ಡಿಸಿಇಟಿ ಪರೀಕ್ಷೆಯ ಪಠ್ಯಕ್ರಮ ಬದಲು

ಬೆಂಗಳೂರು: ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (ಕೆಇಎ) ನಡೆಸುವ ಡಿಪ್ಲೊಮಾ ಸಾಮಾನ್ಯ ಪ್ರವೇಶ ಪರೀಕ್ಷೆ (ಡಿಸಿಇಟಿ) ಪಠ್ಯಕ್ರಮ 2018–19ನೇ ಶೈಕ್ಷಣಿಕ ಸಾಲಿನಿಂದ ಬದಲಾಗಲಿದೆ.

ಫಲಿತಾಂಶ ಆಧರಿತ ಪಠ್ಯಕ್ರಮ ಪದ್ಧತಿಯ ಅನುಸಾರ ರಚಿಸಲಾಗಿರುವ ಹೊಸ ಪಠ್ಯಕ್ರಮದ ಪ್ರಕಾರವೇ ಡಿಸಿಇಟಿ ನಡೆಸುವಂತೆ ಸರ್ಕಾರ, ಪ್ರಾಧಿಕಾರಕ್ಕೆ ಆದೇಶ ನೀಡಿದೆ.

2015–16ನೇ ಸಾಲಿನಲ್ಲಿ, ಪಾಲಿಟೆಕ್ನಿಕ್‌ ಡಿಪ್ಲೊಮಾ ಸೆಮಿಸ್ಟರ್‌ಗಳ ಪಠ್ಯಕ್ರಮಗಳಲ್ಲಿ ‘ಫಲಿತಾಂಶ ಆಧಾರಿತ ಪಠ್ಯಕ್ರಮ’ವನ್ನು ತಾಂತ್ರಿಕ ಶಿಕ್ಷಣ ಇಲಾಖೆ ಅಳವಡಿಸಿಕೊಂಡಿತ್ತು. ಮೂರು ವರ್ಷದಿಂದ ಈ ಪಠ್ಯಕ್ರಮ ಅಧ್ಯಯನ ನಡೆಸಿರುವ ಡಿಪ್ಲೊಮಾ ವಿದ್ಯಾರ್ಥಿಗಳು ವ್ಯಾಸಂಗ ಮುಂದುವರಿಸಲು (ಲ್ಯಾಟರಲ್‌ ಎಂಟ್ರಿ ಮೂಲಕ ಬಿ.ಇ) ಅನುಕೂಲವಾಗುವಂತೆ ಇದೇ ಪಠ್ಯಕ್ರಮದ ಅನ್ವಯ ಡಿಸಿಇಟಿ ನಡೆಸಬೇಕು ಎಂದು ಸರ್ಕಾರಕ್ಕೆ ಪ್ರಸ್ತಾವನೆ ಕಳುಹಿಸಿತ್ತು.

ಅದಕ್ಕೆ ಪೂರಕವಾಗಿ ಉದ್ಯೋಗ ಕ್ಷೇತ್ರಗಳ ತಾಂತ್ರಿಕ ಪರಿಣತರು, ರಾಷ್ಟ್ರೀಯ ತಾಂತ್ರಿಕ ಶಿಕ್ಷಕರ ತರಬೇತಿ ಮತ್ತು ಸಂಶೋಧನಾ ಸಂಸ್ಥೆಯ ತಜ್ಞರನ್ನು ಒಳಗೊಂಡ ಪಠ್ಯಕ್ರಮ ಪರಿಷ್ಕರಣಾ ಸಮಿತಿಯನ್ನು ರಚಿಸಲಾಗಿತ್ತು. ಈ ಸಮಿತಿ ಸಿದ್ಧಪಡಿಸಿದ್ದ ಹೊಸ ಪಠ್ಯಕ್ರಮ ಆಧರಿಸಿಯೇ ಡಿಸಿಇಟಿ ನಡೆಸಲು ಸರ್ಕಾರದ ಅನುಮತಿ ಕೋರಿತ್ತು. ಅದಕ್ಕೆ ಸರ್ಕಾರ ಅನುಮತಿ ನೀಡಿದೆ.