ಡೋಣಗಾಂವ(ಎಂ)-–ಮುರ್ಕಿ ರಸ್ತೆ ಹಾಳು: ಸಂಚಾರಕ್ಕೆ ತೊಂದರೆ

ಕಮಲನಗರ: ತಾಲ್ಲೂಕಿನ ಡೋಣಗಾಂವ(ಎಂ)-ಮುರ್ಕಿ ಗ್ರಾಮಕ್ಕೆ ಸಂಪರ್ಕ ಕಲ್ಪಿಸುವ ಮುಖ್ಯ ರಸ್ತೆಗೆ ಹೊಂದಿಕೊಂಡಿರುವ  ಮಹಾಳಪ್ಪಯ್ಯ ದೇವಸ್ಥಾನದವರೆಗಿನ 2 ಕಿ.ಮೀ ರಸ್ತೆ ಸಂಪೂರ್ಣ ಹದಗೆಟ್ಟಿದೆ. ರಸ್ತೆ ತುಂಬ ತಗ್ಗು, ಗುಂಡಿಗಳೇ ತುಂಬಿದ್ದು ವಾಹನ ಸವಾರರು, ಜನರ ಸಂಚಾರಕ್ಕೆ  ತೊಂದರೆಯಾಗಿದೆ.

ರಸ್ತೆಯ ಡಾಂಬರ್‌ ಕಿತ್ತಿದ್ದರಿಂದ ಬಹುತೇಕ ಕಡೆ ಹಾಕಲಾಗಿದ್ದ ಜಲ್ಲಿಕಲ್ಲು ಈಗ ರಸ್ತೆ ತುಂಬ ಹರಡಿ ಸಂಚಾರಕ್ಕೆ ತೊಂದರೆಯಾಗಿದೆ. ನಿತ್ಯ ನೂರಾರು ಪ್ರಯಾಣಿಕರು ಇದೇ ರಸ್ತೆಯಿಂದ ಮುರ್ಕಿ ಹಾಗೂ ಮಹಾರಾಷ್ಟ್ರದ ಉದಗೀರ್ ಪಟ್ಟಣಕ್ಕೆ ತೆರಳುತ್ತಾರೆ. ವಾಹನಗಳೂ ಇದೇ ಮಾರ್ಗವಾಗಿ ಸಂಚರಿಸುತ್ತವೆ.

ಡೋಣಗಾಂವ(ಎಂ) ಗ್ರಾಮದ ಸಮೀಪದ ಮಹಾಳಪ್ಪಯ್ಯಾ ದೇವಸ್ಥಾನದಲ್ಲಿ ಪ್ರತಿ ವರ್ಷ ಗೌರಿ ಹುಣ್ಣಿಮೆಯಂದು ಅದ್ದೂರಿಯಾಗಿ ಜಾತ್ರಾ ಮಹೋತ್ಸವ ನಡೆಯುತ್ತದೆ. ಸಾವಿರಾರು ಭಕ್ತರು ಆಗಮಿಸುತ್ತಾರೆ. ಪ್ರತಿ ಅಮಾವಾಸ್ಯೆ, ಶ್ರಾವಣ ಮಾಸದಲ್ಲಿ ದಿನನಿತ್ಯ ನೂರಾರು ಭಕ್ತರು ಮಹಾಳಪ್ಪಯ್ಯ ಮಂದಿರಕ್ಕೆ ಬರುತ್ತಾರೆ. ಹದಗೆಟ್ಟ ರಸ್ತೆಯಲ್ಲಿ ಸಂಚರಿಸಲು ಭಕ್ತರು ಹರಸಾಹಸ ಪಡಬೇಕಾಗಿದೆ.

ಕೂಡಲೇ ಸಂಬಂಧಿತ ಅಧಿಕಾರಿಗಳು ಇತ್ತ ಗಮನ ಹರಿಸಿ ಹೊಸ ರಸ್ತೆ ಮಾಡಿಸಿ ಪ್ರಯಾಣಿಕರ, ಭಕ್ತರ ಸುಗಮ ಸಂಚಾರಕ್ಕೆ ಅನುಕೂಲ ಮಾಡಿಕೊಡಬೇಕು ಎಂದು ಗ್ರಾಮಸ್ಥರಾದ ಗಣೇಶ ಕಾರೆಗಾವೆ, ಅಪ್ಪಾಸಾಬ ದೇಶಮುಖ, ರಾಜಕುಮಾರ ಕಾಳಗಾಪೂರೆ, ವಿಜಯಕುಮಾರ ದೇಶಮುಖ, ಬಾಲಾಜಿ ದೇಶಮುಖ, ಶೈಲೇಶ ದೇಶಮುಖ, ವಿಶಾಲ ದೇಶಮುಖ, ಬಾಲಾಜಿ ಪೇನೆ, ಸಂಗಮೇಶ ವಲ್ಲೂರೆ, ಪ್ರವೀಣ ಹೊಂಡಾಳೆ ಆಗ್ರಹಿಸಿದ್ದಾರೆ.