ಗುಂಡ್ಲುಪೇಟೆ | ಕಳಪೆ ಕಾಮಗಾರಿ: ಕಿತ್ತು ಬಂದ ಡಾಂಬರು

ಗುಂಡ್ಲುಪೇಟೆ (ಚಾಮರಾಜನಗರ‌ ಜಿಲ್ಲೆ): ತಾಲ್ಲೂಕಿನ ಮಾಲಾಪುರದ ರಸ್ತೆ ಅಭಿವೃದ್ಧಿ ಕಾಮಗಾರಿ ಕಳಪೆಯಾಗಿದೆ ಎಂದು ಗ್ರಾಮಸ್ಥರು ಆರೋಪಿಸಿದ್ದು, ಡಾಂಬರು ಹಾಕಿದ ಮರುದಿನವೇ ಟಾರು ಕಿತ್ತು ಬಂದಿದೆ.

ಹಾಕಿದ ಡಾಂಬರು ಕೈಯಲ್ಲಿ ಸುಲಭವಾಗಿ ಕಿತ್ತು ಬರುತ್ತಿರುವುದನ್ನು ಗ್ರಾಮಸ್ಥರು ವಿಡಿಯೊ‌ ಮಾಡಿದ್ದು, ಈಗ ಸಾಮಾಜಿಕ‌ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.

ಗುಂಡ್ಲುಪೇಟೆ ಕ್ಷೇತ್ರದ ಮಾಲಾಪುರದಿಂದ ಯರಿಯೂರು ಅಂಕಹಳ್ಳಿ ಅಡ್ಡ ರಸ್ತೆಯನ್ನು (1.1 ಕಿ.ಮೀ) ₹58 ಲಕ್ಷ ವೆಚ್ಚದಲ್ಲಿ ಅಭಿವೃದ್ಧಿ ಪಡಿಸಲಾಗಿದೆ.

ವರ್ಷದಿಂದ ಕುಂಟುತ್ತಾ ಸಾಗಿದ ಕಾಮಗಾರಿ ಎರಡು ದಿನಗಳ ಹಿಂದೆಯಷ್ಟೇ ಮುಕ್ತಾಯವಾಗಿದೆ.

ಚುನಾವಣೆಯ ಕಾರಣಕ್ಕೆ ಶಾಸಕ ಸಿ.ಎಸ್.ನಿರಂಜನಕುಮಾರ್ ಸೂಚನೆಯಂತೆ ತರಾತುರಿಯಲ್ಲಿ ಕಾಮಗಾರಿ ನಡೆಸಲಾಗಿದೆ ಎಂದು ಆರೋಪಿಸಿರುವ ಗ್ರಾಮಸ್ಥರು, ಇದು 40 ಪರ್ಸೆಂಟ್ ಅಲ್ಲ 60 ಪರ್ಸೆಂಟ್ ರಸ್ತೆ ಎಂದು ದೂರಿದ್ದಾರೆ.