ಮೂಡಿಗೆರೆ | ಹಗಲಿನಲ್ಲೇ ದಾಳಿ ಮಾಡಿದ ಕಾಡಾನೆಗಳು: ಅಪಾರ ಹಾನಿ

ಮೂಡಿಗೆರೆ: ಗೋಣಿಬೀಡು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಸಾಲುಮರ ಗ್ರಾಮದ ಬಳಿ ಮಂಗಳವಾರ 19ಕಾಡಾನೆಗಳ ತಂಡ ದಾಳಿ ನಡೆಸಿದ್ದು, ಅಪಾರ ಪ್ರಮಾಣದ ಬೆಳೆ ಹಾನಿಗೊಳಿಸಿವೆ.

15 ದಿನಗಳಿಂದಲೂ ಗೋಣಿಬೀಡು ಗ್ರಾಮದ ಕಸ್ಕೇಬೈಲ್, ಆನೆದಿಬ್ಬ, ಹೊಸಪುರ, ಗಾಡಿಚೌಕ, ಕಲ್ಲುಗುಡ್ಡ ಸೇರಿದಂತೆ ಸುತ್ತಮುತ್ತಲ ಗ್ರಾಮಗಳಲ್ಲಿ ಕಾಡಾನೆಗಳು ಸಂಚರಿಸುತ್ತಿದ್ದವು. ಗುಂಪಾಗಿ ದಾಳಿ ನಡೆಸುತ್ತಿದ್ದ ತಂಡದಲ್ಲಿ 13 ಕಾಡಾನೆಗಳಿರಬಹುದು ಎಂದು ಅಂದಾಜಿಸಲಾಗಿತ್ತು. ಆದರೆ ಮಂಗಳವಾರ ಬೆಳಿಗ್ಗೆ ಸಾಲುಮರ ಮುಖ್ಯ ರಸ್ತೆಯಲ್ಲಿ ಕಾಫಿ ತೋಟದಿಂದ ಅರಣ್ಯ ಪ್ರದೇಶಕ್ಕೆ 19ಕಾಡಾನೆಗಳು ದಾಟಿರುವ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು.

ಕಾಡಾನೆಗಳು ಕಸ್ಕೇಬೈಲ್ ಚರ್ಚ್ ಹಾಲ್ ಬಳಿಕ ಇಂದ್ರೇಶ್ ಎಂಬುವವರ ತೋಟದಲ್ಲಿ ಬೀಡು ಬಿಟ್ಟಿದ್ದು, ಅಪಾರ ಪ್ರಮಾಣದ ಕಾಫಿ ಗಿಡಗಳು ಹಾನಿಯಾಗಿವೆ. ಅರಣ್ಯ ಇಲಾಖೆ ಅಧಿಕಾರಿಗಳು, ಸಿಬ್ಬಂದಿ ಕಾಡಾನೆಗಳನ್ನು ಓಡಿಸುವ ಕಾರ್ಯದಲ್ಲಿ ತೊಡಗಿದ್ದು, ಗೋಣಿಬೀಡು, ಕಸ್ಕೇಬೈಲ್, ಆನೆದಿಬ್ಬ, ಹೊಸಪುರ ಸೇರಿದಂತೆ ಬೇಲೂರು ತಾಲ್ಲೂಕಿನ ಚೀಕನಹಳ್ಳಿ ಪ್ರದೇಶದವರೆಗೂ ಮಂಗಳವಾರ ಕಾಫಿ ತೋಟಗಳಲ್ಲಿ ಚಟುವಟಿಕೆಗಳು ಸ್ಥಬ್ಧವಾಗಿದ್ದವು.