ಶೃಂಗೇರಿ: ವಸತಿಗೃಹದಲ್ಲಿ ಚೂರಿ ಇರಿತ

ಶೃಂಗೇರಿ: ಶಾರದಾ ಮಠದ ವಸತಿ ಗೃಹದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ನಾಗರಾಜ್ ಭಟ್ ಅವರಿಗೆ ಆಟೊ ಚಾಲಕ ಕಲ್ಕಟ್ಟೆ ರವೀಂದ್ರ ಮಂಗಳವಾರ ಚೂರಿಯಿಂದ ಇರಿದ ಬಗ್ಗೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

‘ರವೀಂದ್ರ ಕಲ್ಕಟ್ಟೆ ಅವರ ಪತ್ನಿ ಚಿತ್ರಾ ಅವರು ಅದೇ ವಸತಿ ಗೃಹದಲ್ಲಿ ಸ್ವಚ್ಛತಾ ಕಾರ್ಯ ನಿರ್ವಹಿಸುತ್ತಿದ್ದು, ಮುಂಗಡ ಸಂಬಳದ ವಿಚಾರದಲ್ಲಿ ಇಬ್ಬರ ನಡುವೆ ವಾಗ್ವಾದ ನಡೆದಿತ್ತು. ಇದರಿಂದ ಕೋಪಗೊಂಡ ಚಿತ್ರಾ ಅವರ ಪತಿ ಕಲ್ಕಟ್ಟೆ ರವೀಂದ್ರ ಎಂಬಾತ ನಾಗರಾಜ್ ಭಟ್ ಅವರಿಗೆ ಚೂರಿಯಿಂದ ಇರಿದಿದ್ದಾನೆ’ ಎಂದು ಪೊಲೀಸರು ತಿಳಿಸಿದ್ದಾರೆ. ‌

ನಾಗರಾಜ್ ಭಟ್ ಅವರನ್ನು ಮಣಿಪಾಲ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಪೊಲೀಸರು ಆರೋಪಿಯನ್ನು ಬಂಧಿಸಿ, ನ್ಯಾಯಾಲಯಕ್ಕೆ ಹಾಜರು ಪಡಿಸಿದ್ದಾರೆ.