ಉತ್ತರಪತ್ರಿಕೆ ನಕಲು ಪ್ರತಿ ಪರೀಕ್ಷೆ: 'ಅನುತ್ತೀರ್ಣ'ಳಾದ ವಿದ್ಯಾರ್ಥಿನಿಗೆ 90 ಅಂಕ

ನರಸಿಂಹರಾಜಪುರ: ದ್ವಿತೀಯ ಪಿಯು ಇಂಗ್ಲಿಷ್‌ ಪರೀಕ್ಷೆಯ ಅಂಕ ನಮೂದಿಸುವಾಗ ಯಡವಟ್ಟಾಗಿ, 90 ಅಂಕ ಪಡೆದ ವಿದ್ಯಾರ್ಥಿನಿ

ಅನುತ್ತೀರ್ಣ ಎಂದು ದಾಖಲಾಗಿರುವುದು ಉತ್ತರಪತ್ರಿಕೆಯ ನಕಲು ಪ್ರತಿ ಪರೀಕ್ಷಿಸಿದಾಗ ಪತ್ತೆಯಾಗಿದೆ.

ಪಟ್ಟಣದ ಎಂ.ಕೆ.ಸಿ.ಪಿ.ಎಂ.ಪಿ ಕಾಲೇಜಿನ ವಾಣಿಜ್ಯ ವಿಭಾಗದ ವಿದ್ಯಾರ್ಥಿನಿ ಜೋಯ್ಸಿ ಜೋಸೆಫ್,ಈಗ90ಅಂಕಗಳೊಂದಿಗೆ ಉತ್ತೀರ್ಣರಾಗಿದ್ದಾರೆ.

ಫಲಿತಾಂಶ ಪ್ರಕಟಗೊಂಡಾಗ ಜೋಯ್ಸಿ ಜೋಸೆಫ್ ಉಳಿದೆಲ್ಲ ವಿಷಯಗಳಲ್ಲಿ ಉತ್ತಮ ಸಾಧನೆ ಮಾಡಿದ್ದು, 436 ಅಂಕ ಪಡೆದಿದ್ದರು. ಆದರೆ ಇಂಗ್ಲಿಷ್‌ನಲ್ಲಿ ಕೇವಲ 17 ಅಂಕಗಳು ಬಂದಿದ್ದವು. ಅನುಮಾನಗೊಂಡ ಪೋಷಕರು ಹಾಗೂ ಕಾಲೇಜಿನವರು ಉತ್ತರಪತ್ರಿಕೆಯ ನಕಲು ಪ್ರತಿ ತರಿಸಿ ನೋಡಿದಾಗ 90 ಅಂಕಗಳು ಬಂದಿರುವುದು ದೃಢ ಪಟ್ಟಿದೆ.

ಉತ್ತರ ಪತ್ರಿಕೆಯಲ್ಲಿ ಒಟ್ಟು 17 ಪುಟಗಳು ಬರೆದಿದ್ದು, ಅದನ್ನೇ ತಪ್ಪಾಗಿ ನಮೂದಿಸಿರಬಹುದು ಎನ್ನಲಾಗಿದೆ. ಸರಿಪಡಿಸಿದ ಬಳಿಕ ಒಟ್ಟು ಅಂಕವು 509 ಆಗಿದ್ದು, ಕಾಲೇಜು ಶೇ 100 ಫಲಿತಾಂಶ ಪಡೆದಿದೆ.