ಬೆಂಗಳೂರು: ‘ಬಿಬಿಎಂಪಿಯು ‘ಸ್ಮಾರ್ಟ್ ಪಾರ್ಕಿಂಗ್’ ಶುಲ್ಕದ ಹೆಸರಿನಲ್ಲಿ ಹಗಲು ದರೋಡೆ ಮಾಡುತ್ತಿದೆ’ ಎಂದು ಹಿರಿಯ ನಾಗರಿಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
‘ನಗರದ ಅಲಿ ಅಸ್ಕರ್ ರಸ್ತೆಯ ಉದ್ಯಾನದ ಬಳಿ ಸ್ಮಾರ್ಟಿಂಗ್ ಪಾರ್ಕಿಂಗ್ ಜಾಗದಲ್ಲಿಯೇ ಬುಧವಾರ ಸಂಜೆ ನಾನು ನನ್ನ ಕಾರನ್ನು ಸರಿಯಾಗಿ ನಿಲ್ಲಿಸಿದ್ದೆ. 50 ನಿಮಿಷ ಬಿಟ್ಟು ಬಂದ ನಂತರ, ನನ್ನ ವಾಹನಕ್ಕೆ ಕ್ಲ್ಯಾಂಪ್ ಹಾಕಲಾಗಿತ್ತು. ಒಂದು ತಾಸಿಗೆ ₹20 ನೀಡಬೇಕು ಎಂದರು. ನಾನು ಆ ಹಣವನ್ನು ನೀಡಲು ಮುಂದಾದಾಗ, ವಾಹನ ನಿಲ್ಲಿಸಿದ ತಕ್ಷಣವೇ ನೀವು ಟೋಕನ್ ತೆಗೆದುಕೊಳ್ಳಬೇಕಾಗಿತ್ತು. ಟೋಕನ್ ತೆಗೆದುಕೊಳ್ಳದ ಕಾರಣ ₹500 ದಂಡ ಕಟ್ಟಬೇಕು ಎಂದರು. ಒಟ್ಟು ₹520 ವಸೂಲಿ ಮಾಡಿದರು’ ಎಂದು ಹಿರಿಯ ನಾಗರಿಕ ಬಿ.ಎ. ಅನಂತರಾಮು ಹೇಳಿದರು.
‘ನಾನು ವಾಹನ ನಿಲ್ಲಿಸಿದ ಅವಧಿಗೆ ಎಷ್ಟು ಶುಲ್ಕ ಕಟ್ಟಬೇಕೋ ಅಷ್ಟು ಕಟ್ಟುತ್ತೇನೆ ಎಂದರೂ ಖಾಸಗಿ ಏಜನ್ಸಿಯ ಸಿಬ್ಬಂದಿ ಕೇಳಲಿಲ್ಲ. ಟೋಕನ್ ಪಡೆಯದೆ ಇದ್ದುದೇ ತಪ್ಪು ಎಂದಾದರೆ ₹100ವರೆಗೂ ಶುಲ್ಕ ವಿಧಿಸಲಿ. ಆದರೆ, ₹500 ವಸೂಲಿ ಮಾಡುವ ಮೂಲಕ ಬಿಬಿಎಂಪಿಯು ಹಗಲು ದರೋಡೆಗೆ ಇಳಿದಿದೆ’ ಎಂದೂ ಅವರು ದೂರಿದರು.
‘ಬಿಬಿಎಂಪಿಯ ಅಧಿಕಾರಿಗಳ ಬಳಿ ಈ ಬಗ್ಗೆ ವಿಚಾರಿಸಿದರೆ, ಸ್ಮಾರ್ಟ್ ಪಾರ್ಕಿಂಗ್ ನಿರ್ವಹಣೆಯ ಹೊಣೆಯನ್ನು ಖಾಸಗಿ ಏಜೆನ್ಸಿಗೆ ವಹಿಸಲಾಗಿದೆ ಎನ್ನುತ್ತಾರೆ. ಸಂಚಾರ ಪೊಲೀಸರ ಬಳಿಯೂ ಈ ಬಗ್ಗೆ ದೂರುವಂತಿಲ್ಲ. ಸುಮ್ಮನೆ ದಂಡ ಕಟ್ಟಿ ಹೋಗುವ ಪರಿಸ್ಥಿತಿ ಇದೆ. ಹಿರಿಯ ನಾಗರಿಕರಿಗೂ ಏಜೆನ್ಸಿಯ ಸಿಬ್ಬಂದಿ ವಿನಾಯಿತಿ ನೀಡುವುದಿಲ್ಲ’ ಎಂದು ಅವರು ಹೇಳಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.