ದಕ್ಷಿಣ ಕನ್ನಡ: ಅಂಕೆ ಮೀರಿ ಹರಡುತ್ತಿದೆ ಡೆಂಗಿ

ಮಂಗಳೂರು: ನಗರವನ್ನು ಮೂರು ದಶಕಗಳ ಕಾಡಿದ್ದ ಮಲೇರಿಯಾ ಇನ್ನೇನು ಹತೋಟಿಗೆ ಬಂದು ಎಂದು ನಿಟ್ಟುಸಿರು ಬಿಡುವಾಗಲೇ ‘ಡೆಂಗಿ’ ಹಾವಳಿ ದಾಂಗುಡಿ ಇಟ್ಟಿದೆ. ಅನಾಫಿಲಿಸ್‌ ಹೆಣ್ಣು ಸೊಳ್ಳೆಗಳ ಮೂಲಕ ಹರಡುವ ಮಲೇರಿಯಾ ಪ್ರಕರಣಗಳನ್ನು ಸಾವಿರಗಳ ಸಂಖ್ಯೆಯಿಂದ ಎರಡಂಕಿಗೆ ಇಳಿಸಿದ್ದೇವೆ ಎಂದು ಬೆನ್ನು ತಟ್ಟಿಸಿಕೊಂಡ ಆರೋಗ್ಯ ಇಲಾಖೆ, ಪಾಲಿಕೆ ಅಧಿಕಾರಿಗಳ ಪಾಲಿಗೆ ಈಡಿಸ್ ಸೊಳ್ಳೆಗಳ ಮೂಲಕ ಹರಡುವ ‘ಡೆಂಗಿ’ ಸವಾಲಾಗಿ ಕಾಡುತ್ತಿದೆ.

ಐದು ವರ್ಷಗಳಿಂದ ಈಚೆಗೆ ವರ್ಷದಿಂದ ವರ್ಷಕ್ಕೆ ಡೆಂಗಿ ಪ್ರಕರಣಗಳ ಸಂಖ್ಯೆ ಹೆಚ್ಚುತ್ತಲೇ ಸಾಗಿದೆ. ಈ ವರ್ಷವೂ ಮಳೆಗಾಲದ ಶುರುವಾದ ಬಳಿಕ  ಜಿಲ್ಲೆಯಲ್ಲಿ ಡೆಂಗಿ ಪ್ರಕರಣಗಳ ಸಂಖ್ಯೆ ದಿಢೀರ್ ಹೆಚ್ಚಾಗಿದೆ. ಜ್ವರದಿಂದ ಬಳಲುತ್ತಿರುವವರು ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ, ಖಾಸಗಿ ಕ್ಲಿನಿಕ್‌ಗಳಲ್ಲಿ ಚಿಕಿತ್ಸೆಗಾಗಿ ಸಾಲುಗಟ್ಟಿ ನಿಂತಿರುವ ದೃಶ್ಯ ನಗರದಲ್ಲಿ ಸಾಮಾನ್ಯವಾಗಿ ಬಿಟ್ಟಿದೆ. ವಾರಗಟ್ಟಲೆ ಕಾಡುವ ಈ ಜ್ವರ ಕಾರ್ಮಿಕ ವರ್ಗವನ್ನಂತೂ ಹಿಂಡಿ ಹಿಪ್ಪೆ ಮಾಡುತ್ತಿದೆ. ಜುಲೈ 13ರವರೆಗೆ ಜಿಲ್ಲೆಯಲ್ಲಿ 350 ಡೆಂಗಿ ಪ್ರಕರಣಗಳು ದೃಢಪಟ್ಟಿವೆ.

‘ನಮ್ಮ ಜಿಲ್ಲೆಯಲ್ಲಿ ಡೆಂಗಿ ಹಾವಳಿ ಅಷ್ಟಾಗಿ ಉಲ್ಬಣವಾಗಿಲ್ಲ. ಹೊರಗಡೆಯಿಂದ ಬಂದವರಲ್ಲೇ ಈ ಪ್ರಕರಣ ಜಾಸ್ತಿ ಇದೆ’ ಎನ್ನುತ್ತಾರೆ ಆರೋಗ್ಯ ಇಲಾಖೆಯ ಅಧಿಕಾರಿಗಳು. ಆದರೆ, ಈಚಿನ ದಿನಗಳಲ್ಲಿ ಸ್ಥಳೀಯರೂ ಸಾಕಷ್ಟು ಸಂಖ್ಯೆಯಲ್ಲಿ ಈ ರೋಗದಿಂದ ಬಳಲುತ್ತಿರುವುದು ಕಾಣಿಸಿಕೊಂಡಿದೆ. ಕಳೆದ ನಾಲ್ಕೈದು ವರ್ಷಗಳಲ್ಲಿ ಜಿಲ್ಲೆಯಲ್ಲಿ ಡೆಂಗಿಯಿಂದ ಸಾವು ಪ್ರಕರಣಗಳು ಸಂಭವಿಸಿರಲಿಲ್ಲ. 

ದೇರಳಕಟ್ಟೆಯ ಆಸ್ಪತ್ರೆಯಲ್ಲಿ ಡೆಂಗಿ ಸಲುವಾಗಿ ಚಿಕಿತ್ಸೆಗೆ ಬಂಟ್ವಾಳ ತಾಲ್ಲೂಕಿನ ವ್ಯಕ್ತಿಯೊಬ್ಬರು ಶನಿವಾರ ಮೃತಪಟ್ಟಿದ್ದಾರೆ. ಆದರೆ, ಅವರ ಸಾವು ಡೆಂಗಿಯಿಂದಾಗಿಯೇ ಸಂಭವಿಸಿದೆಯೇ ಎಂಬುದನ್ನು ಆರೋಗ್ಯ ಇಲಾಖೆ ಇನ್ನೂ ದೃಢಪಡಿಸಿಲ್ಲ. ‘ಚಿಕಿತ್ಸೆಗೆ ದಾಖಲಾಗುವ ಮುನ್ನವೇ ಅವರಿಗೆ ಅಪಸ್ಮಾರ ಕಾಣಿಸಿಕೊಂಡಿತ್ತು. ಹಾಗಾಗಿ ಅವರ ಸಾವಿಗೆ ಡೆಂಗಿಯೇ ಕಾರಣವೇ ಎಂಬುದು ಇನ್ನಷ್ಟೇ ಗೊತ್ತಾಗಬೇಕಿದೆ’ ಎಂದು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ರೋಗವಾಹಕ ಆಶ್ರಿತ ರೋಗಗಳ ನಿಯಂತ್ರಣಾಧಿಕಾರಿ  ಡಾ.ನವೀನಚಂದ್ರ ‘ಪ್ರಜಾವಾಣಿ’ಗೆ ತಿಳಿಸಿದರು.

2023ರ ಅಕ್ಟೋಬರ್‌ನಲ್ಲಿ ಡೆಂಗಿ ಜ್ವರದ ಚಿಕಿತ್ಸೆಗಾಗಿ ದಾಖಲಾಗಿದ್ದ ಎಂಟನೇ ತರಗತಿ ವಿದ್ಯಾರ್ಥಿಯೊಬ್ಬ ಕೊನೆಯುಸಿರೆಳೆದಿದ್ದನಾದರೂ, ಆತನ ಸಾವು ‘ಹೃದಯಾಘಾತದಿಂದ ಸಂಭವಿಸಿದೆ’ ಎಂದು ವೈದ್ಯರು ತಿಳಿಸಿದ್ದರು.

ಮಲೇರಿಯಾ ಉಲ್ಬಣವಾದಾಗ ಪಾಲಿಕೆ ಈ ರೋಗದ ನಿಯಂತ್ರಣಕ್ಕೆಂದೇ ವಿಶೇಷ ಕಾರ್ಯಪಡೆಯನ್ನು ರೂಪಿಸಿತ್ತು. ಖಾಸಗಿ ವೈದ್ಯರು ಹಾಗೂ ವೈದ್ಯಕೀಯ ಮತ್ತು ನರ್ಸಿಂಗ್‌ ಕಾಲೇಜುಗಳ ಪ್ರತಿನಿಧಿಗಳು ಹಾಗೂ ಸ್ವಯಂಸೇವಾ ಸಂಸ್ಥೆ  ನೆರವಿನೊಂದಿಗೆ ಸಮರೋಪಾದಿಯಲ್ಲಿ ಕ್ರಮಕೈಗೊಳ್ಳಲಾಗಿತ್ತು. ಮೆಲೇರಿಯಾ ಪ್ರಕರಣಗಳ ಮೇಲೆ ನಿಗಾ ವಹಿಸಲು, ಸೊಳ್ಳೆ ಉತ್ಪಾದನಾ ತಾಣಗಳನ್ನು ಪತ್ತೆ ಹಚ್ಚಿ ನಾಶಪಡಿಸಲು ಆ್ಯಪ್ ಒಂದನ್ನು ರೂಪಿಸಿ, ಸಾರ್ವಜನಿಕರ ಬಳಕೆಗೂ ಅವಕಾಶ ಕಲ್ಪಿಸಲಾಗಿತ್ತು. ಡೆಂಗಿ ಹಾವಳಿ ನಿಯಂತ್ರಣಕ್ಕೆ ಇನ್ನೂ ಅಂತಹ ಪರಿಣಾಮಕಾರಿ ಪ್ರಯತ್ನಗಳು ಕಾಣಿಸುತ್ತಿಲ್ಲ. 

ಡೆಂಗಿ ಕಾಣಿಸಿಕೊಂಡಲ್ಲಿ ಟಾಮಿಫಾಸ್‌ ರಾಸಾಯನಿಕ ಔಷಧ ಸಿಂಪಡಿಸಿ ಸೊಳ್ಳೆಗಳ ಲಾರ್ವಾ ನಾಶಪಡಿಸಲಾಗುತ್ತಿದೆ. ಬಿಟಿಐ ಎಂಬ ಜೈವಿಕ ದ್ರಾವಣ ಸಿಂಪಡಿಸಿಯೂ ಸೊಳ್ಳೆಗಳನ್ನು ಹತೋಟಿಗೆ ತರಲಾಗುತ್ತಿದೆ. ಆದರೆ, ಪಾಲಿಕೆ ಬಳಿ ಈ ಔಷಧ ಸಿಂಪಡಿಸುವ ಸಿಬ್ಬಂದಿಯ ಕೊರತೆ ತೀವ್ರವಾಗಿದೆ ಎಂಬುದು ಕೆಲವು ಪಾಲಿಕೆ ಸದಸ್ಯರ ದೂರು.

‘ಸದ್ಯಕ್ಕೆ ಡೆಂಗಿ ಕಾಣಿಸಿಕೊಂಡ ಪ್ರದೇಶದಲ್ಲಿ ಮಾತ್ರ ಔಷಧಿ ಸಿಂಪಡಿಸಲಾಗುತ್ತಿದೆ. ಇಬ್ಬರು ಸಿಬ್ಬಂದಿ ಹತ್ತಕ್ಕೂ ಹೆಚ್ಚು ವಾರ್ಡ್‌ಗಳಲ್ಲಿ ಔಷಧ ಸಿಂಪಡಿಸಬೇಕು. ಪರಿಸ್ಥಿತಿ ಹೀಗಿದ್ದರೆ ಡೆಂಗಿಯನ್ನು ಪರಿಣಾಮಕಾರಿಯಾಗಿ ಹತೋಟಿಗೆ ತರಲುಸಾಧ್ಯವೇ‘ ಎಂದು ಪಾಲಿಕೆ ಸದಸ್ಯರೊಬ್ಬರು ಪ್ರಶ್ನಿಸಿದರು.

‘ಪಾಲಿಕೆ ಬಳಿ ಸದ್ಯಕ್ಕೆ 46 ಮಂದಿ ಸ್ಪ್ರೇಯರ್‌ಗಳು ಲಭ್ಯ ಇದ್ದಾರೆ. ಬೇಡಿಕೆ ಬಂದಲ್ಲಿ ಔಷಧ ಸಿಂಪಡಣೆಗೆ ಕ್ರಮ ಕೈಗೊಳ್ಳುತ್ತಿದ್ದೇವೆ’ ಎಂದು ಪಾಲಿಕೆ ಆಯುಕ್ತ ಆನಂದ ಸಿ.ಎಲ್‌ ತಿಳಿಸಿದರು.

ವರದಿ ವಿಳಂಬ?:

‘ಡೆಂಗಿ ಪತ್ತೆಗೆ ನಡೆಸುವ ರಕ್ತ ಪರೀಕ್ಷೆಯ ವರದಿ 24 ಗಂಟೆಗಳಲ್ಲಿ ಕೈಸೇರುತ್ತದೆ’ ಎನ್ನುತ್ತಾರೆ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ಅಧಿಕಾರಿಗಳು. ಕೆಲವು ಖಾಸಗಿ ಪ್ರಯೋಗಾಲಯದಲ್ಲಿ ದುಡ್ಡು ಕೊಟ್ಟು ರಕ್ತ ಪರೀಕ್ಷೆ ಮಾಡಿಸಿಕೊಳ್ಳುವವರಿಗೆ 24 ಗಂಟೆಗಳಲ್ಲಿ ವರದಿ ಕೈಸೇರುತ್ತಿದೆ. ಆದರೆ, ಸರ್ಕಾರದ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ಶಂಕಿತ ಡೆಂಗಿ ಪ್ರಕರಣಗಳಿದ್ದರೆ ರಕ್ತದ ಮಾದರಿಯನ್ನು ವೆನ್ಲಾಕ್‌ ಆಸ್ಪತ್ರೆಯ ಪ್ರಯೋಗಾಲಯಕ್ಕೆ ಕಳುಹಿಸಲಾಗುತ್ತಿದೆ. ಅಲ್ಲಿಂದ ವರದಿ ಬರಲು ಮೂರು ದಿನಗಳು ತಗಲುತ್ತಿವೆ’ ಎಂದು ಹೆಸರು ಬಹಿರಂಗ ಪಡಿಸಲು ಬಯಸದ ಸಿಬ್ಬಂದಿಯೊಬ್ಬರು ತಿಳಿಸಿದರು.

‘ಡೆಂಗಿ ದೃಢಪಟ್ಟರೂ ಅದಕ್ಕೆ ನಿರ್ದಿಷ್ಟ ಚಿಕಿತ್ಸೆ ಇಲ್ಲ. ಜ್ವರದ  ಲಕ್ಷಣವನ್ನು ಆಧರಿಸಿ ಚಿಕಿತ್ಸೆ ನೀಡಲಾಗುತ್ತದೆ. ಹಾಗಾಗಿ ವರದಿ ವಿಳಂಬವಾದರು ಅದರಿಂದ ಚಿಕಿತ್ಸೆ ಮೇಲೆ ಪರಿಣಾಮಬೀರದು. ಆದರೆ, ರಕ್ತದ ಮಾದರಿಯ ಬೇಗ ಕೈಸೇರಿದರೆ ಡೆಂಗಿ ಹರಡದಂತೆ ಮುನ್ನೆಚ್ಚರಿಕೆ ವಹಿಸುವುದಕ್ಕೆ ಅನುಕೂಲವಾಗುತ್ತದೆ’ ಎಂದು ಅವರು ತಿಳಿಸಿದರು. 

ನಗರದ ಬಿಜೈ, ವೆಲೆನ್ಸಿಯಾ, ಬಂದರು, ಬೈಕಂಪಾಡಿ ಪ್ರದೇಶಗಳಲ್ಲಿ ಡೆಂಗಿ ಪ್ರಕರಣಗಳ ಸಂಖ್ಯೆ ಹೆಚ್ಚು ಇದೆ. ಬಿಜೈ ಕಾಪಿಕಾಡ್‌ನ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಜ್ವರಕ್ಕೆ ಚಿಕಿತ್ಸೆಗಾಗಿ ಬರುವವರ ಸಂಖ್ಯೆ ತಿಂಗಳಿನಿಂದ ಈಚೆಗೆ ಜಾಸ್ತಿಯಾಗಿದೆ. 

‘ಕೆಎಸ್‌ಆರ್‌ಟಿಸಿ ಬಸ್‌ ನಿಲ್ದಾಣ ಈ ಪಿಎಚ್‌ಸಿಯ ಸಮೀಪದಲ್ಲಿದೆ. ಹಾಗಾಗಿ ಹೆಚ್ಚಿನ ವಲಸೆ ಕಾರ್ಮಿಕರು ಇಲ್ಲಿಗೆ ಚಿಕಿತ್ಸೆಗಾಗಿ ಬರುತ್ತಾರೆ. ಈ ಪ್ರದೇಶದಲ್ಲಿ ಕಟ್ಟಡ ನಿರ್ಮಾಣ ಕಾಮಗಾರಿಯೂ ಹೆಚ್ಚಿನ ಪ್ರಮಾಣದಲ್ಲಿನಡೆಯುತ್ತಿದೆ. ಹಾಗಾಗಿ ಇಲ್ಲಿ ವಲಸೆ ಕಾರ್ಮಿಕರ ಸಂಖ್ಯೆಯೂ ಜಾಸ್ತಿ. ಹೆಚ್ಚಿನ ಡೆಂಗಿ ಪ್ರಕರಣಗಳು ವಲಸೆ ಕಾರ್ಮಿಕರಲ್ಲೇ ಕಾಣಿಸಿಕೊಂಡಿದೆ. ಸ್ಥಳೀಯ ನಿವಾಸಿಗಳಲ್ಲಿ ಕಡಿಮೆ’ ಎಂದು ಬಿಜೈ ಕಾಪಿಕಾಡ್‌ನ ಆರೋಗ್ಯ ಸಿಬ್ಬಂದಿಯೊಬ್ಬರು ಮಾಹಿತಿ ನೀಡಿದರು.

ಡೆಂಗಿ ಪ್ರಕರಣಗಳು ದಿಢೀರ್‌ ಹೆಚ್ಚಲು ಶುರುವಾದ ಬಳಿಕ ಪಾಲಿಕೆಯೂ ಎಚ್ಚೆತ್ತಿದೆ. ಮೇಯರ್‌ ಸುಧೀರ್‌ ಶೆಟ್ಟಿ ಕಣ್ಣೂರು ಅವರು, ಡೆಂಗಿ ನಿಯಂತ್ರಣದ ಬಗ್ಗೆ ವಿಶೇಷ ಸಭೆ ನಡೆಸಿ ಕೆಲವೊಂದು ಸೂಚನೆಗಳನ್ನು ಅಧಿಕಾರಿಗಳಿಗೆ ನೀಡಿದ್ದಾರೆ. ಇದರ ಬೆನ್ನಲ್ಲೇ ವಾರ್ಡ್‌ ಮಟ್ಟದಲ್ಲಿ ಆರೋಗ್ಯಾಧಿಕಾರಿಗಳನ್ನು ಒಳಗೊಂಡ ತಂಡಗಳನ್ನು ರಚಿಸಲಾಗಿದೆ. ಡೆಂಗಿ ಪತ್ತೆಯಾದ ಪ್ರದೇಶದಲ್ಲಿ ನಿಯಂತ್ರಣ ಕ್ರಮಗಳನ್ನು ಕೈಗೊಳ್ಳಲು ಈ ತಂಡಗಳು ಕ್ರಮವಹಿಸುತ್ತಿವೆ.

ಪೂರಕ ಮಾಹಿತಿ: ಲೋಕೇಶ್ ಸುಬ್ರಹ್ಮಣ್ಯ, ನರೇಂದ್ರ ಕೇರೆಕಾಡು