ಶಿಕ್ಷಣ, ಆರೋಗ್ಯಕ್ಕೆ ಕ್ರೈಸ್ತರ ಕೊಡುಗೆ ಅನನ್ಯ: ಯು.ಟಿ.ಖಾದರ್

ಬೆಂಗಳೂರು: ‘ಮತ್ತೊಂದು ಧರ್ಮ ಹಾಗೂ ವ್ಯಕ್ತಿಗಳನ್ನು ನಿಂದಿಸುವುದೇ ದೇಶಪ್ರೇಮವೆಂದು ಕೆಲವರು ಭಾವಿಸಿದ್ದಾರೆ. ಶಿಕ್ಷಣ ಸಂಸ್ಥೆಗಳನ್ನು ಕಟ್ಟಿ ಸಮಾಜದಲ್ಲಿ ಬದಲಾವಣೆ ತರುವುದೇ ನೈಜ ದೇಶಪ್ರೇಮ’ ಎಂದು ವಿಧಾನಸಭಾಧ್ಯಕ್ಷ ಯು.ಟಿ.ಖಾದರ್ ಅಭಿಪ್ರಾಯಪಟ್ಟರು.

ನಗರದಲ್ಲಿ ಭಾನುವಾರ ನಡೆದ ಫೆಡರೇಷನ್‌ ಆಫ್‌ ಕೊಂಕಣಿ ಕಥೋಲಿಕ್‌ ಅಸೋಸಿಯೇಷನ್‌ನ ‘ಬೆಳ್ಳಿ ಹಬ್ಬ’ ಹಾಗೂ ಸಾಧಕರ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಅವರು ಮಾತನಾಡಿದರು.‌

‘ಸರ್ವ ಜನಾಂಗದ ವಿದ್ಯಾರ್ಥಿಗಳಿಗೆ ಶಿಕ್ಷಣ ಕೊಟ್ಟು ಬದಲಾವಣೆ ತರುವುದು ಮುಖ್ಯ. ಸರ್ವ ಜನರೂ ಬಲಿಷ್ಠರಾದರೆ ಮಾತ್ರವೇ ಆ ರಾಷ್ಟ್ರವು ಅಭಿವೃದ್ಧಿ ಹೊಂದಲು ಸಾಧ್ಯ’ ಎಂದು ಹೇಳಿದರು.

‘ರಾಜ್ಯದಲ್ಲಿ ಆರೋಗ್ಯ ಹಾಗೂ ಶಿಕ್ಷಣ ಕ್ಷೇತ್ರದ ಅಭಿವೃದ್ಧಿಗೆ ಕ್ರೈಸ್ತ ಸಮುದಾಯದ ಕೊಡಗು ಅಪಾರ. ಇದು ಬೇರೆ ಸಮಾಜಕ್ಕೂ ಮಾದರಿ. ಇದರ ಸೌಲಭ್ಯವನ್ನು ಎಲ್ಲ ಸಮಾಜಗಳೂ ಪಡೆದುಕೊಳ್ಳುತ್ತಿವೆ. ದಕ್ಷಿಣ ಕನ್ನಡ, ಬೆಂಗಳೂರು, ಮೈಸೂರು ಜಿಲ್ಲೆಗಳು ಶೈಕ್ಷಣಿಕ ಕ್ಷೇತ್ರದ ಸ್ವರ್ಗವಾಗಿದೆ. ಈ ಜಿಲ್ಲೆಗಳು ಅಭಿವೃದ್ಧಿ ಹೊಂದಲು ಹೆಚ್ಚಿನ ಶಿಕ್ಷಣ ಸಂಸ್ಥೆಗಳಿರುವುದೂ ಮತ್ತೊಂದು ಕಾರಣವಾಗಿದೆ’ ಎಂದು ಹೇಳಿದರು.

ಇದೇ ವೇಳೆ ಜೀವಮಾನ ಸಾಧನೆಗೆ ಮಾನವ ಹಕ್ಕುಗಳ ಹೋರಾಟಗಾರ ಡಾ.ಕಿರಣ್‌ ಕಮಾಲ್‌ ಪ್ರಸಾದ್‌, ವೃತ್ತಿಪರ ಸಾಧನೆ ಪುರಸ್ಕಾರವನ್ನು ಬರಹಗಾರ ಸ್ಟೀಫನ್‌ ಖ್ವಾಡ್ರೋಸ್‌, ವರ್ಷದ ಉದ್ಯಮಿ ಪ್ರಶಸ್ತಿಯನ್ನು ಮೈಕಲ್ ಡಿಸೋಜ ಅವರಿಗೆ ಪ್ರದಾನ ಮಾಡಲಾಯಿತು. ಬಳ್ಳಾರಿ ಬಿಷಪ್‌ ಹೆನ್ರಿ ಡಿಸೋಜಾ, ಸಿಲ್ವಿಯನ್‌ ನೊರೋನ, ಡಾ.ಎಡ್ವರ್ಡ್‌ ಆನಂದ್ ಡಿಸೋಜಾ, ಆಂಥೋಣಿ ಗೋನ್ಸಾಲ್ವೆಸ್ ಇದ್ದರು.

ಇಂಧನ ಸಚಿವ ಕೆ.ಜೆ.ಜಾರ್ಜ್‌ ಇದ್ದರು.