ಬೆಳಗಾವಿ: ಬೆಲೆ ಕುಸಿತದಿಂದ ಎಕರೆ ಎಲೆಕೋಸು ಮಣ್ಣು ಪಾಲು

ಬೆಳಗಾವಿ: ಲಾಕ್‌ಡೌನ್‌ನಿಂದಾಗಿ ಬೆಲೆ ಕುಸಿತ ಉಂಟಾಗಿರುವುದರಿಂದ ನೊಂದ ತಾಲ್ಲೂಕಿನ ಕಡೋಲಿಯ ರೈತ ರಮೇಶ ಮಾಯಣ್ಣ ಅವರು ಎಕರೆಯಲ್ಲಿ ಬೆಳೆದಿದ್ದ ಎಲೆಕೋಸನ್ನು ಜಮೀನಿನಲ್ಲೇ ಬುಧವಾರ ಟ್ರ್ಯಾಕ್ಟರ್‌ನ ಕಲ್ಟಿವೇಟರ್‌ನಿಂದ ಉಳುಮೆ ಮಾಡಿ ನಾಶಪಡಿಸಿದರು.

‘ಎಪಿಎಂಸಿ ಮಾರುಟಕ್ಟೆಯಲ್ಲಿ ಕೆ.ಜಿ.ಗೆ ಸರಾಸರಿ ಕೇವಲ ₹ 1ರಿಂದ ₹ 1.50 ಬೆಲೆಯಷ್ಟೇ ಸಿಗುತ್ತಿದೆ. ಕೆ.ಜಿ.ಗೆ ₹ 5 ಸಿಕ್ಕಿದ್ದರೂ ಮಾರಬಹುದಿತ್ತು. 50 ಕೆ.ಜಿ.ಯ ಚೀಲವನ್ನು ದಲ್ಲಾಳಿಗಳು ₹ 60ಕ್ಕೆ ಕೇಳುತ್ತಿದ್ದಾರೆ. ಇದರಿಂದ ಬೇಸಾಯ, ಕಟಾವು ಸಾಗಣೆ ಮಾಡಿದ ವೆಚ್ಚವೂ ಸಿಗುತ್ತಿಲ್ಲ. ಬಹಳ ನಷ್ಟ ಆಗುತ್ತಿರುವುದರಿಂದ ನಾಶಪಡಿಸಿದ್ದೇನೆ’ ಎಂದು ಮಾಧ್ಯಮ ಪ್ರತಿನಿಧಿಗಳಿಗೆ ತಿಳಿಸಿದರು.

ಕಡೋಲಿ ಸುತ್ತಮುತ್ತಲಿನ ಗ್ರಾಮಗಳ ಹಲವು ರೈತರು ಕೂಡ ಇದೇ ರೀತಿ ಮಾಡುತ್ತಿದ್ದಾರೆ.