ಜನವಾಡ | ಅಂಗನವಾಡಿ ಕೇಂದ್ರಗಳಿಗೆ ಭೇಟಿ: ಪರಿಶೀಲನೆ

ಜನವಾಡ: ಅಂಗನವಾಡಿ ಕೇಂದ್ರಗಳ ಪುನಃಶ್ಚೇತನದ ಭಾಗವಾಗಿ ಶಿಶು ಅಭಿವೃದ್ಧಿ ಯೋಜನಾಧಿಕಾರಿ ಕಚೇರಿಯ 15 ಪ್ರತ್ಯೇಕ ತಂಡಗಳಿಂದ ಬೀದರ್ ತಾಲ್ಲೂಕಿನ ವಿವಿಧ ಅಂಗನವಾಡಿ ಕೇಂದ್ರಗಳಿಗೆ ಮಂಗಳವಾರ ಭೇಟಿ ನೀಡಿ ಪರಿಶೀಲನೆ ನಡೆಸಲಾಯಿತು.

ತಂಡದ ಸದಸ್ಯರು ಮರಕಲ್, ಜನವಾಡ, ಚಿಲ್ಲರ್ಗಿ, ಮನ್ನಳ್ಳಿ, ಕಮಠಾಣ, ಬಗದಲ್, ರಂಜೋಳಖೇಣಿ, ಪಾತರಪಳ್ಳಿ, ನಿಡವಂಚಾ ಸೇರಿದಂತೆ ವಿವಿಧ ಅಂಗನವಾಡಿ ಕೇಂದ್ರಗಳಿಗೆ ಭೇಟಿ ಕೊಟ್ಟರು.

ಕೇಂದ್ರಗಳಲ್ಲಿ ಪೋಷಣ್ ಟ್ರ್ಯಾಕರ್ ಬಳಕೆ, ದಾಖಲಾತಿ ನಿರ್ವಹಣೆ, ಶಾಲಾ ಪೂರ್ವ ಶಿಕ್ಷಣ ಅನುಷ್ಠಾನ, ಪೂರಕ ಪೌಷ್ಠಿಕ ಆಹಾರ ಸದ್ಬಳಕೆ ಸೇರಿದಂತೆ ಹಲವಾರು ವಿಚಾರಗಳ ಬಗ್ಗೆ ಪರಿಶೀಲನೆ ನಡೆಸಿದರು.

ಪ್ರಧಾನಮಂತ್ರಿ ಮಾತೃ ವಂದನ ಯೋಜನೆ ಸೌಲಭ್ಯಕ್ಕೆ ಅರ್ಹರಾದ ಫಲಾನುಭವಿಗಳ ಮನೆಗೂ ಭೇಟಿ ನೀಡಿದರು. ಯಾವುದೇ ನ್ಯೂನ್ಯತೆಗೆ ಅವಕಾಶ ಇಲ್ಲದಂತೆ ಕಾರ್ಯ ನಿರ್ವಹಿಸಲು ಕೇಂದ್ರಗಳ ಸಿಬ್ಬಂದಿಗೆ ಸೂಚನೆ ನೀಡಿದರು.