ಉಪ್ಪಿನಂಗಡಿ: ಸಿಬಿಐ ಅಧಿಕಾರಿ ಎಂದು ನಂಬಿಸಿ ಹಣ ಪಡೆಯಲು ಯತ್ನ

ಉಪ್ಪಿನಂಗಡಿ: ಸಿಬಿಐ ಅಧಿಕಾರಿ ಎಂದು ಪರಿಚಯಿಸಿ ಕರೆ ಮಾಡಿ, ‘ನಿಮ್ಮ ಮಗನ ವರ್ತನೆ ಸರಿ ಇಲ್ಲ; ಆತನ ಮೇಲೆ ಪ್ರಕರಣ ದಾಖಲು ಮಾಡಬೇಕಾಗುತ್ತದೆ’ ಎಂದು ಬೆದರಿಕೆ ಹಾಕಿ ಹಣ ನೀಡುವಂತೆ ಒತ್ತಾಯಿಸಿದ ಘಟನೆ ಉಪ್ಪಿನಂಗಡಿಯಲ್ಲಿ ನಡೆದಿದೆ.

ಉಪ್ಪಿನಂಗಡಿ ಬ್ಯಾಂಕ್ ರಸ್ತೆಯ ನಿವಾಸಿ ಅಬ್ಬಾಸ್ ಎಂಬುವರ ಮೊಬೈಲ್‌ಗೆ 92-3471745608 ಸಂಖ್ಯೆಯಿಂದ ಕರೆ ಬಂದಿದ್ದು, ಹಿಂದಿ ಭಾಷೆಯಲ್ಲಿ ಮಾತನಾಡಿದ ವ್ಯಕ್ತಿ, ನಾನು ದೆಹಲಿಯಿಂದ ಸಿಬಿಐ ಅಧಿಕಾರಿ ಮಾತಾನಾಡುತ್ತಿರುವುದಾಗಿ ತಿಳಿಸಿದ್ದಾನೆ. ಮಗನ ಹೆಸರು ಉಲ್ಲೇಖಿಸಿ, ಆತ ವಿದ್ಯಾಭ್ಯಾಸ ಮಾಡುತ್ತಿರುವ ಬಗ್ಗೆ ನಿಖರವಾಗಿ ತಿಳಿಸಿದ್ದಾನೆ. ಆತ ಏನೆಲ್ಲಾ ಮಾಡುತ್ತಿದ್ದಾನೆ ಎಂಬ ಅರಿವು ನಿಮಗಿದೆಯಾ? ಅವನನ್ನು ತಕ್ಷಣ ಬಂಧಿಸಬೇಕಾಗುತ್ತದೆ ಎಂದು ಬೆದರಿಸಿದ್ದಾನೆ. ಕರೆ ಬಂದ ಸಂಖ್ಯೆಯ ಪ್ರೊಫೈಲ್‌ ಫೊಟೊ ಕೂಡ ಪೊಲೀಸ್ ಅಧಿಕಾರಿಯಂತೆ ಇರುವ ವ್ಯಕ್ತಿಯದ್ದೇ ಇದ್ದು, ಸಂಖ್ಯೆಯ ಕೆಳಗೆ ಸಿಬಿಐ ಎಂದೂ ಇದೆ.

ಮಗನ ಚಟುವಟಿಕೆ ಬಗ್ಗೆ ಅರಿವು ಇದ್ದ ಅಬ್ಬಾಸ್, ಕರೆ ಮಾಡಿದ ವ್ಯಕ್ತಿಗೆ ಕೆಲವು ಪ್ರಶ್ನೆ ಕೇಳಿದ್ದಾರೆ. ಆಗ ನಿಮಗೆ ನಮ್ಮನ್ನು ಪ್ರಶ್ನಿಸುವ ಹಕ್ಕು ಇಲ್ಲ. ನಾವು ಕೇಳುವ ಪ್ರಶ್ನೆಗಳಿಗೆ ಮಾತ್ರ ಉತ್ತರಿಸಿ ಎಂದು ಹೇಳಿದ್ದಾನೆ. ಪೋನ್ ಕರೆ ಮಾಡಿ ಬೆದರಿಕೆ ಹಾಕಿ ಹಣ ಕಬಳಿಸುವ ಜಾಲದ ಅರಿವು ಇದ್ದ ಅಬ್ಬಾಸ್, ಕರೆ ಮಾಡಿದ ವ್ಯಕ್ತಿಗೆ ಬೈದಿದ್ದು, ಆಗ ಕರೆ ಮಾಡಿದ ವ್ಯಕ್ತಿ ಕರೆಯನ್ನು ಕಡಿತಗೊಳಿಸಿದ್ದಾನೆ ಎಂದು ಅಬ್ಬಾಸ್ ತಿಳಿಸಿದ್ದಾರೆ.

ದೂರವಾಣಿ ಸಂಖ್ಯೆಯ ಆರಂಭದಲ್ಲಿ ಕೋಡ್‌ ಸಂಖ್ಯೆ 92 ಎಂದಿದ್ದು, ಅದು ಪಾಕಿಸ್ತಾನದಲ್ಲಿ ಬಳಕೆಯಾಗುವ ಪೋನ್ ಸಂಖ್ಯೆ ಆಗಿದೆ. ಅಲ್ಲಿನ ವ್ಯಕ್ತಿಗೆ ಉಪ್ಪಿನಂಗಡಿಯ ನಿವಾಸಿಯಾಗಿರುವ ಅಬ್ಬಾಸ್‌ ಅವರ ಮೊಬೈಲ್ ಸಂಖ್ಯೆ ಹಾಗೂ ಅವರ ಮಗನ ಹೆಸರು ತಿಳಿದಿರಬೇಕಾದರೆ ಈ ಜಾಲದಲ್ಲಿ ಸ್ಥಳೀಯರೂ ಭಾಗಿಯಾಗಿರುವ ಶಂಕೆ ವ್ಯಕ್ತವಾಗಿದೆ.