ಬೆಂಗಳೂರು: ಟೆಕಿ ದಂಪತಿಗೆ ₹2.66 ಕೋಟಿ ವಂಚನೆ

ಬೆಂಗಳೂರು: ಆನ್‌ಲೈನ್‌ನಲ್ಲಿ ಹೂಡಿಕೆ ಮಾಡಿದರೆ ದುಪ್ಪಟ್ಟು ಹಣ ನೀಡುವುದಾಗಿ ಆಮಿಷವೊಡ್ಡಿ ನಗರದ ಟೆಕಿ ದಂಪತಿಗೆ ₹2,66,75,791 ವಂಚನೆ ಮಾಡಿರುವ ಕುರಿತು ಪೂರ್ವ ವಿಭಾಗದ ಸೆನ್ ಠಾಣೆಯಲ್ಲಿ ದೂರು ದಾಖಲಾಗಿದೆ.

ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಿದ ಪೊಲೀಸರು, ಸುಮಾರು 50 ಬ್ಯಾಂಕ್ ಖಾತೆಗಳಿಗೆ ಹಣ ವರ್ಗವಾಗಿರುವುದನ್ನು ಪತ್ತೆ ಮಾಡಿದ್ದಾರೆ. ಹಂತ ಹಂತವಾಗಿ ₹1.50 ಕೋಟಿ ಹಣ ಜಪ್ತಿ ಮಾಡಿದ್ದು, ನ್ಯಾಯಾಲಯದ ಅನುಮತಿ ಪಡೆದು ದಂಪತಿಗೆ ವಾಪಸ್ ನೀಡಿದ್ದಾರೆ.

ಘಟನೆ ವಿವರ: ‘ನಗರದ ಬಾಣಸವಾಡಿಯಲ್ಲಿ ವಾಸವಿರುವ ದಂಪತಿಗೆ ಲಂಡನ್‌ನಿಂದ ವ್ಯಕ್ತಿಯೊಬ್ಬ ಕರೆ ಮಾಡಿ, ಯುಟ್ಯೂಬ್​ನಲ್ಲಿ ವಿಡಿಯೊ ನೋಡಿ ಚಂದಾದಾರರಾದರೆ(ಸಬ್​ಸ್ಕ್ರೈಬ್)​ ಮಾಡಿದರೆ ₹50 ನೀಡುವುದಾಗಿ ಹೇಳಿದ್ದಾನೆ. ಸಬ್​ಸ್ಕ್ರೈಬ್ ಮಾಡಿದ್ದ ದಂಪತಿಗೆ ಹಣ ನೀಡಿದ್ದಾನೆ. ನಂತರ ಟೆಲಿಗ್ರಾಂ ಗ್ರೂಪ್​ಗೆ ಸೇರಿಸಿ, ಹಣ ಹೂಡಿಕೆ ಮಾಡಿದರೆ ದುಪ್ಪಟ್ಟು ನೀಡುವುದಾಗಿ ಆಮಿಷವೊಡ್ಡಿದ್ದಾನೆ’ ಎಂದು ಪೊಲೀಸರು ತಿಳಿಸಿದ್ದಾರೆ.

‘ಮೊದಲಿಗೆ ₹2 ಲಕ್ಷದಿಂದ ₹3 ಲಕ್ಷ ಹೂಡಿಕೆ ಮಾಡಿದವರಿಗೆ ಲಾಭಾಂಶ ನೀಡಿದ್ದನು. ಇದರಿಂದ ಸಂತಸಗೊಂಡ ದಂಪತಿ ಹಂತ ಹಂತವಾಗಿ ₹2,66,75,791 ಹೂಡಿಕೆ ಮಾಡಿದ್ದರು. ಹಣ ವಾಪಸ್ ಪಡೆಯಲು ಪ್ರಯತ್ನಿಸಿದಾಗ ಅವರಿಗೆ ಸಾಧ್ಯವಾಗಲಿಲ್ಲ. ಈ ಬಗ್ಗೆ ಪ್ರಶ್ನಿಸಿದಾಗ ಮತ್ತೆ ₹50 ಲಕ್ಷ ಹೂಡಿಕೆ ಮಾಡಲು ಸೂಚಿಸಿದ್ದ. ಅನುಮಾನಗೊಂಡು ದಂಪತಿ ಪೊಲೀಸರಿಗೆ ದೂರು ನೀಡಿದರು’ ಎಂದು ಹೇಳಿದ್ದಾರೆ.

‘ಆರೋಪಿ ಲಂಡನ್​​ನಲ್ಲಿ ಕುಳಿತು ಕೃತ್ಯ ಎಸಗಿರುವ ಬಗ್ಗೆ ಮಾಹಿತಿ ಇದ್ದು, ಉತ್ತರ ಭಾರತದ ಹಲವರ ಬ್ಯಾಂಕ್ ಖಾತೆಗಳನ್ನು ವಂಚನೆ ಜಾಲಕ್ಕೆ ಬಳಕೆ ಮಾಡಿದ್ದಾನೆ. ಅನುಮಾನ ಬರಬಾರದೆಂದು ಷೇರು ಮಾರ್ಕೆಟ್ ಬ್ರೋಕರೇಜ್ ರೀತಿಯ ನಕಲಿ ವೆಬ್​ಸೈಟ್ ತೆರೆದು ಮಾಹಿತಿ ಸಹ ನೀಡಿದ್ದ. ಸದ್ಯ ಆರೋಪಿ ಯಾರು ಎಂಬುದು ಸ್ಪಷ್ಟವಾಗಿ ಗೊತ್ತಾಗಿಲ್ಲ. ತನಿಖೆ ನಡೆಯುತ್ತಿದೆ’ ಎಂದು ಹೇಳಿದ್ದಾರೆ.