ಗೂಳೂರು: ಕೊಚ್ಚಿ ಹೋದ ನೆಲಗಡಲೆ

ಗೂಳೂರು(ಬಾಗೇಪಲ್ಲಿ): ತಾಲ್ಲೂಕಿನ ಗೂಳೂರು ಹೋಬಳಿಯ ಯಗವಐವಾರಪಲ್ಲಿ ಗ್ರಾಮದಲ್ಲಿ ಜಡಿ ಮಳೆ ನೆಲಗಡಲೆ ಬೆಳೆ ಸಂಪೂರ್ಣವಾಗಿ  ನಾಶ ಆಗಿದೆ.

ರೈತ ನಂಜುಂಡಪ್ಪ ತಮ್ಮ ಗ್ರಾಮದ ಬಳಿಯ 4 ಏಕರೆ ಪ್ರದೇಶದಲ್ಲಿ ನೆಲಗಡಲೆ ಬೆಳೆ ಬೆಳೆದಿದ್ದರು. ನೆಲಗಡಲೆ ಗಿಡಗಳನ್ನು ಕಿತ್ತು ನೆಲದ ಮೇಲೆ ಹಾಕಿದ್ದರು. ಮಳೆ ನೀರು ಕಡಲೆಕಾಯಿ ಗಿಡಗಳನ್ನು ಕೊಚ್ಚಿಕೊಂಡು ಹೋಗಿದೆ. ಕೈಗೆ ಬಂದ ತುತ್ತು, ಬಾಯಿಗೆ ಬರಲಿಲ್ಲ ಎಂಬಂತಾಗಿದೆ. ತೋಟದಲ್ಲಿ ಉಳಿದಿರುವ ಗಿಡಗಳು ಮೊಳಕೆ ಹೊಡೆದಿವೆ.

₹1 ಲಕ್ಷ ಸಾಲ ಮಾಡಿ ನೆಲಗಡಲೆ ಬೆಳೆ ಬೆಳೆದ್ದೆ. ಕೂಲಿ ಹಾಗೂ ಬಿತ್ತನೆಬೀಜ ಸೇರಿ ಹೆಚ್ಚುವರಿಯಾಗಿ ₹1 ಲಕ್ಷ ಖರ್ಚು ಮಾಡಿದ್ದೆ. ನೆಲಗಡಲೆ ಗಿಡಗಳು ಕಿತ್ತು ಒಣಗಲು ಹಾಕಿದ್ದವು. ಆದರೆ ನಿರಂತರ ಮಳೆಯಿಂದ ನೀರಿನ ತೇವಾಂಶದಿಂದ ಕಾಯಿಗಳು ಇದೀಗ ಮೊಳಕೆ ಹೊಡೆದಿದೆ. ₹2.50 ಲಕ್ಷ ನಷ್ಟ ಉಂಟಾಗಿದೆ ಎಂದು ರೈತ ನಂಜುಂಡಪ್ಪ ತಿಳಿಸಿದರು.

ಸ್ಥಳಕ್ಕೆ ಕಂದಾಯ, ಕೃಷಿ ಅಧಿಕಾರಿಗಳು ಭೇಟಿ ಮಾಡಿ ಪರಿಶೀಲನೆ ಮಾಡಬೇಕು. ನಷ್ಟ ಪರಿಹಾರದ ಬಗ್ಗೆ ಸರ್ಕಾರಕ್ಕೆ ವರದಿ ನೀಡಬೇಕು. ಸರ್ಕಾರ ಕೂಡಲೇ ನಷ್ಟ ಪರಿಹಾರ ಕಲ್ಪಿಸಬೇಕು ಎಂದು ಮನವಿ ಮಾಡಿದ್ದಾರೆ.