ಉಬರ್ ಕ್ಯಾಬ್‍ಗಳಲ್ಲಿ ಪ್ಲಾಸ್ಟಿಕ್ ತಡೆಗೋಡೆ

ಬೆಂಗಳೂರು: ‘ಉಬರ್’ ಕ್ಯಾಬ್‍ಗಳಲ್ಲಿ ಚಾಲಕರು ಹಾಗೂ ಗ್ರಾಹಕರ ನಡುವೆ ಅಂತರ ಕಾಯ್ದುಕೊಳ್ಳುವ ಸಲುವಾಗಿ ಪ್ಲಾಸ್ಟಿಕ್ ಕವರ್ ಮಾದರಿಯ ಹೊದಿಕೆಯನ್ನು ಕಾರಿನ ಒಳಭಾಗದಲ್ಲಿ ಅಳವಡಿಸಲಾಗಿದೆ.

‘ಪಾರದರ್ಶಕವಾಗಿರುವ ಈ ಪ್ಲಾಸ್ಟಿಕ್ ಹೊದಿಕೆ ಚಾಲಕರ ಆಸನಗಳನ್ನು ಸುತ್ತುವರಿದಿದ್ದು, ಸೇವೆ ಬಳಸುವವರು ಚಾಲಕರನ್ನು ಕಾಣಲು, ಮಾತನಾಡಿಸಲು ಅನುಕೂಲವಾಗಿದೆ. ಚಾಲಕ ಹಾಗೂ ಹಿಂಬದಿ ಪ್ರಯಾಣಿಕರ ನಡುವೆ ರಕ್ಷಣಾತ್ಮಕ ತಡೆಗೋಡೆಯಾಗಿ ಕಾರ್ಯನಿರ್ವಹಿಸುತ್ತದೆ. ಸುರಕ್ಷತಾ ಕ್ರಮಗಳ ಪಾಲನೆಗೆ ಚಾಲಕರಿಗೆ ವಿಶೇಷ ತರಬೇತಿ ನೀಡಲಾಗಿದೆ. ಪ್ರತಿ ಪ್ರಯಾಣದ ನಂತರ ಕಾರುಗಳಿಗೆ ಸೋಂಕು ನಿವಾರಕ ಸಿಂಪಡಿಲಾಗುತ್ತಿದೆ. ಪ್ರಯಾಣದ ವೇಳೆ ಮಾಸ್ಕ್ ಧರಿಸುವುದು, ಸ್ಯಾನಿಟೈಸರ್ ಬಳಕೆ ಹಾಗೂ ಅಂತರ ಕಾಯ್ದುಕೊಳ್ಳುವ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸಲಾಗುತ್ತಿದೆ’ಎಂದು ಉಬರ್ ಸಂಸ್ಥೆ ತಿಳಿಸಿದೆ.

‘ಲಾಕ್‍ಡೌನ್ ಸಂದರ್ಭದಲ್ಲಿ ಸಂಸ್ಥೆಯ ಕ್ಯಾಬ್‍ಗಳು ಬೆಂಗಳೂರು, ಹೈದರಾಬಾದ್, ಮುಂಬೈ, ನಾಸಿಕ್ ಸೇರಿ ಒಂಬತ್ತು ಪ್ರಮುಖ ನಗರಗಳಲ್ಲಿ ಅಗತ್ಯ ಇರುವವರನ್ನು ಆಸ್ಪತ್ರೆಗಳಿಗೆ ಕರೆದೊಯ್ಯುವುದು ಹಾಗೂ ವೈದ್ಯಕೀಯ ಉದ್ದೇಶಗಳಿಗಾಗಿ ತುರ್ತು ಸೇವೆ ನೀಡಿವೆ. ಒಂದು ಸಾವಿರಕ್ಕೂ ಹೆಚ್ಚು ಆಸ್ಪತ್ರೆಗಳು ಈ ಸೇವೆ ಪಡೆದಿದ್ದು, ಈವರೆಗೆ 13 ಸಾವಿರಕ್ಕೂ ಹೆಚ್ಚು ಮಂದಿ ಇದರ ಸದುಪಯೋಗ ಪಡೆದು
ಕೊಂಡಿದ್ದಾರೆ'ಎಂದು ತಿಳಿಸಿದೆ.