ಡ್ರಗ್ಸ್ ಆರೋಪಿಗಳಿಗೆ ಆಶ್ರಯ: ಮನೆ, ಫ್ಲ್ಯಾಟ್ ಮಾಲೀಕರಿಗೆ ನೋಟಿಸ್

ಬೆಂಗಳೂರು: ಡ್ರಗ್ಸ್ ಪ್ರಕರಣದಲ್ಲಿ ವಿದೇಶಿ ಪ್ರಜೆಗಳೇ ಹೆಚ್ಚಿನ ಸಂಖ್ಯೆಯಲ್ಲಿ ಬಂಧಿತರಾಗುತ್ತಿದ್ದು, ಅಂಥ ಆರೋಪಿಗಳಿಗೆ ನಗರದಲ್ಲಿ ಆಶ್ರಯ ನೀಡಿದ್ದ ಮನೆ ಹಾಗೂ ಫ್ಲ್ಯಾಟ್ ಮಾಲೀಕರಿಗೆ ಪೊಲೀಸರು ನೋಟಿಸ್ ನೀಡಿದ್ದಾರೆ.

ಇತ್ತೀಚಿನ ಡ್ರಗ್ಸ್ ಪ್ರಕರಣದಲ್ಲಿ ನೈಜೀರಿಯಾದ ಕೆಲ ಪ್ರಜೆಗಳು ಸಿಕ್ಕಿಬಿದ್ದಿದ್ದಾರೆ. ಅವರೆಲ್ಲ ಡ್ರಗ್ಸ್ ಪೆಡ್ಲರ್ ಆಗಿ ಕೃತ್ಯ ಎಸಗುತ್ತಿದ್ದರು.

ಹೊರ ರಾಜ್ಯ ಹಾಗೂ ಹೊರ ದೇಶಗಳ ಪೆಡ್ಲರ್ ಜೊತೆ ಸಂಪರ್ಕವಿಟ್ಟುಕೊಂಡಿದ್ದ ಅವರು, ನಗರಕ್ಕೆ ಡ್ರಗ್ಸ್ ತರುತ್ತಿದ್ದರು. ಕೆಲ ಕಾಲೇಜು ವಿದ್ಯಾರ್ಥಿಗಳು, ಕೆಲ ಖಾಸಗಿ ಕಂಪನಿ ಉದ್ಯೋಗಿಗಳಿಗೆ ಡ್ರಗ್ಸ್ ಪೂರೈಸುತ್ತಿದ್ದರು.
ಇದೇ ಆರೋಪಿಗಳು ನಗರದಲ್ಲಿ ನೆಲೆಸಿ ಕೃತ್ಯ ಎಸಗುತ್ತಿದ್ದರು. ಕೇಳಿದಷ್ಟು ಬಾಡಿಗೆ ನೀಡಿ ಮನೆ ಹಾಗೂ ಫ್ಲ್ಯಾಟ್‌ಗಳಲ್ಲಿ ವಾಸವಿದ್ದರು.

ಆರೋಪಿಗಳ ಹಿನ್ನೆಲೆ ಹಾಗೂ ಕೆಲಸದ ಬಗ್ಗೆ ಮಾಲೀಕರು ಯಾವುದೇ ಮಾಹಿತಿ ಪಡೆಯುತ್ತಿರಲಿಲ್ಲ. ಇದು ಆರೋಪಿಗಳಿಗೆ ಮತ್ತಷ್ಟು ಅನುಕೂಲವಾಗಿತ್ತು. ಅದೇ ಕಾರಣಕ್ಕೆ ಇದೀಗ ಮಾಲೀಕರಿಗೆ ನೋಟಿಸ್ ನೀಡುತ್ತಿದ್ದಾರೆ. ನಿಗದಿತ ದಿನದೊಳಗೆ ಉತ್ತರ ನೀಡದಿದ್ದರೆ, ಕಾನೂನು ಕ್ರಮ ಜರುಗಿಸುವುದಾಗಿ ಎಚ್ಚರಿಕೆ ನೀಡಿದ್ದಾರೆ.

'ಯಾವುದೇ ವಿದೇಶಿ ಪ್ರಜೆಯಿದ್ದರೂ ಸೂಕ್ತ ದಾಖಲೆ ಪಡೆದು ಹಾಗೂ ದೇಶಕ್ಕೆ ಬಂದಿರುವ ಕಾರಣ ತಿಳಿದು ಬಾಡಿಗೆ ನೀಡಬೇಕು. ಬಾಡಿಗೆ ನೀಡಿದ ಬಗ್ಗೆ ಸ್ಥಳೀಯ ಪೊಲೀಸ್ ಠಾಣೆಗೆ ಮಾಹಿತಿ ನೀಡಬೇಕು. ಡ್ರಗ್ಸ್ ತಡೆಗೆ ಪೊಲೀಸರ ಜೊತೆ ಸಹಕರಿಸಬೇಕು' ಎಂದು ನಗರ ಪೊಲೀಸ್ ಕಮಿಷನರ್ ಕಮಲ್ ಪಂತ್ 'ಪ್ರಜಾವಾಣಿ'ಗೆ ತಿಳಿಸಿದರು‌.