ಅಯೋಧ್ಯೆಯಲ್ಲಿ ವಾಲ್ಮೀಕಿ ಪ್ರತಿಮೆ ಸ್ಥಾಪಿಸಿ

ಚಿತ್ರದುರ್ಗ: ಅಯ್ಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಿಸುತ್ತಿರುವುದು ಸಂತೋಷ. ಈ ದೇಗುಲದ ಎದುರು ವಾಲ್ಮೀಕಿ ಪ್ರತಿಮೆಯನ್ನಾದರೂ ಸ್ಥಾಪಿಸಬೇಕು ಎಂದು ಕಾದಂಬರಿಕಾರ ಬಿ.ಎಲ್.ವೇಣು ಅಭಿಪ್ರಾಯಪಟ್ಟರು.

ನಗರದ ಕೆಎಸ್‌ಆರ್‌ಟಿಸಿ ಡಿಪೊ ಆವರಣದಲ್ಲಿ ಗುರುವಾರ ಏರ್ಪಡಿಸಿದ್ದ ಮಹರ್ಷಿ ವಾಲ್ಮೀಕಿ ಜಯಂತಿಯಲ್ಲಿ ಮಾತನಾಡಿದ ಅವರು, ‘ಮೇಲ್ವರ್ಗದ ಜನರಿಗೆ ಶ್ರೀರಾಮ ಬೇಕು. ವಾಲ್ಮೀಕಿ ಸೃಷ್ಟಿಸಿದ ಶ್ರೀರಾಮಾಯಣ ಕಾವ್ಯ ಮೆಚ್ಚಿಕೊಳ್ಳುತ್ತಾರೆ. ಆದರೆ, ವಾಲ್ಮೀಕಿ ಬೇಡವಾಗಿದ್ದಾರೆ’ ಎಂದು ಬೇಸರ ವ್ಯಕ್ತಪಡಿಸಿದರು.

‘ಶ್ರೀರಾಮಾಯಣದಲ್ಲಿ ವಾಲ್ಮೀಕಿ ಮಹರ್ಷಿ ಪ್ರೀತಿಯನ್ನು ಬಿತ್ತಿದ್ದಾರೆ. ಧರ್ಮ, ಜಾತಿಗಳ ನಡುವೆ ದ್ವೇಷವನ್ನು ಬಿತ್ತಿಲ್ಲ. ಓದದಿದ್ದರೂ ರಾಮಾಯಣ ಮತ್ತು ಮಹಾಭಾರತದ ಕುರಿತು ಎಲ್ಲರಿಗೂ ಗೊತ್ತು. ಹರಿಕಥೆ ಸೇರಿ ಇತರ ಕಲಾ ಪ್ರಕಾರಗಳಿಂದ ಇವು ಜನಮಾನಸದಲ್ಲಿ ಬೆರೆತುಹೋಗಿವೆ’ ಎಂದು ಹೇಳಿದರು.

‘ರಾವಣ ಪರಮ ಶಿವಭಕ್ತನಾಗಿದ್ದ. ಜೀವನದಲ್ಲಿ ಮಾಡಿದ ಒಂದು ತಪ್ಪಿಗಾಗಿ ಹತ್ತು ತಲೆಗಳಲ್ಲಿ ಒಂದು ತಲೆಯನ್ನು ಉಳಿಸಿಕೊಳ್ಳುವುದಕ್ಕೂ ಆಗಲಿಲ್ಲ. ಆದರ್ಶಮಯ ಪಾತ್ರಗಳನ್ನು
ವಾಲ್ಮೀಕಿ ಮಹರ್ಷಿ ಕೊಟ್ಟಿದ್ದಾರೆ. ಯಾವ ರೀತಿ ಬದುಕಬೇಕೆಂಬ ಆದರ್ಶ ಮೌಲ್ಯಗಳನ್ನು ತಿಳಿಸಿಕೊಟ್ಟಿದ್ದಾರೆ’ ಎಂದರು.

ಕೆಎಸ್‌ಆರ್‌ಟಿಸಿ ನಿಗಮದ ಅಧ್ಯಕ್ಷರೂ ಆಗಿರುವ ಶಾಸಕ ಎಂ.ಚಂದ್ರಪ್ಪ, ‘ರಾಮಾಯಣದಲ್ಲಿ ವಿಭಿನ್ನ ಪಾತ್ರಗಳಿವೆ. ಜೀವನಕ್ಕೆ ಅಗತ್ಯವಿರುವ ಆದರ್ಶ, ತತ್ವಗಳು ಅಕಡವಾಗಿವೆ. ರಾಮ, ಲಕ್ಷ್ಮಣ, ಸೀತೆಯಂತೆ ರಾವಣನೂ ಆದರ್ಶಗಳನ್ನು ಹೊಂದಿದ್ದ. ಯುದ್ಧದಲ್ಲಿ ಜಯಶೀಲನಾಗುವಂತೆ ಶ್ರೀರಾಮನನ್ನು ರಾವಣ ಹರಸಿದ್ದ’ ಎಂದು ಹೇಳಿದರು.

ನಗರಸಭೆ ಮಾಜಿ ಅಧ್ಯಕ್ಷ ಬಿ.ಕಾಂತರಾಜ್, ಮುಖಂಡ ಭೂತಯ್ಯ ಇದ್ದರು.

***

‘ಮೀಸಲಾತಿ ದಕ್ಕುವುದು ಅನುಮಾನ’

ಪರಿಶಿಷ್ಟ ಜಾತಿ ಮತ್ತು ಪಂಗಡದ ಮೀಸಲಾತಿ ಪ್ರಮಾಣವನ್ನು ರಾಜ್ಯ ಸರ್ಕಾರ ಹೆಚ್ಚಿಸಿದೆ. ಆದರೆ, ಇದು ಸಮುದಾಯಕ್ಕೆ ದಕ್ಕುವ ಅನುಮಾನ ಕಾಡುತ್ತಿದೆ ಎಂದು ಕಾದಂಬರಿಕಾರ ಬಿ.ಎಲ್‌.ವೇಣು ಕಳವಳ ವ್ಯಕ್ತಪಡಿಸಿದರು.

‘ವಾಲ್ಮೀಕಿ ಗುರುಪೀಠದ ಪ್ರಸನ್ನಾನಂದ ಸ್ವಾಮೀಜಿ ಧರಣಿಗೆ ಮಣಿದ ಸರ್ಕಾರ ಇಂತಹದೊಂದು ನಿರ್ಧಾರ ಕೈಗೊಂಡಿದೆ. ಮೀಸಲಾತಿಯ ಪ್ರಮಾಣ ಏರಿಕೆಯಾಗಿದೆ. ರಾಜ್ಯ ಸರ್ಕಾರದ ಈ ಶಿಫಾರಸು ಕೇಂದ್ರ ಸರ್ಕಾರ ಒಪ್ಪುತ್ತದೆಯೇ ಎಂಬುದು ಗೊತ್ತಿಲ್ಲ. ಕೇಂದ್ರ ಒಪ್ಪಿಗೆ ಸೂಚಿಸಲಿ ಎಂಬುದು ನಮ್ಮ ಆಶಯ’ ಎಂದರು.

‘ಟಿಕೆಟ್‌ ದರ ಹೆಚ್ಚಳ ಇಲ್ಲ’

‘ಸಾರಿಗೆ ನಿಗಮ ಸಾಕಷ್ಟು ಸಂಕಷ್ಟದಲ್ಲಿದೆ. ಡೀಸೆಲ್ ದರವು ಸಹ ಜಾಸ್ತಿಯಾಗಿದೆ. ಪ್ರಯಾಣಿಕರ ಹಿತದೃಷ್ಟಿಯಿಂದ ಬಸ್ ಟಿಕೆಟ್ ದರವನ್ನು ಹೆಚ್ಚಳ ಮಾಡುವುದಿಲ್ಲ ಎಂದು ಕೆಎಸ್‌ಆರ್‌ಟಿಸಿ ನಿಗಮದ ಅಧ್ಯಕ್ಷ ಎಂ.ಚಂದ್ರಪ್ಪ ತಿಳಿಸಿದರು.

‘ದೇಶದಲ್ಲಿಯೇ ಅತ್ಯುತ್ತಮ ಸಾರಿಗೆ ನಿಗಮ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ನಾಲ್ಕು ನಿಗಮದಿಂದ 1.30 ಲಕ್ಷ ನೌಕರರಿದ್ದು, ಅವರ ಹಿತ ಕಾಪಾಡುವುದೇ ಆದ್ಯ ಕರ್ತವ್ಯ. 600 ಬಸ್‌, 50 ಸ್ಲೀಪರ್‌ ಕೋಚ್ ಹಾಗೂ 50 ವೋಲ್ವೊ ಬಸ್‌ ಖರೀದಿಗೆ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಹಣ ಬಿಡುಗಡೆ ಮಾಡಿದ್ದಾರೆ’ ಎಂದರು.

ಮಹರ್ಷಿ ವಾಲ್ಮೀಕಿ ಕೃತಿ ದೇಶ, ಗಡಿ, ಧರ್ಮದ ಎಲ್ಲೆ ಮೀರಿದೆ. ಕೃತಿಯ ಮಾನವೀಯ ಮೌಲ್ಯಗಳು ಮತ್ತು ಆದರ್ಶಗಳೇ ಇದಕ್ಕೆ ಕಾರಣ.

- ಡಾ.ಜೆ. ಕರಿಯಪ್ಪ ಮಾಳಿಗೆ, ಪ್ರಾಧ್ಯಾಪಕ