ಮೆಟ್ರೊ; 2ನೇ ದಿನ 60 ಸಾವಿರ ಮಂದಿ ಪ್ರಯಾಣ

ಬೆಂಗಳೂರು: ಪೀಣ್ಯ– ಸಂಪಿಗೆ ರಸ್ತೆ ನಡುವೆ ಆರಂಭವಾಗಿರುವ ಹಸಿರು ಮಾರ್ಗದ ‘ನಮ್ಮ ಮೆಟ್ರೊ’ ಸಂಚಾರಕ್ಕೆ ರಜಾ­ದಿನ­ವಾದ ಭಾನುವಾರ ಪ್ರಯಾಣಿ­ಕರಿಂದ ಮೇರೆ ಮೀರಿದ ಉತ್ಸಾಹ ವ್ಯಕ್ತವಾಗಿದೆ.

ಸಾರ್ವಜನಿಕ ಸೇವೆಗೆ ಸಮರ್ಪಣೆ­ಯಾದ ಎರಡನೇ ದಿನ  60,000ಕ್ಕೂ ಹೆಚ್ಚು ಮಂದಿ ಪ್ರಯಾಣಿಸಿದರು. ಮೊದಲ ದಿನ  48,000 ಮಂದಿ ಪ್ರಯಾಣಿ­­ಸಿ­ದ್ದರು. ಭಾನುವಾರ ಉತ್ಸಾಹ ಮತ್ತಷ್ಟು ಹೆಚ್ಚಿತ್ತು.

ಎಂ.ಜಿ.ರಸ್ತೆ– ಬೈಯಪ್ಪನಹಳ್ಳಿ ನಡುವಿನ ‘ನಮ್ಮ ಮೆಟ್ರೊ’ ಸಂಚಾರ ಆರಂಭ­ವಾಗಿ ಎರಡೂವರೆ ವರ್ಷಗಳು ಕಳೆದರೂ ಮೆಟ್ರೊ ಪ್ರಯಾಣ ಮಾಡುವ ಜನರ ಉತ್ಸಾಹ ಬತ್ತಿಲ್ಲ. 2011ರ ಅಕ್ಟೋಬರ್‌ 20ರಂದು ನಗರದಲ್ಲಿ ಮೆಟ್ರೊ ಸಂಚಾರ ಆರಂಭ­ವಾಗಿತ್ತು. ಸಂಜೆ 4ರಿಂದ ರಾತ್ರಿ 11ರ ವರೆಗಿನ 45 ಟ್ರಿಪ್‌ಗಳಲ್ಲಿ 39,000 ಮಂದಿ ಸಂಚಾರ ನಡೆಸಿದ್ದರು.

ನವದೆಹಲಿಯಲ್ಲಿ ಮೆಟ್ರೊ ಸಂಚಾರ 2002ರ ಡಿ. 24ರಂದು ಆರಂಭ­ವಾಗಿತ್ತು. ಶ್ರದ್ಧಾ ಹಾಗೂ ತೀಸ್‌ ಹಝಾರಿ ನಡುವಿನ ಮಾರ್ಗದಲ್ಲಿ (8.3 ಕಿ.ಮೀ) ಮೊದಲ ದಿನವೇ ಎರಡು ಲಕ್ಷ ಮಂದಿ ಸಂಚಾರ ನಡೆಸಿದ್ದರು.