ಹುಕ್ಕೇರಿ: ಸಂಭ್ರಮದ ಹೆಡಿಗೆ ಜಾತ್ರೆ ಸಂಪನ್ನ

ಹುಕ್ಕೇರಿ: ತಾಲ್ಲೂಕಿನ ಎಲಿಮುನ್ನೋಳಿ ಗ್ರಾಮದಲ್ಲಿ ವರುಣನ ಕೃಪೆಗಾಗಿ ವಾರ ಪಾಲಿಸುವ ಕಾರ್ಯಕ್ರಮ (ಹೆಡಿಗೆ ಜಾತ್ರೆ) ಶುಕ್ರವಾರ ಧಾರ್ಮಿಕ ವಿಧಿ ವಿಧಾನಗಳಿಂದ ಸಂಪನ್ನಗೊಂಡಿತು.

ಸಮೃದ್ಧ ಮಳೆ, ಬೆಳೆಗಾಗಿ ಪ್ರಾರ್ಥಿಸಿ ಐದು ವಾರಗಳ ಕಾಲ ವಾರ ಪಾಲಿಸುವ ಪದ್ಧತಿಯನ್ನು ಗ್ರಾಮಸ್ಥರು ಕಳೆದ 39 ವರ್ಷಗಳಿಂದ ಆಚರಿಸಿಕೊಂಡು ಬರುತ್ತಿದ್ದಾರೆ. ‘ವಾರ ಪಾಲಿಸುವ’ ದಿನದಂದು ಗ್ರಾಮದಲ್ಲಿ ಎತ್ತುಗಳಿಗೆ ನೊಗ ಹಾಕುವುದಿಲ್ಲ. ಕೃಷಿ ಚಟುವಟಿಕೆ ಹಾಗೂ ಕರಿದ ಪದಾರ್ಥಗಳಿಂದ ದೂರ ಇರುತ್ತಾರೆ.

ಗ್ರಾಮದ ಎಲ್ಲ ದೇವಸ್ಥಾನಗಳಲ್ಲಿ ಶುಕ್ರವಾರ ಜಲಾಭಿಷೇಕ, ವಿಶೇಷ ಧಾರ್ಮಿಕ ಕಾರ್ಯಕ್ರಮಗಳು ನಡೆದವು. ಗುರುವಾರ ರಾತ್ರಿಯಿಡೀ ಭಜನೆ, ಕೀರ್ತನೆ ಜರುಗಿತು. ಮಹಿಳೆಯರು ಜಲಕುಂಭ ಹೊತ್ತರು. ಆರತಿ ಬೆಳಗಿದರು. ಅಂಬಲಿ ಕೊಡದ ಮೂಲಕ ಪ್ರಸಾದ ಅರ್ಪಿಸಿದರು.