ಬೆಂಗಳೂರು ವಿವಿ ಆವರಣದಲ್ಲಿ ವಾಹನಗಳ ಭರಾಟೆ: ಶೈಕ್ಷಣಿಕ ಚಟುವಟಿಕೆಗೆ ಕಿರಿಕಿರಿ

ಬೆಂಗಳೂರು: ‘ಸಂಚಾರ ದಟ್ಟಣೆ ತಪ್ಪಿಸಿ ಕೊಳ್ಳುವುದಕ್ಕಾಗಿ ವಾಹನಗಳೆಲ್ಲ ಮುಖ್ಯರಸ್ತೆಯಿಂದ ವಿಶ್ವವಿದ್ಯಾಲಯದ ರಸ್ತೆಗೆ ತಿರುಗುತ್ತವೆ. ಹೆಚ್ಚಾದ ವಾಹನಗಳ ಸಂಚಾರ ಶಬ್ದ, ವಾಯು ಮಾಲಿನ್ಯಕ್ಕೆ ಕಾರಣವಾಗುತ್ತಿದೆ. ಕ್ಯಾಂಪಸ್‌ನಲ್ಲಿ ನೆಮ್ಮದಿಯಾಗಿ ಕಲಿಯುವುದೇ ಕಷ್ಟವಾಗಿದೆ…’

ಜ್ಞಾನಭಾರತಿ ಆವರಣದಲ್ಲಿ ನಿತ್ಯ ಉಂಟಾಗುತ್ತಿರುವ ಸಂಚಾರ ದಟ್ಟಣೆಯ ಕಿರಿಕಿರಿಯಿಂದ ಬೇಸತ್ತಿರುವ ಬೆಂಗಳೂರು ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳು, ಸಿಬ್ಬಂದಿಯ ಅಸಹಾಯಕ ನುಡಿಗಳಿವು.

ನಿತ್ಯ ಬೆಳಿಗ್ಗೆ 8 ರಿಂದ 11.30ವರೆಗೆ ಹಾಗೂ ಸಂಜೆ 5.30 ರಿಂದ 7 ಗಂಟೆಯವರೆಗೂ ವಿಶ್ವ ವಿದ್ಯಾಲಯದ ಆವರಣದಲ್ಲಿ ವಾಹನ ಸಂಚಾರ ಹೆಚ್ಚಾಗುತ್ತದೆ. ಬೆಳಿಗ್ಗೆ ವಿದ್ಯಾರ್ಥಿಗಳು ತರಗತಿಗಳಿಗೆ ತೆರಳುವ ವೇಳೆ, ರಸ್ತೆ ದಾಟುವುದೇ ಕಷ್ಟವಾಗುತ್ತದೆ. ಇದೇ ಅವಧಿಯಲ್ಲಿ ಪ್ರಾಯೋಗಿಕ ಹಾಗೂ ಥಿಯರಿ ತರಗತಿಗಳು ನಡೆಯುತ್ತಿರುತ್ತವೆ. ವಾಹನಗಳು‌ ಹೊಮ್ಮಿಸುವ ಶಬ್ದದಿಂದ ಕಲಿಕಾ ಚಟುವಟಿಕೆಗೆ ಕಿರಿಕಿರಿಯಾಗುತ್ತಿದೆ
ಎನ್ನುತ್ತಾರೆ ವಿದ್ಯಾರ್ಥಿಗಳು. 

‘47 ವಿಭಾಗಗಳು ಸುಮಾರು 6 ಸಾವಿರ ವಿದ್ಯಾರ್ಥಿಗಳು, ಸಾವಿರಕ್ಕೂ ಹೆಚ್ಚಿರುವ ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿಯಿರುವ ವಿಶ್ವ ವಿದ್ಯಾಲಯ ಆವರಣದಲ್ಲಿ ಹಲವು ರಸ್ತೆಗಳು, ವೃತ್ತಗಳಿವೆ. ಇಲ್ಲೆಲ್ಲ ವಾಹನಗಳ ಸಂಚಾರ ಚಿಹ್ನೆಗಳ ಕೊರತೆಯಿದೆ. ಎರಡೂ ಜಂಕ್ಷನ್‌ಗಳಿಂದ(ಉಲ್ಲಾಳು–
ಮೈಸೂರು ರಸ್ತೆ) ವಾಹನಗಳು ವೇಗವಾಗಿ ಸಾಗುತ್ತವೆ. ರಸ್ತೆ ದಾಟುವಾಗ ಅಪಘಾತಗಳು ಸಂಭವಿಸಿವೆ. ವಾಹನ ಸಂಚಾರ ಹೆಚ್ಚಾಗುವ ವೇಳೆಯಲ್ಲಿ ಅವುಗಳನ್ನು ನಿಯಂತ್ರಿಸಿ, ವಿದ್ಯಾರ್ಥಿ ಗಳನ್ನು ರಸ್ತೆ ದಾಟಿಸುವ ವ್ಯವಸ್ಥೆಯೂ ಇಲ್ಲ’ ಎಂದು ವಿದ್ಯಾರ್ಥಿನಿಯೊಬ್ಬರು ಸಮಸ್ಯೆಯ ಮೂಲದತ್ತ ಬೊಟ್ಟು ಮಾಡಿದರು.

ಪರ್ಯಾಯ ಮಾರ್ಗ:

ಬೆಂಗಳೂರು ವಿಶ್ವವಿದ್ಯಾಲಯ, ಮೈಸೂರು ರಸ್ತೆ, ಹೊರ ವರ್ತುಲ ರಸ್ತೆ, ನಾಗರಬಾವಿ ಮುಖ್ಯರಸ್ತೆ ಮತ್ತು ಮರಿಯಪ್ಪನಪಾಳ್ಯ, ಜ್ಞಾನಭಾರತಿ ಸೇರಿದಂತೆ ಹಲವು ಜನವಸತಿ ನಗರ ಪ್ರದೇಶಗಳಿಗೆ ಹೊಂದಿ ಕೊಂಡಿದೆ. ಈ ವಸತಿ ಪ್ರದೇಶಗಳ ನಾಗರಿಕರು ಮೈಸೂರು ರಸ್ತೆ ತಲುಪಲು ವಿಶ್ವವಿದ್ಯಾಲಯದ ಮಾರ್ಗವನ್ನು ಬಳಸುತ್ತಾರೆ. ಇನ್ನೊಂದೆಡೆ‌, ಜ್ಞಾನಭಾರತಿ ಮೆಟ್ರೊ ನಿಲ್ದಾಣದ ಬಳಿ ಅಥವಾ ಉಲ್ಲಾಳ ಜಂಕ್ಷನ್, ನಾಗರಬಾವಿ ಸರ್ಕಲ್ ಬಳಿ ಸಂಚಾರ ದಟ್ಟಣೆ ಹೆಚ್ಚಾದಾಗ ಪರ್ಯಾಯ ಮಾರ್ಗವಾಗಿ ವಿಶ್ವ ವಿದ್ಯಾಲಯದ ದಾರಿಯಲ್ಲಿ ಸಾಗಿ, ಮುಂದೆ ಮುಖ್ಯ ರಸ್ತೆ ಸೇರಿಕೊಳ್ಳುತ್ತಾರೆ. ಇದರಿಂದಲೂ ವಿದ್ಯಾಲಯದ ಒಳಗಿನ ರಸ್ತೆಯಲ್ಲಿ ವಾಹನಗಳ ಓಡಾಟ ಹೆಚ್ಚಾಗುತ್ತಿದೆ.

ಸುಮಾರು 1200 ಎಕರೆ ವಿಸ್ತೀರ್ಣ ವಿರುವ ಬೆಂಗಳೂರು ವಿಶ್ವವಿದ್ಯಾಲ ಯದಲ್ಲಿ ಶೈಕ್ಷಣಿಕ ಕೇಂದ್ರಗಳ ಜೊತೆಗೆ,‌ ಜೀವವೈವಿಧ್ಯ ಉದ್ಯಾನವಿದೆ. ಅನೇಕ ಪಕ್ಷಿ, ಪ್ರಾಣಿಗಳು, ಸಸ್ಯ ಸಂಕುಲಗಳಿವೆ. ವಿಶ್ವವಿದ್ಯಾಲಯದಲ್ಲಿ ಪ್ರತಿ ನಿತ್ಯ ಸುಮಾರು 25 ರಿಂದ 30 ಸಾವಿರ ವಾಹನಗಳು ಸಂಚರಿಸುತ್ತವೆ ಎಂದು ಅಂದಾಜಿಸಲಾಗಿದೆ. ‘ಅತಿಯಾದ ವಾಹನ ಸಂಚಾರದಿಂದ ಶೈಕ್ಷಣಿಕ ಚಟುವಟಿಕೆಗೆ ಅಲ್ಲದೇ, ಪರಿಸರ, ಜೀವವೈವಿಧ್ಯಕ್ಕೂ ಹಾನಿಯಾಗುತ್ತದೆ’ ಎನ್ನುತ್ತಾರೆ ಪರಿಸರ ವಿಜ್ಞಾನ ವಿಭಾಗದ ಉಪನ್ಯಾಸಕ ಡಿ.ಪರಮೇಶ ನಾಯ್ಕ.

2022ರಲ್ಲಿ ಗಣಿತಶಾಸ್ತದ ಸ್ನಾತಕೋತ್ತರ ವಿದ್ಯಾರ್ಥಿನಿ ಮೇಲೆ ಬಿಎಂಟಿಸಿ ಬಸ್ ಹರಿದು ಮೃತಪಟ್ಟಿದ್ದರು.
ಈ ಸಂಬಂಧ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳು ಸಾರ್ವಜನಿಕ ವಾಹನ ನಿಷೇಧಿಸುವಂತೆ ಪ್ರತಿಭಟಿಸಿದ್ದರು. ಆದರೂ ನಿರ್ಬಂಧ ಸಾಧ್ಯವಾಗಿಲ್ಲ ಎಂದು ವಿದ್ಯಾರ್ಥಿಗಳು ಬೇಸರ ವ್ಯಕ್ತಪಡಿಸುತ್ತಾರೆ.

‘ಈ ವಿಶ್ವವಿದ್ಯಾಲಯಕ್ಕೆ ಹೊಂದಿಕೊಂಡಂತೆ ಬಡಾವಣೆಗಳಿವೆ. ಮುಖ್ಯ ರಸ್ತೆ ತಲುಪಲು ಸುಲಭ ಹಾಗೂ ಸಮಯ ಉಳಿತಾಯವಾಗುವುದರಿಂದ ಸಾರ್ವಜನಿಕರು ವಿಶ್ವವಿದ್ಯಾಲಯದ ರಸ್ತೆಯನ್ನೇ ಅವಲಂಬಿಸಿದ್ದಾರೆ’ ಎಂದು ಜ್ಞಾನಭಾರತಿ ಬಡಾವಣೆಯ ನಿವಾಸಿಗಳು ಹೇಳುತ್ತಾರೆ.

ವಿಧಾನಪರಿಷತ್ ಸಭಾಪತಿ ಬಸವರಾಜ ಹೊರಹಟ್ಟಿಯವರು ವಿಶ್ವ ವಿದ್ಯಾಲಯ ಆವರಣದಲ್ಲಿನ ಸಂಚಾರ ದಟ್ಟಣೆಯ ಸಮಸ್ಯೆ ಬಗೆಹರಿಸುವಂತೆ ಮುಖ್ಯಮಂತ್ರಿ ಹಾಗೂ ಪೊಲೀಸ್ ಆಯುಕ್ತರಿಗೆ ಪತ್ರ ಬರೆದಿದ್ದರು. ಇದಾದ ನಂತರ, ಬೆಂಗಳೂರು ಪೋಲಿಸ್ ಕಮಿಷನರ್ ಬಿ. ದಯಾನಂದ್ ಅವರು, ವಿಶ್ವವಿದ್ಯಾಲ‌ಯದ ಆವರಣದಲ್ಲಿ ಸರಕು ವಾಹನಗಳ ಸಂಚಾರ ನಿಷೇಧಿಸಿ ಆದೇಶ ಹೊರಡಿಸಿದ್ದರು. ಸದ್ಯ ಸರಕು ವಾಹನಗಳನ್ನು ನಿಯಂತ್ರಿಸಿದ್ದರೂ ಸಂಚಾರ ದಟ್ಟಣೆ ಬಗೆ ಹರಿದಿಲ್ಲ. ಇದಕ್ಕೆ ಶಾಶ್ವತ ಪರಿಹಾರ ಕಲ್ಪಿಸಬೇಕು ಎನ್ನುತ್ತಾರೆ ವಿಶ್ವವಿದ್ಯಾಲಯದ ಸಿಬ್ಬಂದಿ.