ಭಗವದ್ಗೀತೆ ಮನುಕುಲದ ಮಾರ್ಗದರ್ಶಿ: ಸುಬ್ಬರಾಯಪ್ಪ

ಗುಡಿಬಂಡೆ: ನಮ್ಮಲ್ಲಿ ದೇಶ ಪ್ರೇಮ, ಮಾನವೀಯತೆ ಸೇರಿದಂತೆ ಎಲ್ಲಾ ಗುಣ ಅಳವಡಿಸಿಕೊಂಡು ಮನುಷ್ಯತ್ವ ಪರಿಪಕ್ವವಾಗಲು ಪುಣ್ಯ ಪುರುಷರ ಜಯಂತಿ ಆಚರಣೆ ಅವಶ್ಯಕ ಎಂದು ಕಸಪಾ ಅಧ್ಯಕ್ಷ ಸುಬ್ಬರಾಯಪ್ಪ ತಿಳಿಸಿದರು.

ಪಟ್ಟಣದ ತಾಲ್ಲೂಕು ಕಚೇರಿ ಸಭಾಂಗಣದಲ್ಲಿ ತಾಲ್ಲೂಕು ಆಡಳಿತ ಆಯೋಜಿಸಿದ್ದ ಕೃಷ್ಣ ಜನ್ಮಾಷ್ಟಮಿ ಕಾರ್ಯಕ್ರಮದಲ್ಲಿ ಮಾತನಾಡಿದರು.

‘ಭಗವದ್ಗೀತೆ ಒಂದು ಧರ್ಮ ಜಾತಿಗೆ ಸೀಮಿತವಾಗದೆ ಇಡೀ ಮನುಕುಲದ ಮಾರ್ಗದರ್ಶಿಯಾಗಿದೆ. ಮಾನವಕುಲದ ಸಮಾನತೆ ಮತ್ತು ಶ್ರೇಯಸ್ಸಿಗಾಗಿ ಕೃಷ್ಣ ಭಗವದ್ಗೀತೆಯಲ್ಲಿ ಬೋಧಿಸಿರುವ ಆದರ್ಶಗಳು ಪೂರಕವಾಗಿವೆ ಎಂದು ತಿಳಿಸಿದರು.

ತಹಶೀಲ್ದಾರ್ ಸಿಗ್ಬತ್ ವುಲ್ಲಾ ಮಾತನಾಡಿ, ಸುಖ ಸಂತೋಷ ಇಲ್ಲದ ಮೇಲೆ ಜೀವನಕ್ಕೆ ಅರ್ಥ ಇರುವುದಿಲ್ಲ, ನಿಜವಾದ ಸಂತೋಷ ಕಾಣಬೇಕಾದರೆ ಭಗವಂತನನ್ನು ಅರಿಯಬೇಕು. ಅವನಲ್ಲಿ ಶರಣಾಗಬೇಕು ಶ್ರೀಕೃಷ್ಣನ ಸಂದೇಶ ಪಾಲನೆ ಮಾಡಬೇಕು ಎಂದು ಹೇಳಿದರು.

ಸಮಾಜ ಕಲ್ಯಾಣ ಇಲಾಖೆಯ ಲಕ್ಷ್ಮೀಪತಿ ರೆಡ್ಡಿ, ಪಯಾಜ್ ಅಹಮದ್, ಶ್ರೀನಿವಾಸ್ ಯಾದವ ಹಾಜರಿದ್ದರು.