ಕತ್ತು ಕೊಯ್ದು ಮಹಿಳೆ ಹತ್ಯೆ

ಬೆಂಗಳೂರು: ಎಲೆಕ್ಟ್ರಾನಿಕ್ ಸಿಟಿ ಠಾಣೆ ವ್ಯಾಪ್ತಿಯ ಮನೆಯೊಂದರಲ್ಲಿ ಶಾಹಿನಾ ತಾಜ್ (40) ಎಂಬುವರನ್ನು ಶನಿವಾರ ಕತ್ತು ಕೊಯ್ದು ಕೊಲೆ ಮಾಡಲಾಗಿದೆ.

‘ಬೇಗೂರು ಸುಭಾಷ್‌ನಗರದಲ್ಲಿ ಶಾಹಿನಾ ತಾಜ್‌ ಹಾಗೂ ಪತಿ ಚಾಂದ್ ಪಾಷಾ ವಾಸವಿದ್ದರು. ಆಟೊ ಚಾಲಕರಾಗಿದ್ದ ಚಾಂದ್, ಶನಿವಾರ ಬೆಳಿಗ್ಗೆ ಎಂದಿನಂತೆ ಕೆಲಸಕ್ಕೆ ಹೋಗಿದ್ದಾಗ ಈ ಘಟನೆ ನಡೆದಿದೆ’ ಎಂದು ಪೊಲೀಸರು ಹೇಳಿದರು.

‘ಮನೆಯಲ್ಲಿ ಶಾಹಿನಾ ಒಬ್ಬರೇ ಇರುವುದನ್ನು ತಿಳಿದುಕೊಂಡ ದುಷ್ಕರ್ಮಿಗಳು, ಮನೆಯೊಳಗೆ ನುಗ್ಗಿದ್ದಾರೆ. ನಂತರ ಶಾಹಿನಾ ಅವರ ಮೇಲೆ ಹಲ್ಲೆ ಮಾಡಿ ಚೂಪಾದ ಆಯುಧದಿಂದ ಕತ್ತು ಕೊಯ್ದಿದ್ದಾರೆ. ತೀವ್ರ ರಕ್ತಸ್ರಾವದಿಂದಾಗಿ ಶಾಹಿನಾ ಸ್ಥಳದಲ್ಲೇ ಮೃಪತಟ್ಟಿದ್ದಾರೆ’ ಎಂದೂ ತಿಳಿಸಿದರು.

‘ಕೆಲಸಕ್ಕೆ ಹೋಗಿದ್ದ ಚಾಂದ್, ರಾತ್ರಿ ಮನೆಗೆ ಬಂದಿದ್ದರು. ಬೆಡ್‌ ಮೇಲೆ ಶಾಹಿನಾ ಮೃತದೇಹವಿತ್ತು. ಅದನ್ನು ನೋಡಿದ್ದ ಅವರು ಠಾಣೆಗೆ ಮಾಹಿತಿ ನೀಡಿದ್ದರು. ಸ್ಥಳಕ್ಕೆ ಹೋಗಿ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ಆಸ್ಪತ್ರೆಗೆ ಕಳುಹಿಸಲಾಗಿದೆ’ ಎಂದೂ ಹೇಳಿದರು.

‘ಪರಿಚಯಸ್ಥರೇ ಮನೆಗೆ ಬಂದು ಕೃತ್ಯ ಎಸಗಿ ಪರಾರಿಯಾಗಿರುವ ಅನುಮಾನವಿದೆ. ಮನೆ ಅಕ್ಕ–ಪಕ್ಕದ ಸಿ.ಸಿ.ಟಿ.ವಿ ಕ್ಯಾಮೆರಾ ಡಿವಿಆರ್ ಪಡೆದು ಪರಿಶೀಲನೆ ನಡೆಲಾಗುತ್ತಿದೆ’ ಎಂದೂ ಪೊಲೀಸರು ತಿಳಿಸಿದರು.