ಎನ್‌95 ಮಾಸ್ಕ್ ಹೆಸರಿನಲ್ಲಿ ₹ 1.23 ಕೋಟಿ ವಂಚನೆ

ಬೆಂಗಳೂರು: ‘ಎನ್‌–95 ಮಾಸ್ಕ್ ಪೂರೈಕೆ ಮಾಡುವುದಾಗಿ ಹೇಳಿದ್ದ ಅಮೆರಿಕದ ಕಂಪನಿಯೊಂದು ₹ 1.23 ಕೋಟಿ ಪಡೆದು ವಂಚಿಸಿದೆ’ ಎಂದು ಆರೋಪಿಸಿ ಟಿ. ಮಂಜುನಾಥ್ ಎಂಬುವರು ಸಿಐಡಿ ಸೈಬರ್ ಕ್ರೈಂ ವಿಭಾಗಕ್ಕೆ ದೂರು ನೀಡಿದ್ದಾರೆ.

ನಕ್ಷತ್ರ ಕ್ರಿಯೆಷನ್ಸ್ ಪ್ರತಿನಿಧಿಯಾದ ಮಂಜುನಾಥ್ ನೀಡಿರುವ ದೂರು ಆಧರಿಸಿ, ಅಮೆರಿಕದ ಜಾರ್ಜ್ ಹೌಂಗ್, ಜಾನ್ ವಾಂಗ್ ಹಾಗೂ ರೈನ್ ಫಿಲಿಪ್ ಎಂಬುವರ ವಿರುದ್ಧ ಎಫ್‌ಐಆರ್ ದಾಖಲಾಗಿದೆ.

‘ಜಾಲತಾಣದ ಮೂಲಕ ಜುಲೈ 16ರಂದು ಅಮೆರಿಕದ ಮೆಡಿ ಫಾರ್ಮಾ ಕಂಪನಿ ಸಂಪರ್ಕಿಸಲಾಗಿತ್ತು. ಕಂಪನಿ ಪ್ರತಿನಿಧಿಗಳ ಸೋಗಿನಲ್ಲಿ ಇ–ಮೇಲ್ ಮೂಲಕ ಪ್ರತಿಕ್ರಿಯಿಸಿದ್ದ ಆರೋಪಿಗಳು, ₹ 4.95 ಕೋಟಿ ಪಾವತಿಸಿದರೆ 4 ಲಕ್ಷ ಎನ್‌95 ಮಾಸ್ಕ್‌ ನೀಡುವುದಾಗಿ ಹೇಳಿದ್ದರು. ಅದಕ್ಕೆ ಸಂಬಂಧಪಟ್ಟ ದಾಖಲೆಗಳನ್ನೂ ಕಳುಹಿಸಿದ್ದರು. ಅದನ್ನು ನಂಬಿ ಮುಂಗಡವಾಗಿ ಆರೋಪಿಗಳು ನೀಡಿದ್ದ ಬ್ಯಾಂಕ್ ಖಾತೆಗೆ ₹ 1.23 ಕೋಟಿ ಜಮೆ ಮಾಡಲಾಗಿತ್ತು’ ಎಂದು ದೂರಿನಲ್ಲಿ ಮಂಜುನಾಥ್ ತಿಳಿಸಿದ್ದಾರೆ.

‘ಹಣ ತಲುಪಿದ ನಂತರ ಆರೋಪಿಗಳು ಮಾಸ್ಕ್ ಪೂರೈಸಿಲ್ಲ. ಹಣವನ್ನೂ ವಾಪಸು ಕೊಡುತ್ತಿಲ್ಲ’ ಎಂದೂ ಅವರು ಹೇಳಿದ್ದಾರೆ.