ಬೀದರ್ ಜಿಲ್ಲೆಯಲ್ಲಿ ₹ 1 ಕೋಟಿ ದೇಣಿಗೆ ಸಂಗ್ರಹ: ರಾಜೇಂದ್ರಕುಮಾರ ಗಂದಗೆ

ಬೀದರ್: ಜಿಲ್ಲೆಯ ರಾಜ್ಯ ಸರ್ಕಾರಿ ನೌಕರರು ತಮ್ಮ ವೇತನದಲ್ಲಿ ದೇಣಿಗೆ ಹಣ ಕಡಿತಗೊಳಿಸುವ ಮೂಲಕ ರಾಜ್ಯ ಸರ್ಕಾರದ ಮಹತ್ವಾಕಾಂಕ್ಷಿ ಪುಣ್ಯಕೋಟಿ ದತ್ತು ಯೋಜನೆಗೆ ಕೈಜೋಡಿಸಿದ್ದಾರೆ.

ರಾಜ್ಯ ಸರ್ಕಾರಿ ನೌಕರರ ವೇತನದ ₹ 70 ಲಕ್ಷ ಹಾಗೂ ಅನುದಾನಿತ ಶಾಲಾ, ಕಾಲೇಜುಗಳ ನೌಕರರ ದೇಣಿಗೆ ಹಣ ಸೇರಿದಂತೆ ಜಿಲ್ಲೆಯಲ್ಲಿ ಯೋಜನೆಗೆ ಸುಮಾರು ₹ 1 ಕೋಟಿ ದೇಣಿಗೆ ಸಂಗ್ರಹವಾಗಿದೆ ಎಂದು ರಾಜ್ಯ ಸರ್ಕಾರಿ ನೌಕರರ ಸಂಘದ ರಾಜ್ಯ ಉಪಾಧ್ಯಕ್ಷ ರಾಜೇಂದ್ರಕುಮಾರ ಗಂದಗೆ ತಿಳಿಸಿದ್ದಾರೆ.

ಯೋಜನೆಗೆ ನವೆಂಬರ್‍ನಲ್ಲಿ ₹ 26,44,800 ಹಾಗೂ ಡಿಸೆಂಬರ್‌ನಲ್ಲಿ ₹ 43,61,400 ಸೇರಿದಂತೆ ಒಟ್ಟು ₹ 70,06,200 ಸಂಗ್ರಹವಾಗಿದೆ. ಈ ಪೈಕಿ ಔರಾದ್ ತಾಲ್ಲೂಕಿನಿಂದ 8,62,700, ಬಸವಕಲ್ಯಾಣದಿಂದ ₹ 12,03,900, ಭಾಲ್ಕಿಯಿಂದ 10,06,800, ಬೀದರ್‍ನಿಂದ ₹ 26,68,200, ಚಿಟಗುಪ್ಪದಿಂದ ₹ 2,44,800, ಹುಮನಾಬಾದ್‍ನಿಂದ ₹ 7,73,200, ಕಮಲನಗರದಿಂದ ₹ 1,82,400 ಹಾಗೂ ಹುಲಸೂರು ತಾಲ್ಲೂಕಿನಿಂದ ₹ 64,200 ಸಂಗ್ರಹವಾಗಿದೆ ಎಂದು ಹೇಳಿದ್ದಾರೆ.

ಎ ದರ್ಜೆ ನೌಕರರು ಯೋಜನೆಗೆ ₹ 11 ಸಾವಿರ, ಬಿ ದರ್ಜೆ ನೌಕರರು ₹ 4 ಸಾವಿರ ಹಾಗೂ ಸಿ ದರ್ಜೆ ನೌಕರರು ₹ 400 ದೇಣಿಗೆ ಕೊಟ್ಟಿದ್ದಾರೆ ಎಂದು ಹೇಳಿದ್ದಾರೆ.

ರಾಜ್ಯ ಸರ್ಕಾರ ನೌಕರರ ಬಹುತೇಕ ಬೇಡಿಕೆಗಳನ್ನು ಈಡೇರಿಸಿದೆ. ಹೀಗಾಗಿ ಸರ್ಕಾರದ ಯೋಜನೆಗೆ ಕೈಜೋಡಿಸುವುದು ನೌಕರರ ಕರ್ತವ್ಯವಾಗಿದೆ. ದೇಣಿಗೆ ನೀಡುವ ಮೂಲಕ ಸರ್ಕಾರದ ಆಶಯ ಸಾಕಾರಕ್ಕೆ ಸಹಕರಿಸಿದ ಜಿಲ್ಲೆಯ ನೌಕರರಿಗೆ ಕೃತಜ್ಞತೆ ಸಲ್ಲಿಸಲಾಗುವುದು ಎಂದು ತಿಳಿಸಿದ್ದಾರೆ.