ಬದಲಾದ ಜೀವನಶೈಲಿ; ಹೃದಯಾಘಾತ ಹೆಚ್ಚಳ: ಡಾ. ನಿತಿನ್‌ ಗುದಗೆ ಅಭಿಪ್ರಾಯ

ಬೀದರ್‌: ‘ಜನರ ಜೀವನಶೈಲಿಯಲ್ಲಿ ಬದಲಾವಣೆ ಆಗಿರುವುದಕ್ಕೆ ಹೃದಯಾಘಾತದಿಂದ ಸಾವನ್ನಪ್ಪುವವರ ಸಂಖ್ಯೆ ಹೆಚ್ಚಳವಾಗಿದೆ’ ಎಂದು ಕಾರ್ಡಿಯೊಲಜಿಸ್ಟ್‌ ಡಾ. ನಿತಿನ್‌ ಗುದಗೆ ತಿಳಿಸಿದರು.

ನಗರದಲ್ಲಿ ಶನಿವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಹಿಂದೆ ವಯಸ್ಸಾದವರಲ್ಲಿ ಈ ಪ್ರಮಾಣ ಹೆಚ್ಚಿತ್ತು. ಈಗ ಯುವಕರಲ್ಲೂ ಕಾಣಿಸಿಕೊಂಡಿದೆ. ವಯಸ್ಸಾದವರೇ ಕಿರಿಯರನ್ನು ಆಸ್ಪತ್ರೆಗೆ ಕರೆದುಕೊಂಡು ಬರುವ ಸನ್ನಿವೇಶ ಸೃಷ್ಟಿಯಾಗಿದೆ ಎಂದು ಹೇಳಿದರು.

ಕೆಲಸದ ಸ್ಥಳದಲ್ಲಿ ಒತ್ತಡ ಹೆಚ್ಚಾಗಿದೆ. ಆರ್ಥಿಕ ಒತ್ತಡ, ಕುಟುಂಬದ ಒತ್ತಡ, ತನ್ನ ವೃತ್ತಿಯಲ್ಲಿ ಅತ್ಯುತ್ತಮವಾದುದ್ದನ್ನು ಸಾಧಿಸಬೇಕೆಂಬ ಒತ್ತಡ ಹೆಚ್ಚಾಗಿದೆ. ಇತ್ತೀಚಿನ ದಿನಗಳಲ್ಲಿ ಪ್ರತಿಯೊಬ್ಬರೂ ಮೊಬೈಲ್‌ನಲ್ಲಿ ಹೆಚ್ಚಾಗಿ ಕಾಲ ಕಳೆಯುತ್ತಿದ್ದಾರೆ. ಆದರೆ, ಎರಡು ಗಂಟೆಗೂ ಹೆಚ್ಚು ಸಮಯ ಮೊಬೈಲ್‌ ಅಥವಾ ಟಿವಿ ಪರದೆ ನೋಡುತ್ತ ಕೂರುವುದು ಆರೋಗ್ಯಕ್ಕೆ ಒಳ್ಳೆಯದಲ್ಲ ಎಂದರು.

ಮನೆಯ ಆಹಾರ ತೊರೆದು ಹೊರಗಿನ ಜಂಕ್‌ಫುಡ್‌, ಕರಿದ ಪದಾರ್ಥಗಳನ್ನು ಹೆಚ್ಚಿಗೆ ಸೇವಿಸುತ್ತಿದ್ದೇವೆ. ಕುಟುಂಬದ ಸದಸ್ಯರೊಂದಿಗೆ ನಗುನಗುತ್ತ ಕಾಲ ಕಳೆಯುವುದನ್ನು ಮರೆತಿದ್ದೇವೆ. ದೈಹಿಕ ಚಟುವಟಿಕೆ ಬಹಳ ಕಡಿಮೆ ಆಗಿದೆ. ಆದಕಾರಣ ರೋಗಗಳನ್ನು ನಾವೇ ಆಹ್ವಾನಿಸಿಕೊಳ್ಳುತ್ತಿದ್ದೇವೆ. ವರ್ಷದಲ್ಲೊಮ್ಮೆ ‘ಹೆಲ್ತ್‌ ಆ್ಯನಿವರ್ಸರಿ’ ಹೆಸರಿನಲ್ಲಿ ಕುಟುಂಬದ ಎಲ್ಲ ಸದಸ್ಯರು ಆರೋಗ್ಯ ಪರೀಕ್ಷೆ ಮಾಡಿಸಿಕೊಳ್ಳಬೇಕು. ಆರಂಭದಲ್ಲಿ ರೋಗ ಪತ್ತೆಯಾದರೆ ಬೇರು ಸಮೇತ ಕಿತ್ತು ಹಾಕಬಹುದು ಎಂದು ತಿಳಿಸಿದರು.

ಭಾರತೀಯ ವೈದ್ಯಕೀಯ ಸಂಘ ಬೀದರ್‌ ಜಿಲ್ಲಾಧ್ಯಕ್ಷ ಡಾ. ವಿಜಯಕುಮಾರ ಕೋಟೆ ಮಾತನಾಡಿ, ಎಲ್ಲ ಶಾಲೆಗಳಲ್ಲಿ ಕನಿಷ್ಠ 45 ನಿಮಿಷ ಪಿಟಿ ಕ್ಲಾಸ್‌ ಮೀಸಲಿಡಬೇಕು. ಆಟದ ಮೈದಾನ, ಆಟದ ಪರಿಕರಗಳು ಇರುವ ಶಾಲಾ–ಕಾಲೇಜುಗಳಿಗೆ ಸರ್ಕಾರ ಅನುಮತಿ ಕೊಡಬೇಕು. ದೈಹಿಕ ಶಿಕ್ಷಣ ಪಠ್ಯದ ಭಾಗವಾಗಬೇಕು. ಈ ನಿಟ್ಟಿನಲ್ಲಿ ಐಎಮ್‌ಎ ಕೂಡ ಸರ್ಕಾರಕ್ಕೆ ಪತ್ರ ಬರೆಯಲಿದೆ ಎಂದು ಹೇಳಿದರು.

ಹೃದಯ ರೋಗಕ್ಕೆ ಯಾರೂ ಅನಗತ್ಯ ಭಯಪಡುವ ಅಗತ್ಯವಿಲ್ಲ. ಏನಾದರೂ ಸಮಸ್ಯೆ ಎದುರಾದರೆ ತಕ್ಷಣವೇ ಆಸ್ಪತ್ರೆಗೆ ಬರಬೇಕು. ಬೀದರ್‌ನಲ್ಲಿ ಸದ್ಯ ಐದು ಕ್ಯಾಥ್‌ಲ್ಯಾಬ್‌ಗಳು ಕೆಲಸ ನಿರ್ವಹಿಸುತ್ತಿವೆ. ಬ್ರಿಮ್ಸ್‌ನಲ್ಲೂ ಶೀಘ್ರದಲ್ಲೇ ಕ್ಯಾಥ್‌ಲ್ಯಾಬ್‌ ಕೆಲಸ ಆರಂಭಿಸಲಿದೆ ಎಂದರು.

ಡಾ. ಸಂಜೀವ ರೆಡ್ಡಿ, ಡಾ. ಶರದ್‌ ಮಸೂದೆ, ಡಾ. ಮಹೇಶ ತೊಂಡ್ರೆ, ಡಾ. ಸಂತೋಷ ಇದ್ದರು.