ಬೀದರ್ | ವೃದ್ಧರೂ, ವಿದ್ಯಾರ್ಥಿಗಳೂ ನಿತ್ಯ 3 ಕಿ.ಮೀ. ನಡಿಯಬೇಕು

ಕಮಲನಗರ: ಸುಮಾರು 10 ವರ್ಷಗಳಿಂದ ಸೂಕ್ತ ಬಸ್‌ ವ್ಯವಸ್ಥೆಯಿಲ್ಲದ ಕಾರಣ ಇಲ್ಲಿನ ಗ್ರಾಮಸ್ಥರು ಹಾಗೂ ವಿದ್ಯಾರ್ಥಿಗಳಿಗೆ ಶಾಲಾ-ಕಾಲೇಜಿಗೆ ತೆರಳಲು, ತಾಲ್ಲೂಕು ಕೇಂದ್ರದಲ್ಲಿ ತಮ್ಮ ವೈಯಕ್ತಿಕ ಕೆಲಸಗಳಿಗಾಗಿ ತೆರಳಲು ಕಾಲ್ನಡಿಗೆ ಅನಿವಾರ್ಯವಾಗಿದೆ.

ತಲುಪಬೇಕಾದ ಸ್ಥಳಕ್ಕೆ ಹೋಗಲು ತಮ್ಮ ಬಹುತೇಕ ಸಮಯವನ್ನು ನಡಿಗೆಗಾಗಿಯೇ ವ್ಯಯಿಸಬೇಕಾಗಿದೆ. ಇದರಿಂದ ವಿದ್ಯಾರ್ಥಿಗಳ ಓದಿನ ಮೇಲೂ ಪರಿಣಾಮ ಬೀರುತ್ತಿದೆ.

ತಾಲ್ಲೂಕಿನ ಬಾಲೂರ(ಕೆ), ಮುರುಗ(ಕೆ) ಗ್ರಾಮಗಳ ಗ್ರಾಮಸ್ಥರು, ವಿದ್ಯಾರ್ಥಿಗಳು ಪ್ರತಿ ನಿತ್ಯ 3 ಕಿ.ಮೀ. ದೂರವನ್ನು ನಡಿದೇ ಸಾಗಬೇಕು. ಕಮಲನಗರದಿಂದ ಬಾಲೂರ(ಕೆ) 3 ಕಿ.ಮೀ. ಹಾಗೂ ಮುರುಗ(ಕೆ) 1 ಕಿ.ಮೀ. ಅಂತರದಲ್ಲಿವೆ. ಎರಡೂ ಗ್ರಾಮಗಳು ಸೇರಿ ಸುಮಾರು 2ರಿಂದ 3 ಸಾವಿರಕ್ಕೂ ಅಧಿಕ ಜನಸಂಖ್ಯೆ ಇದೆ. ಗ್ರಾಮಸ್ಥರು ತಮ್ಮ ಕೆಲಸ ಕಾರ್ಯಗಳನ್ನು ಮಾಡಿಕೊಳ್ಳಬೇಕಾದರೆ ಕಮಲನಗರ ತಾಲ್ಲೂಕು ಕೇಂದ್ರಕ್ಕೆ ತೆರಳಬೇಕು. ಬಸ್ ಸೌಕರ್ಯವಿಲ್ಲ. ಈ ಸಂಬಂಧ ಹಲವು ಬಾರಿ ಜನಪ್ರತಿನಿಧಿಗಳು, ಅಧಿಕಾರಿಗಳಿಗೆ ಮನವಿ ಮಾಡಿದರೂ ಪ್ರಯೋಜನವಾಗಿಲ್ಲ ಎನ್ನುವುದು ಗ್ರಾಮಸ್ಥರ ಅಳಲು.

ಹತ್ತು ವರ್ಷಗಳಿಂದ ಸಾರಿಗೆ ವ್ಯವಸ್ಥೆ ಇಲ್ಲ. 6 ತಿಂಗಳ ಹಿಂದೆ ಕಲ್ಯಾಣ ಕರ್ನಾಟಕ ಸಾರಿಗೆ ಸಂಸ್ಥೆ ಬಸ್ ಹೋರಂಡಿ ಮಾರ್ಗವಾಗಿ ಬಾಲೂರ(ಕೆ), ಮುರುಗ(ಕೆ) ಗ್ರಾಮದಿಂದ ಕಮಲನಗರಕ್ಕೆ ಬೆಳಿಗ್ಗೆ-ಸಂಜೆ ಎರಡು ಬಾರಿಯಂತೆ ಸುಮಾರು ಒಂದು ತಿಂಗಳು ಸಂಚರಿಸಿತ್ತು. ನಂತರ ತದನಂತರ ಇದೀಗ ಮತ್ತೆ ಬಸ್ ವ್ಯವಸ್ಥೆ ಇಲ್ಲದಂತಾಗಿದೆ. ಬಸ್ ಅವ್ಯವಸ್ಥೆಯಿಂದ ವೃದ್ಧರು, ಶಾಲಾ–ಕಾಲೇಜು ವಿದ್ಯಾರ್ಥಿಗಳು ತೊಂದರೆ ಅನುಭವಿಸುವಂತಾಗಿದೆ ಎಂದು ಗ್ರಾಮಸ್ಥರಾದ ಶಿವಕುಮಾರ ಸಿರಸಗೆ, ಅವಿನಾಶ ಮೇತ್ರೆ, ಬಾಲಾಜಿ ಪಾಟೀಲ ಬೇಸರ ವ್ಯಕ್ತಪಡಿಸಿದರು.

ಕೂಡಲೇ ಸಂಬಂಧಪಟ್ಟ ಈಶಾನ್ಯ ಸಾರಿಗೆ ಸಂಸ್ಥೆ ಅಧಿಕಾರಿಗಳು ಬಾಲೂರ(ಕೆ), ಮುರುಗ(ಕೆ) ಗ್ರಾಮಕ್ಕೆ ಬಸ್ ವ್ಯವಸ್ಥೆ ಮಾಡಬೇಕು. ಇಲ್ಲದಿದ್ದರೆ ಮುಂಬರುವ ದಿನಗಳಲ್ಲಿ ಪ್ರತಿಭಟನೆ ನಡೆಸಲಾಗುವುದು ಎಂದು ಯುವರಾಜ ಬಿರಾದಾರ, ನೇತಾಜಿ ಪಾಟೀಲ, ವಿಜು ಮುರ್ಕೆ ಎಚ್ಚರಿಕೆ ನೀಡಿದ್ದಾರೆ.