುಣವಾದ ನಂತರ ಬಂತು ಸಂಪರ್ಕಿತರ ವರದಿ!

ಬೆಳಗಾವಿ: ಬೆಳಗಾವಿ ಲೋಕಸಭಾ ಕ್ಷೇತ್ರದ ಉಪ ಚುನಾವಣೆ ಪ್ರಚಾರಕ್ಕೆ ಬಂದಿದ್ದ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಅವರು ಕೋವಿಡ್ ಬಾಧಿತರಾಗಿ ಬೆಂಗಳೂರಿನಲ್ಲಿ ಚಿಕಿತ್ಸೆ ಪಡೆದು ಗುಣಮುಖರಾಗಿದ್ದಾರೆ. ಆದರೆ, ಅವರ ಪ್ರಾಥಮಿಕ ಸಂಪರ್ಕಕ್ಕೆ ಬಂದಿದ್ದ ಇಲ್ಲಿನ ಯುಕೆ27 ಹೋಟೆಲ್‌ನ 12 ಮಂದಿಗೆ ಕೋವಿಡ್ ದೃಢಪಟ್ಟಿರುವ ವರದಿ ಬುಧವಾರ ಬಂದಿದೆ.

ಏ.14 ಮತ್ತು 15ರಂದು ಮುಖ್ಯಮಂತ್ರಿ ಈ ಹೋಟಲ್‌ನಲ್ಲಿದ್ದರು. ಅವರ ಸಂಪರ್ಕಕ್ಕೆ ಬಂದ 40 ಮಂದಿಯ ಗಂಟಲು ಹಾಗೂ ಮೂಗಿನ ದ್ರವದ ಮಾದರಿಯನ್ನು ಏ. 16ರಂದು ಸಂಗ್ರಹಿಸಲಾಗಿತ್ತು. ಅವರ ವರದಿ ಬಹಳ ತಡವಾಗಿ ಬಂದಿದೆ. ಇವರ ಸಂಪರ್ಕಕ್ಕೆ ಬಂದವರಿಗೂ ಸೋಂಕು ಹರಡಿರುವ ಭೀತಿ ಎದುರಾಗಿದೆ.