ಕೊಟ್ಟಿಗೆಹಾರ: ಕಾಫಿಗೂ ಅಕಾಲಿಕ ಮಳೆಯ ಪೆಟ್ಟು

ಕೊಟ್ಟಿಗೆಹಾರ: ಅಕಾಲಿಕ ಮಳೆಯಿಂದ ಕಟಾವು ಹಂತದಲ್ಲಿದ್ದ ಅರೇಬಿಕಾ ಕಾಫಿ ಹಣ್ಣುಗಳು ಧರೆಗೆ ಉರುಳಿದ್ದು, ಬೆಳೆಗಾರರಿಗೆ ಅಪಾರ ನಷ್ಟ ಉಂಟಾಗಿದೆ.

ಮಳೆಯ ಹೊಡೆತಕ್ಕೆ ಉದುರಿ ಬಿದ್ದಿರುವ ಕಾಫಿ ಹಣ್ಣುಗಳನ್ನು ಮಣ್ಣಿನಿಂದ ಹೆಕ್ಕಿ ತೆಗೆಯಲು ಸಾಕಷ್ಟು ಶ್ರಮ ಬೇಕು. ಕೆಲವು ಮಣ್ಣಿನಲ್ಲಿ ಕೊಳೆತು ಹೋಗುತ್ತವೆ. ಗಿಡದಲ್ಲಿ ಉಳಿದಿರುವ ಹಣ್ಣಗಳನ್ನು ಕೊಯ್ಲು ಮಾಡಿದರೂ ಒಣಗಿಸಲು ಮಳೆ ಬಿಡುವು ನೀಡಬೇಕು. ಜಿಲ್ಲೆಯಲ್ಲಿ ’ಫೆಂಗಲ್‌’ ಚಂಡಮಾರುತದ ಹೊಡೆತಕ್ಕೆ ನೂರಾರು ಎಕರೆಯಷ್ಟು ಕಾಫಿ ತೋಟಗಳಿಗೆ ಹಾನಿಯಾಗಿದೆ. ಈಗಾಗಲೇ ಕಾಫಿ ಕೊಯ್ಲು ಮುಗಿಸಿರುವ ಬೆಳೆಗಾರರು ಅದನ್ನು ಒಣಗಿಸಲಾಗದೆ ಪರದಾಡುತ್ತಿದ್ದಾರೆ. ರೋಬಸ್ಟಾ ಕಾಫಿ ಕೂಡ ಹಣ್ಣಾಗುತ್ತಿದ್ದು, ಕಟಾವು ಹಂತಕ್ಕೆ ಬಂದಿದೆ.

ಕೊಟ್ಟಿಗೆಹಾರ, ಬಣಕಲ್ ಸುತ್ತಮುತ್ತ ಮಂಗಳ ಅಡಿಕೆ ಬೆಳೆದ ಬೆಳೆಗಾರರು ಈ ಬಾರಿ ಕೊಳೆ ರೋಗದಿಂದ ಕೈ ಸುಟ್ಟುಕೊಂಡಿದ್ದಾರೆ. ಅಡಿಕೆ, ಕಾಳು ಮೆಣಸಿಗೆ ಸಿಗುತ್ತಿದ್ದ ಬೆಳೆ ವಿಮೆಯನ್ನು ಕಾಫಿ ಬೆಳೆಗೂ ವಿಸ್ತರಿಸಬೇಕು.ಕಾಫಿ ಬೆಳೆಗೂ ವಿಮೆ ಸಿಗುವಂತಾಗಬೇಕು ಎಂದು ಬಣಕಲ್ ಮೂಡಿಗೆರೆ ತಾಲ್ಲೂಕು ಬೆಳೆಗಾರ ಸಂಘದ ಅಧ್ಯಕ್ಷ ಬಾಲಕೃಷ್ಣ ಬಾಳೂರು ಆಗ್ರಹಿಸಿದರು.