ಭಾಲ್ಕಿ | ಎಂಜಿನ್‌ನಲ್ಲಿ ಬೆಂಕಿ: ಐಷಾರಾಮಿ ಕಾರು ಭಸ್ಮ

ಭಾಲ್ಕಿ: ತಾಲ್ಲೂಕಿನ ನೀಲಮನಳ್ಳಿ ತಾಂಡಾ ಬಳಿ ರೇಂಜ್ ರೋವರ್ ಕಾರಿನಲ್ಲಿ ಮಂಗಳವಾರ ಬೆಂಕಿ ಕಾಣಿಸಿಕೊಂಡು ಸಂಪೂರ್ಣ ಸುಟ್ಟು ಹೋಗಿದೆ.

ಬೀದರ್‌ನ ಕೆಇಬಿ ಕಾಲೊನಿ ನಿವಾಸಿ ರಾಜಶೇಖರ ಪಾಟೀಲ ತಮ್ಮ ರೇಂಜ್ ರೋವರ್ ಕಾರಿನಲ್ಲಿ ಹುಮನಾಬಾದ್‌ನಿಂದ ಬೀದರ್ ಕಡೆಗೆ ಬರುತ್ತಿದ್ದಾಗ ಎಂಜಿನ್‌ನಲ್ಲಿ ಬೆಂಕಿ ಕಾಣಿಸಿಕೊಂಡಿದೆ. ಇದನ್ನು ಗಮನಿಸಿದ ಅವರು ಕೂಡಲೇ ಕಾರನ್ನು ನೀಲಮನಹಳ್ಳಿ ತಾಂಡಾದ ಬಳಿ ರಸ್ತೆ ಪಕ್ಕಕ್ಕೆ ನಿಲ್ಲಿಸಿ ಕೆಳಗಿಳಿದಿದ್ದಾರೆ. ಕೆಲವೇ ನಿಮಿಷಗಳಲ್ಲಿ ಬೆಂಕಿ ಸಂಪೂರ್ಣ ಕಾರಿಗೆ ಆವರಿಸಿದೆ. ಅಗ್ನಿಶಾಮಕ ಸಿಬ್ಬಂದಿ ಬಂದು ನೀರು ಮತ್ತು ನೊರೆಯ ಮೂಲಕ ಬೆಂಕಿ ನಂದಿಸುವುದರ ಒಳಗೆ ಕಾರು ಸಂಪೂರ್ಣ ಸುಟ್ಟು ಹೋಗಿದೆ ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದರು.

ಬೆಂಕಿ ನಂದಿಸಲು ಬೀದರ್ ಅಗ್ನಿಶಾಮಕ ಠಾಣಾಧಿಕಾರಿ ನವೀನ್ ಬಾಬು, ಸಿಬ್ಬಂದಿಗಳಾದ ರವಿ, ಶ್ರೀಕಾಂತ, ಸೆಲ್ವಿನ್, ಲಕ್ಷ್ಮಿಪುತ್ರ ಶ್ರಮಿಸಿದರು.