ಅಲ್ಲಮ ಜ್ಞಾನ, ಮಾನವೀಯ ಮೌಲ್ಯಗಳ ಸಂಗಮ: ನ್ಯಾಯಮೂರ್ತಿ ಶಿವರಾಜ ಪಾಟೀಲ

ಬೆಂಗಳೂರು: ‘ಅಲ್ಲಮನು ಜ್ಞಾನ, ಅಧ್ಯಾತ್ಮ, ಸಾಹಿತ್ಯ, ಸಂಸ್ಕೃತಿ ಮತ್ತು ಮಾನವೀಯ ಮೌಲ್ಯಗಳ ಸಂಗಮವಾಗಿದ್ದ. ಅದನ್ನು ಹೊಸ ತಲೆಮಾರಿನವರಿಗೂ ದಾಟಿಸುವ ಕೆಲಸವನ್ನು ಮಲ್ಲೇಪುರಂ ಜಿ.ವೆಂಕಟೇಶ ಅವರು ಮಾಡಿದ್ದಾರೆ’ ಎಂದು ನ್ಯಾಯಮೂರ್ತಿ ಶಿವರಾಜ ವಿ. ಪಾಟೀಲ ಅವರು ಹೇಳಿದರು.

ಪ್ರಭುಲಿಂಗೇಶ್ವರ ಶಿಕ್ಷಣ ಸಂಸ್ಥೆ ಮತ್ತು ಅಂಕಿತ ಪುಸ್ತಕ, ನಗರದ ಗಾಂಧಿ ಭವನದಲ್ಲಿ ಭಾನುವಾರ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಪ್ರೊ.ಮಲ್ಲೇಪುರಂ ಜಿ.ವೆಂಕಟೇಶ ಅವರ ‘ಅಲ್ಲಮ ಕಥನ’ ಪುಸ್ತಕ ಜನಾರ್ಪಣೆ ಮಾಡಿ ಅವರು ಮಾತನಾಡಿದರು.

‘ಅಲ್ಲಮನ ಮೌಲ್ಯಗಳಲ್ಲಿ ಮಿಂದೆದ್ದು, ವೆಂಕಟೇಶ ಅವರು ಈ ಕೃತಿ ರಚಿಸಿದ್ದಾರೆ. ತಾವು ಓದಿದ್ದನ್ನು, ಕಲಿತಿದ್ದನ್ನು ಹೊಸ ತಲೆಮಾರಿನವರಿಗೂ ತಿಳಿಯಲಿ ಎಂದು ಪುಸ್ತಕ ರೂಪಕ್ಕೆ ಇಳಿಸಿದ್ದಾರೆ’ ಎಂದರು.

ಪ್ರಭುಲಿಂಗ ಶಿಕ್ಷಣ ಸಂಸ್ಥೆಯು ಅಲ್ಲಮನ ವಚನಗಳ ಕುರಿತ ಅಧ್ಯಯನ ನಡೆಸಿದವರಿಗಾಗಿ ‘ಅಲ್ಲಮ ಪುರಸ್ಕಾರ’ವನ್ನು ಸ್ಥಾಪಿಸಿದ್ದು, ನೀಲಗಿರಿ ತಳವಾರ, ವೀಣಾ ಬನ್ನಂಜೆ, ಟಿ.ಎನ್‌.ವಾಸುದೇವಮೂರ್ತಿ ಮತ್ತು ಪ್ರಕಾಶ ಗಿರಿಮಲ್ಲನವರ ಅವರಿಗೆ ಮೊದಲ ಸಾಲಿನ ಪುರಸ್ಕಾರವನ್ನು ಪ್ರದಾನ ಮಾಡಲಾಯಿತು. ಪ್ರಶಸ್ತಿಯು ಫಲಕ ಮತ್ತು ತಲಾ ₹10,000 ನಗದು ಒಳಗೊಂಡಿದೆ.

‘ಬಡಿದಾಟಕ್ಕೆ ಹಚ್ಚುವ ತುಂಡಾಸುರರು’

‘ಕೆಲವು ತುಂಡಾಸುರರು ವೀರಶೈವರು– ಲಿಂಗಾಯತರು ಪರಸ್ಪರ ಬಡಿದಾಡಿಕೊಳ್ಳುವಂತೆ ಮಾಡುತ್ತಿದ್ದಾರೆ’ ಎಂದು ಪ್ರಾಧ್ಯಾಪಕ ಬಿ.ವಿ.ವಸಂತಕುಮಾರ್‌ ಹೇಳಿದರು. ‘ವೀರಶೈವರು ಬೇರೆ ಲಿಂಗಾಯತರು ಬೇರೆ. ಆ ಲಿಂಗ ಬೇರೆ ಈ ಲಿಂಗ ಬೇರೆ ಎಂದು ಹೇಳುತ್ತಿರುವ ಕಾಲವಿದು. ಆದರೆ ಅಲ್ಲಮನ ಪ್ರಣವ ಪ್ರಭೆಯ ಪರಂಜ್ಯೋತಿಯೇ ಲಿಂಗ. ಮಲ್ಲೇಪುರಂ ಜಿ. ವೆಂಕಟೇಶ ಅವರ ಈ ಕೃತಿ ಇದನ್ನೇ ಪ್ರತಿಪಾದಿಸುತ್ತಿದೆ. ಈ ಕೃತಿಯು ಅಲ್ಲಮ ಶೈವ ವೀರಶೈವ ಮತ್ತು ಶಾಕ್ತ್ಯ ಕಥನ. ಅಲ್ಲಮ ಯಾರು ಅಲ್ಲಮ ಏತಕ್ಕೆ ಅಗತ್ಯ ಮತ್ತು ಅಲ್ಲಮ ಎಲ್ಲಿಯವರೆಗೆ ಬೇಕು ಎಂಬುದನ್ನು ಈ ಕೃತಿ ವಿವರಿಸುತ್ತಾ ಹೋಗುತ್ತದೆ’ ಎಂದರು.