ತರೀಕೆರೆ ಬಳಿ ಅರಣ್ಯ ಸಿಬ್ಬಂದಿ ಗುಂಡೇಟು: ಚಿರತೆ ಸಾವು!

ತರೀಕೆರೆ(ಚಿಕ್ಕಮಗಳೂರು): ತಾಲ್ಲೂಕಿನ ಭೈರಾಪುರ ಬಳಿ ಚಿರತೆ ಸೆರೆ ಕಾರ್ಯಚರಣೆ ವೇಳೆ ಅರಣ್ಯ ಇಲಾಖೆ ಸಿಬ್ಬಂದಿ ಹಾರಿಸಿದ ಗುಂಡಿಗೆ ಚಿರತೆ ಮೃತಪಟ್ಟಿದೆ.

ನ.20ರಂದು ಶಿವಪುರ ಗ್ರಾಮದ ಕಲ್ಲು ಕ್ವಾರಿ ಬಳಿಯ ಶೆಡ್‌ನಲ್ಲಿ ವಾಸವಿದ್ದ ಕಾರ್ಮಿಕ ದಂಪತಿಯ 5 ವರ್ಷದ ಮಗುವನ್ನು ಪೋಷಕರ ಎದುರೇ ಚಿರತೆಯೊಂದು ಹೊತ್ತೊಯ್ದಿತ್ತು. ‌ಬಳಿಕ ಬಾಲಕಿಯ ಮೃತದೇಹ ದೊರೆತಿತ್ತು. ನ.28ರಂದು ಬೈರಾಪುರ 10 ವರ್ಷದ ಬಾಲಕನ ಮೇಲೆ ದಾಳಿ ನಡೆಸಿತ್ತು.

ಈ ಹಿನ್ನೆಲೆಯಲ್ಲಿ ಸಕ್ರೆಬೈಲಿನಿಂದ ಮೂರು ಸಾಕಾನೆಗಳು, ಮಂಗಳೂರು, ಬಂಡೀಪುರ, ಬನ್ನೇರುಘಟ್ಟ, ತಾವರೆಕಪ್ಪ ಮೃಗಾಲಯದಿಂದ ಪಶುವೈದ್ಯರನ್ನು ಕರೆಸಿ ಅರಣ್ಯ ಇಲಾಖೆ ಶನಿವಾರ ಚಿರತೆ ಸೆರೆ ಕಾರ್ಯಾಚರಣೆ ಆರಂಭಿಸಿತ್ತು.

‘ಭೈರಾಪುರ ಬಳಿ ಕಾಣಿಸಿಕೊಂಡ ಚಿರತೆಯನ್ನು ಸಿಬ್ಬಂದಿ ಹಿಂಬಾಲಿಸಿದ್ದರು. ಲಂಟಾನದಲ್ಲಿದ್ದ ಚಿರತೆ ಸಿಬ್ಬಂದಿಯ ಮೇಲೆ ಎರಗಿದಾಗ ಗುಂಡು ಹಾರಿಸಲಾಯಿತು. ಚಿರತೆ ಕೊಂಚ ದೂರ ಸಾಗಿ ಮೃತಪಟ್ಟಿದೆ’ ಎಂದು ಅರಣ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ. ‘ಜನರ ಮೇಲೆ ಅದರಲ್ಲೂ ಮಕ್ಕಳ ಮೇಲೆ ದಾಳಿ ಮಾಡುವ ಪ್ರವೃತ್ತಿ ಹೊಂದಿರುವ ಚಿರತೆ ಸೆರೆಗೆ ನಂದಿ, ಕೆಂಚಾಪುರ, ಕೆಂಚಾಪುರ ಗೇಟ್, ಭೈರಾಪುರ ಸುತ್ತಮುತ್ತಲ ಗ್ರಾಮಗಳಲ್ಲಿ ಹಲವು ಬೋನುಗಳನ್ನು ಇರಿಸಲಾಗಿತ್ತು. ಈ ಹಿಂದೆ ಬೋನಿನ ಅನುಭವ ಇರುವುದರಿಂದ ಚಿರತೆ ಬೋನಿಗೆ ಬಿದ್ದಿಲ್ಲ. ಆದ್ದರಿಂದ ಕಾರ್ಯಾಚರಣೆ ಆರಂಭಿಸಲಾಗಿತ್ತು. ಸಿಬ್ಬಂದಿಯ ಮೇಲೆ ದಾಳಿ ಮಾಡಿದಾಗ ಪ್ರಾಣ ರಕ್ಷಣೆಗಾಗಿ ಅವರು ಗುಂಡು ಹಾರಿಸಿದ್ದಾರೆ’ ಎಂದು ವಿವರಿಸಿದ್ದಾರೆ.

‘ಮಗು ಕೊಂದಿದ್ದು, ಪದೇ ಪದೇ ದಾಳಿ ನಡೆಸಿರುವುದು ಇದೇ ಚಿರತೆ ಎಂಬುದನ್ನು ಅರಣ್ಯ ಇಲಾಖೆ ಹೇಗೆ ಗುರುತಿಸಿದೆ. ಅದಕ್ಕೆ ಅನುಸರಿಸಿರುವ ಮಾರ್ಗಗಳೇನು ಎಂಬುದು ಗೊತ್ತಿಲ್ಲ. ಅರಣ್ಯ ಇಲಾಖೆ ಸಿಬ್ಬಂದಿಯಲ್ಲಿ ಆ ಪರಿಣತಿಯೂ ಇಲ್ಲ. ಆದ್ದರಿಂದ ಇಂಥ ಹಲವು ಪ್ರಶ್ನೆಗಳು ಉದ್ಭವಿಸುತ್ತವೆ. ಮರಣೋತ್ತರ ಪರೀಕ್ಷೆಯ ವರದಿ ಏನು ಹೇಳುತ್ತದೆ ಎಂಬುದನ್ನು ಅರಣ್ಯ ಇಲಾಖೆ ಅಧಿಕಾರಿಗಳು ಸ್ಪಷ್ಟಪಡಿಸಬೇಕು’ ಎಂದು ವನ್ಯಜೀವಿ ತಜ್ಞರು ಒತ್ತಾಯಿಸಿದ್ದಾರೆ.