ಚಾಮರಾಜನಗರ | ಸಿಡಿಮದ್ದು ಸ್ಫೋಟ; ಜಾನುವಾರು ಜೀವಕ್ಕೆ ಕಂಟಕ

ಚಾಮರಾಜನಗರ: ಜಿಲ್ಲೆಯ ಕಾಡಂಚಿನ ಗ್ರಾಮಗಳಲ್ಲಿ ಕಾಡುಪ್ರಾಣಿಗಳನ್ನು ಬೇಟೆಯಾಡಲು ಕಿಡಿಗೇಡಿಗಳು ಇರಿಸುತ್ತಿರುವ ಸಿಡಿಮದ್ದುಗಳು ಜಾನುವಾರುಗಳ ಜೀವಕ್ಕೆ ಕುತ್ತಾಗಿ ಪರಿಣಮಿಸಿದೆ. ಹೊಲಗಳಿಗೆ ಮೇವು ಅರಸಿ ಬರುವ ಮುಗ್ಧ ಜಾನುವಾರುಗಳು ಆಹಾರದೊಳಗೆ ಅಡಗಿಸಿಟ್ಟ ಸಿಡಿಮದ್ದು ಜಗಿದು ಭೀಕರವಾಗಿ ಮೃತಪಡುತ್ತಿವೆ. 

ಮೂರು ತಿಂಗಳಲ್ಲಿ 10 ಪ್ರಕರಣ: ಪೊಲೀಸ್ ಇಲಾಖೆಯ ಅಂಕಿ ಅಂಶಗಳ ಪ್ರಕಾರ ಜಿಲ್ಲೆಯಲ್ಲಿ ಜನವರಿಯಿಂದ ಇಲ್ಲಿಯವರೆಗೂ 8 ಕಡೆಗಳಲ್ಲಿ ಸಿಡಿಮದ್ದು ಸ್ಫೋಟ ಸಂಭವಿಸಿದ್ದು, 10ಕ್ಕೂ ಹೆಚ್ಚು ಜಾನುವಾರುಗಳು ಪ್ರಾಣಬಿಟ್ಟಿವೆ. ಜನವರಿಯಲ್ಲಿ 4, ಫೆಬ್ರುವರಿಯಲ್ಲಿ 1, ಮಾರ್ಚ್‌ನಲ್ಲಿ 2 ಹಾಗೂ ಏಪ್ರಿಲ್‌ನಲ್ಲಿ 1 ಸ್ಫೋಟ ಪ್ರಕರಣಗಳು ನಡೆದಿರುವುದು ಪ್ರಕರಣದ ಗಂಭೀರತೆಗೆ ಸಾಕ್ಷಿಯಾಗಿದೆ.

ಎಲ್ಲೆಲ್ಲಿ ಸಿಡಿಮದ್ದು ಸ್ಫೋಟ: ಜ.14ರಂದು ಕೊಳ್ಳೇಗಾಲ ಠಾಣೆ ವ್ಯಾಪ್ತಿಯಲ್ಲಿ 1, ಜ.17ರಂದು ಹನೂರು ಠಾಣೆ ವ್ಯಾಪ್ತಿಯಲ್ಲಿ 1, ಜ.28ರಂದು ಕುದೇರು ಠಾಣೆ ವ್ಯಾಪ್ತಿಯ 2 ಕಡೆ, ಫೆ.20ರಂದು ರಾಮಾಪುರ ಠಾಣೆ ವ್ಯಾಪ್ತಿಯಲ್ಲಿ 1, ಮಾರ್ಚ್‌ 11 ಹಾಗೂ 31ರಂದು ಹನೂರು, ರಾಮಾಪುರ ಠಾಣೆ ವ್ಯಾಪ್ತಿಯಲ್ಲಿ ತಲಾ ಒಂದು, ಏ.2ರಂದು ರಾಮಾಪುರ ಠಾಣೆ ವ್ಯಾಪ್ತಿಯಲ್ಲಿ ಒಂದು ಕಡೆ ಸಿಡಿಮದ್ದು ಸ್ಫೋಟ ನಡೆದಿದ್ದು ಜಾನುವಾರುಗಳು ಸಾವನ್ನಪ್ಪಿವೆ. 

ಹೈನುಗಾರರಲ್ಲಿ ಆತಂಕ: ಜಿಲ್ಲೆಯಲ್ಲಿ ಸರಣಿ ಸ್ಫೋಟ ಪ್ರಕರಣಗಳು ಹೈನುಗಾರರಲ್ಲಿ ಆತಂಕ ಸೃಷ್ಟಿಸಿದೆ. ಕಾಡಂಚಿನ ಗ್ರಾಮಗಳಲ್ಲಿ ಹೈನುಗಾರರು ಜಾನುವಾರುಗಳನ್ನು ಮೇಯಲು ಹೊರಗೆ ಬಿಡಲು ಹೆದರುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಸ್ಫೋಟದ ಭಯದಿಂದ ರೈತರು ಜಮೀನು ಉಳುಮೆ ಮಾಡಲು ಹೆದರುತ್ತಿದ್ದಾರೆ.

ಆರ್ಥಿಕ ಸಂಕಷ್ಟ: ಜೀವನ ನಿರ್ವಹಣೆಗೆ ಕಟ್ಟಿಕೊಂಡಿದ್ದ ಹಸುಗಳು ಕಳೆದುಕೊಂಡು ಹೈನುಗಾರರು ಆರ್ಥಿಕ ಸಂಕಷ್ಟಕ್ಕೆ ಸಿಲುಕುತ್ತಿದ್ದಾರೆ. ಹಾಲು ಮಾರಿ ಬದುಕು ಕಟ್ಟಿಕೊಂಡಿದ್ದವರು ಬೀದಿಗೆ ಬೀಳುವಂತಹ ಪರಿಸ್ಥಿತಿಗೆ ಬಂದಿದ್ದಾರೆ. ಕನಿಷ್ಠ 40 ರಿಂದ 60 ಸಾವಿರ ಮೌಲ್ಯದ ಹಸುಗಳಿಗೆ ಸರ್ಕಾರ ನೀಡುವ ಬಿಡಿಗಾಸು (10,000) ಪರಿಹಾರ ಸಾಲದು ಎಂಬ ಅಸಮಾಧಾನ ಹೈನುಗಾರರದ್ದು.

ಮಾನಸಿಕ ವೇದನೆ: ಒಂದೆಡೆ ಆರ್ಥಿಕ ನಷ್ಟ ಮತ್ತೊಂದೆಡೆ ಮಾನಸಿಕ ವೇದನೆ ಹೈನುಗಾರರನ್ನು ಹೈರಾಣಾಗಿಸುತ್ತಿದೆ. ಪ್ರೀತಿಯಿಂದ ಸಾಕಿದ ಜಾನುವಾರುಗಳ ಬಾಯಿ ಸಿಡಿಮದ್ದು ಸ್ಫೋಟದಿಂದ ಛಿದ್ರವಾಗಿರುವುದನ್ನು ನೋಡಲಾಗದೆ ಕಣ್ಣೀರು ಹಾಕುತ್ತಿದ್ದಾರೆ. ಆಹಾರ ಸೇವಿಸಲಾಗದೆ ಅನುಭವಿಸುವ ಯಾತನೆ ಕಂಡು ಮಮ್ಮುಲ ಮರಗುತ್ತಿದ್ದಾರೆ. ಮನೆಯಲ್ಲಿ ಹುಟ್ಟಿ ಬೆಳೆದ ಜಾನುವಾರುಗಳು ಕಣ್ಣೆದುರೇ ಬಲಿಯಾಗುವುದನ್ನು ನೋಡುವುದು ತುಂಬಾ ನೋವಿನ ಕ್ಷಣ ಎನ್ನುತ್ತಾರೆ ರೈತ ಬಸವರಾಜಪ್ಪ.

ಕಡಿವಾಣ ಹಾಕಿ: ಕಿಡಿಗೇಡಿಗಳ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸಬೇಕು. ಸ್ಫೋಟಕ ಎಲ್ಲಿ ತಯಾರಾಗುತ್ತದೆ, ಕಚ್ಛಾವಸ್ತುಗಳು ಎಲ್ಲಿಂದ ಪೂರೈಕೆಯಾಗುತ್ತದೆ ಎಂಬುದನ್ನು ಪತ್ತೆ ಹಚ್ಚಬೇಕು. ಆರೋಪಿಗಳಿಂದಲೇ ದಂಡವಸೂಲಿ ಮಾಡಿ ಜಾನುವಾರು ಮಾಲೀಕರಿಗೆ ಪರಿಹಾರ ನೀಡಬೇಕು ಎಂದು ಒತ್ತಾಯಿಸುತ್ತಾರೆ ರೈತ ಮುಖಂಡರು.

ಹನೂರು ತಾಲ್ಲೂಕಿನಲ್ಲಿ ಹೆಚ್ಚು: ಜಿಲ್ಲೆಯಲ್ಲಿ ಸಂಭವಿಸಿರುವ ಹೆಚ್ಚಿನ ಸಿಡಿಮದ್ದು ಸ್ಫೋಟ ಪ್ರಕರಣಗಳು ಹನೂರು ತಾಲ್ಲೂಕಿನ ರಾಮಾಪುರ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ. ಬಹುಪಾಲು ಅರಣ್ಯ ಹೊಂದಿರುವ ಕಾರಣಕ್ಕೆ ಈ ಭಾಗದಲ್ಲಿ ಪ್ರಾಣಿಬೇಟೆ ಅವ್ಯಾಹತವಾಗಿ ನಡೆಯುತ್ತಿದ್ದು, ಇದರಿಂದ ಜಾನುವಾರುಗಳ ಜೀವಕ್ಕೂ ಮಾರಕವಾಗಿದೆ.

7 ಮಂದಿ ಬಂಧನ: ಪ್ರಕರಣದ ಗಂಭೀರತೆ ಅರಿತ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಬಿ.ಟಿ.ಕವಿತಾ ವಿಶೇಷ ತಂಡಗಳನ್ನು ರಚಿಸಿ ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಕುಣಗಳ್ಳಿಯ ರಾಮಶೆಟ್ಟಿ, ಸೋಮಣ್ಣ, ಶಿವಣ್ಣ, ನಾರಾಯಣಸ್ವಾಮಿ, ಭದ್ರಹಳ್ಳಿಯ ಶ್ರೀರಂಗಶೆಟ್ಟಿ, ಚಿಕ್ಕಲ್ಲತೂರಿನ ರುದ್ರ, ಜಡೆಯಪ್ಪ ಎಂಬುವರನ್ನು ಪೊಲೀಸರು ಬಂಧಿಸಿದ್ದು, ಮೂರು ಪ್ರಕರಣಗಳಲ್ಲಿ ಆರೋಪಿಗಳ ಪತ್ತೆ ಕಾರ್ಯ ನಡೆದಿದೆ.

ವನ್ಯಜೀವಿಗಳ ಪ್ರಾಣಕ್ಕೂ ಕುತ್ತು: ಸಿಡಿಮದ್ದುಗಳು ಜಾನುವಾರುಗಳಿಗೆ ಮಾತ್ರವಲ್ಲ ವನ್ಯಜೀವಿಗಳ ಪ್ರಾಣಕ್ಕೂ ಕುತ್ತಾಗಿದೆ. ಈಚೆಗಷ್ಟೆ ಹನೂರು ತಾಲ್ಲೂಕಿನ ಕಾವೇರಿ ವನ್ಯಧಾಮದ ಕೊತ್ತನೂರು ವನ್ಯಜೀವಿ ವಲಯದ ತೆಳ್ಳನೂರು–ಬಂಡಳ್ಳಿ ರಸ್ತೆಯಲ್ಲಿ ಸಿಡಿಮದ್ದು ಸೇವಿಸಿ ಕರಡಿ ಮೃತಪಟ್ಟಿದೆ. ಹೆಚ್ಚಾಗಿ ಕಾಡುಹಂದಿ, ಜಿಂಕೆಗಳನ್ನು ಮಾಂಸಕ್ಕಾಗಿ ಕೊಲ್ಲಲಾಗುತ್ತಿದೆ.

ಪೂರಕ ಮಾಹಿತಿ: ಬಸವರಾಜು ಬಿ, ಅವಿನ್ ಪ್ರಕಾಶ್, ಮಹದೇವ್ ಹೆಗ್ಗವಾಡಿಪುರ